8~9/9 港股洗倉式下挫

港股高處不勝寒, 獲利沽壓大增, 熊死牛命危

8/9 周三恆指收26321, 跌32點, 結束兩連升

QQ見頂, 港股見頂

周三四五係創周高位的時間窗口,今日果然創本周高位26560, 不過恒指由低位24581反彈至今日高位26560, 累計上升1978點, 反彈幅度已超標, 足夠水位俾大鱷轉身, 反手造淡, 獲利沽壓出龍, 今日只係靠QQ托市, 掩護出貨, 淡友果然於26500攔路, 港股沽空急增, 每次沽空爆燈, 後市必有大插插

雙底回升利破頂, 結果港股接連突破多個阻力位, 創近一個月高位, 不過近日港匯逐步轉弱, 如果熱錢持續流走, 再破頂機會下降, 大媽趁港股一路升就一路走貨, 亦會窒礙港股上升步伐, 向下支持25800.25500, 如失守不妙, 代表好友已鬆人

今日港股表面上創9月新高, 其實只係靠QQ爆上$529所推動, 其他股份於過去幾日早已見頂回落, 甚至跌穿橫行區底部, 走勢差劣, 唔少股份早於大市率先碌落山, 連熱炒的股份都見龐大沽壓, 股份表現具啟示作用, 預示指數唔撐得幾耐, 以閒閒地三五百點即市波幅來看, 26000危危乎

一般來說, 恒指每周升跌多數係2~3天, 但上周恒指4升1跌, 透支了本周的升市日數, 出得黎行, 遲早要還, 估計本周升市日數會減少, 跌市日數會增加, 不會只跌1天, 每周港股通常有兩個方向, 周初大升, 今日就衝高回落, 升完就要跌, 至於下跌幅度及速度就要睇中美股市

昨日港股雖然收升, 但測市指標卻釋出利淡訊號, 大市有暗湧, 預示今日要回吐, 結果港股及QQ都收陰, 今日恒指收市U盤夾硬踢高58點, 夾硬嘜高QQ收市價, 令恒指收窄升幅, 彈得虛, 港股整體下跌股份勁多, 臨危托沽格, QQ收陰燭, 打破了過去兩日收升收陽的勢頭, 係強烈利淡訊號, QQ高見$529, 進入$520~530阻力區俾淡友打回頭, QQ見頂, 港股見頂

