時事即興7

一而再再而三不厭其煩，有一句勸一句勸二勸三。請諸君熄怒火平心靜氣，將不滿嘅情緒一一詳談。

世界上九成九不如人意，日有思夜有想糾纏心間。未開懷放不下夢魂顛倒，將小事化大事恐佈奇譚。

人睇人諸般錯千瘡百孔，睇自己喺完人指點江山。入人罪雖微細無限放大，飾己非大罪名視作等閒。

之所以西風話雙重標準，我可以你不能重重設關。至令到人同人諸多誤會，耍脾氣發晦氣任性刁蠻。

不順心不順意七情上面，又粗魯又粗口將直扭彎。只知道將自我視為重要，不願意去承認惡性刁難。

從不信唔當家唔知米貴，一闊處三大處慳無可慳。在家庭要節流開源難免，千種思萬種慮稔到樣殘。

大家庭小家庭相同遭遇，量收入計支出未敢買衫。冇娛樂冇消遣平平淡淡，為生活為工作女女男男。

做兒女做下屬認真容易，做父母做上司好重負擔。儒家話守本份唔好越位，免得過亂咁噏亂將琴彈。

出毛病爭話事尾大不掉，到頭嚟棧後悔淚濕衣衫。想出頭做亞一以為好易，坐上去要落嚟份外艱難。

使權利盡義務唔喺講笑，想作威兼作福唔想承擔。世界上邊度嚟咁多著數，食完嘢唔比錢第日至還。

所以話件件事易地而處，就知道享受完即刻埋單。唔知道幾時起睇餸食飯，四字詞嘅金句實在美談。

要自量要警剔唔犯唔錯，未到你咪出位搏命去爭。爭得到未必好唔喺講笑，免得過自揾笨自找麻煩。

憶當日仲喺細好想長大，想話事爭主權勁過生番。稔到點就想點頂撞父母，好得戚好得意大開笑顏。

到而家大個咗多咗責任，至知道做仔女最為簡單。到某年到某月做人父母，比仔女長頂撞淚濕汍瀾。

先稔到針拮人自己唔痛，輪到你比針拮痛入心間。風雨後簷前水滴滴一樣，唔到你牙擦擦話喺好閒。

揾藉口同理由支持反叛，任人勸唔肯聽寜折不彎。點稔到剃人頭遲早被剃，呢種喺真實語因果循環。

咪以為萬大事冇乜所謂，到時候逐一計唔該埋單。恃青春恃學識有恃無恐，自以為隻手遮地北天南。

到呢度番轉頭講下香港，近年嚟時分秒度梗難關。有不法暴亂徒周圍攪事，又示威又遊行認真得閒。

表面喺勇鬥士為民請命，靜雞雞代外資禍亂民間。令中央對港務投鼠忌器，怕國際搏大霧惹起波瀾。

論中國嘅輩份原是父母，論香港嘅地位份屬親生。只不過總管家共產任職，被恐怖擴大化令人厭煩。

以一非忘百是心存偏見，將小過成大罪罪重如山。示威者任判官扣人帽子，判你錯你就錯辯駁好難。

縱千依縱百順喺你嘅事，唔受落到收尾啱都唔啱。有幾錫有幾愛感受唔到，為爭權為話事百般刁難。

一張咀仲衰過官字兩口，既得隴又望蜀貪完再貪。忘記咗香港地權屬中國，邊一個有主權割地封藩。

有本事就移民離開香港，有本事靠外國更改名單。有本事闖外國打家刼舍，有本事對外國屈膝厚顏。

有本事到外國唔食米飯，有本事玩外國另打江山。有本事寸外國遊行攪事，有本事將外國勢力打殘。

只睇到外國好好到點樣，假民主假公道陰險藏奸。歎有眼卻無珠萬千後代，未稔起先祖輩血淚潸潸。

最早期曾付出幾多血汗，至打造東方珠光耀人間。冇中國大市場扶持背後，靠英國想騰飛睇怕困難。

八九年六四日民運事件，喺官員錯決定確唔抵爭。喺人為攪成咁腥風血雨，至令人唔原諒骨肉相殘。

關中國乜嘢事拉埋嚟講，共產官唔文明答案簡單。如果喺反共產唔要祖國，憑乜嘢嘅身份位列人寰？

唔好怨西風講冷言冷語，只幫理不幫親豈有二三？一件事咪攪到誅連九族，令大眾信片面有目如盲！