一個懦夫 VS 過氣大師
2019/10/29 09:53:37 網誌分類: 教育
記得我發表《致曾俊華先生的信》兩個星期後，曾生就出咗《我們都是香港人》呢條片。正當我思前想後，究竟回唔回應果陣，佢又响港大某學系嘅迎新午宴裡面，將《我們都是香港人》嘅內容，再讀多一次，不過原來唔喺 ORIGINAL，而喺一個加咗料嘅版本。
結果，我放棄咗果篇回應，只喺响自己個 FACEBOOK 度，寫咗一小段交代。總之都喺果句，我對呢個人，已經冇乜嘢可以回應。
一個懦夫
就好似段校長，無論以邊個角度睇，都喺一個懦夫。
角度一：幾個月嚟，段校長受到眾多學生以有形及無形嘅暴力壓迫，由「連儂車」事件，以至包圍校長室、破壞行政樓、撒溪錢，之後終於低頭對話，仲發埋果封公開信。我諗由呢個角度睇，唔使多講，一個懦夫囉！
角度二：段校長喺真心真意發表果封公開信嘅，SORRY，又喺一個懦夫！點解？
其實一個校長，唔使好勇，但為人師表，面對學生最基本嘅，就喺要做正確嘅事情。正如理大校長，唔肯同蒙面畢業生握手，就喺做咗正確嘅事情，以行動、以言論，立場鮮明咁指正學生嘅錯誤，而唔喺縱容。段校長嘅公開信，即喺同啲學生講，你地以後出到嚟社會，大可以隨便犯法，就算俾人拉咗，都喺 NO PROBLEM 嘅！反正唔使乜嘢證據，只要七情上面咁老屈下啲警察呢，就自然有人同你地出頭啦！
作為師長，真正嘅勇者，喺勇於直接同年輕人講：你地做錯啦！喺勇於由得啲年輕人，狠狠咁跌一交，等佢地面對錯誤，為錯誤行為負責。如果連呢份勇氣都冇嘅話，咁算乜嘢勇者？算乜嘢師長？都喺果句，一個懦夫囉！
記得幾年前，見過一個教育工作者，佢話，香港教育最大嘅問題，就喺教學環境，同現實嘅社會環境，完全脫哂節。
過氣大師
講返曾經俾我封為「真正嘅大師」果位曾俊華先生，似乎都仲喺發緊佢個「廿一世紀教育美夢」喎。我諗我真喺冇乜嘢想同佢講，就算有，都只喺重複返以下呢一句：
「教育，並不是為年輕人，提供一個締造美夢的温室，然後由得他們的美夢，破碎於現實世界中。」
其實，我已經好耐冇留意大師嘅動態，不過唔知點解，早兩日我 FACEBOOK 彈出咗佢分享 Corridor Digital 嘅一段影片，佢仲寫咗一句「Are we concerned?」。或者大家可以幫手睇睇，可能大師級啲嘢，實在太難明，我真喺唔知道佢想表達啲乜。我覺得，有嘢，就唔該直接啲講，有啲事情，喺唔可以隨便攞嚟開玩笑架！
John Tsang (曾俊華)：Are we concerned? J
當年，金融沙皇，放唔低沙皇呢個大包袱，就變成咗「過氣沙皇」；
今日，真正大師，放唔低對年輕人嘅寵溺，就變成咗「過氣大師」！
一個是懦夫，一個是過氣投機政客。