每次反彈浪見貼價牛出世, 就代表港股升到水尾, 係見頂先兆, 當QQ收陰燭就係利淡訊號, 港股震盪未完,下殺危機未除, 假如9月收跌, 就會係9月上旬見頂回落, 9月下旬創月內新低, 插穿1/9低位25694來擴大周及月波幅, 26500阻力非輕, 升穿不難, 但企穩不易, 目前港股成交細, 推升動力不算強, 只係靠挾淡推升, 升市成交縮, 並不配合升勢, 當有利淡消息, 就較易反艇, 熊市反彈不宜過份樂觀, 昨日白露轉節氣, 理應到了變盤時刻, 今日創9月新高, 只要明日港股收跌, 見頂機會大增, 睇港股RSI, 以往上到呢個水平港股就會轉勢向下

~~~~~~~~~~~~~~~~~~~~~~~~~~~~

匯市形勢不妙

匯市表現係中港股市升跌的關鍵元素, 8月尾美元衝上93.5打回頭, 人民幣及港匯隨即轉強, 推動中港股市彈高, 但印象中匯市同一勢頭好難維持成個月, 如今呢種形勢(美元弱.人仔港匯強)已經行左兩個多星期, 昨日白露轉節氣, 理應要變盤, 轉勢向下, 過去兩周掃滬A股的老外昨日上午突然走貨, 今日繼續沽貨, 股匯息息相關, 美元彈高, 老外走貨, 絕不會是巧合,

港匯進一步轉弱, 人民幣連跌2日, 美國10年期國債息上周插穿1.3%後拗腰向上, 一度高見1.377, 怪不得近來走強的科企腳仔軟, 騰訊等重點網絡遊戲企業和遊戲相關平台被內地當局約談, QQ連續3日企三大沽空榜, 預示QQ快將插水, VHSI 恒指恐慌指數急升5.4%, 美股高處不勝寒, 多家大行唱淡美股, 好少見這麼齊心, 必定會對美股構成壓力, 當美股反艇, 港股死得

美元於上周五守住92拗腰向上, 如今已彈到上92.7附近, 睇匯市表現港股今日不應跌這麼少, 有夾硬托住的味道, 今日港股死唔去可能係因為上証尾市拗腰上衝, 收復失地, 亦有可能係扮跌唔落引好友入局, 昨日港股測市指標出現利淡訊號, 今日伸多一腳上去創月內新高, 測市指標釋出更多利淡訊號, 短炒好友要睇位食胡,

恒指本周高低位25827~26560, 周波幅733點只係勉強達標, 既然受制於26500, 不進則退, 就要插穿25827來擴大周波幅, 26100向下每百點級級有牛牛, 牛多熊少利下殺, 如失守25800, 就要向25500.25000進發....

港股暴跌失守10及20天線, 大舉屠牛

9/9 周四恆指收25716, 大跌605點, 兩跌兩日

QQ尋底.港股尋底

今日港股大插, 恒指已做夠本周波幅, 明日冇必要再大插落地獄, 因為要預留波動空間俾下周, 如果港股轉為尋底市, 下周就會創月內新低, 以即市波幅三五百點來看, 明日一係上25900, 一係下試25500, 好淡角力大位25902, 港股跌穿10.20天線.26000大位不會一去冇回頭, 就算市弱都會有後抽/吻別, 彈完再插過

今日科企是否為殺好倉跌過龍, 明日能否作出反彈, 就要看上証表現, 只要老外繼續掃A股, 推動上証突破3700阻力位, 穩住內地股市, 就可穩住港股, 大媽今日趁低吸納QQ, 成也QQ.敗也QQ, 今日QQ收跌收陰, QQ能否重上$493.6阻力位非常關鍵, 如收於其下, 代表港股仍未脫險, 匯債形勢改善, 今晚美元及十年期債息回落, 利好科企, 港匯略為回升

上周湧入QQ.網易.京東集團等新科企的莊家今日大舉沽貨撤退, 港股破位而下, 近日熱炒的新科企蟹貨大增, 會壓住港股後市, 以QQ為例, 過去幾日股民以為搭順風車買上, 昨日冇走貨, 今日全艇, 早已提醒大家$520~$530有淡友駐兵攔路, 昨日高見$529, 今日就大插低見$479, 跌幅驚人, 擺明係淡友大鱷借消息夾硬隊, 目的係殺好倉及向下擴大周及月波幅, 又係好淡通殺, 當大鱷食飽牛牛, 又或者想扮跌唔落引牛入局, 又或者阿爺澄清傳聞, 港股就會反彈, 不過26200~26300會見阻力, 不易再突破, 昨日創本周高位26560, 今日暴跌收大陰燭, 係見頂訊號

後市如恒指無法再創新高, 以一般月波幅來看就要見25000以下, 即係做第熊市第三隻腳, 如果股災市就會有超過三千點月波幅, 隊穿24000

26560(頂) - 1600~2200點月波幅 = 24960~24360

上次上証插穿3400, 恒指失守25000, 老外掃A股, 推動上証創今年新高, 9月有基金季結, 阿爺國慶送大禮, 跨境理財通, QQ等多家企業回購股份, 大媽掃貨, 本應利好, 不過目前最令人擔心係中美股市處於高位, 下跌空間大, 當外圍股市插水, 港股必死, 因為港股係大鱷提款機, 好友第一個防線在25500, 最後防線在25000, 如失守, 代表好友已逃

~~~~~~~~~~~~~~~~~~~~~~~~~~~~~~~~

26000好淡角力

市強由高位回吐600~800點就要反彈 (26560 - 600~800 = 25760~25960), 市弱嘔千點都會彈 (26560 - 1000 = 25560), 今日低見25624, 收25716, 拋離關鍵位25800不遠, 代表好友仍未放手, 只要明日收25902之上, 本周收升收陽, 連升三周, 打破了2月中見大頂以來最長升浪, 亦與上証周線同步收升, 由於中港股市上升時間及幅度已超標,  下周就要小心, 調整機會大

昨日阿爺約談QQ等多間新科企, 今日市傳阿爺又出招打壓手遊, 估計春光鴨大鱷昨日已收到風, 所以夾硬推上26560創即月新高, 亦將QQ踢上$529, 好明顯係推上去造淡, 今日即插, 由高位嘔近千點, 淡友賺到笑, 市場對科技股仍有戒心, 一彈上去就惹來沽壓, 資今仍熱炒資源商品股

一向跟住美股騰上騰落的夜期亦出現異動, 昨晚夜期下半場於低位橫行, 冇跟隨美股收窄跌幅, 極為反常, 最終收大低水, 已發出強烈利淡訊號, 今日果然暴跌, 幸好今晚夜期回升, 明日港股有望高開, 只要有買盤追入, 有助好友進一步推高大市, 上証能否突破阻力位3700及前頂3731非常關鍵, 只要上証唔插, 港股就不會深潛, 當上証見頂回落, 港股就要落地獄

弱雞的平保一直反彈乏力, 沽壓大到不得了, 港股9月初彈高, 但平保卻似死狗, 內險投資恒大及華夏幸福等內房地產商虧蝕, 拖低股價, 屋漏更兼逢夜雨, 平保長線投資的大股東卜蜂集團於本周一(6/9)以每股平均作價60.577元減持平保, 套現超過4.6億元, 平保回購股份仍未能穩住股價