joboche1
joboche1
joboche1

如果喺你,點睇?

2019/08/28 08:21:11 網誌分類: 齋_TALK_廣東話
28 Aug

近日,有朋友同西風講:假如有咁嘅情形,西風會點睇?

【假如西風你有意又好,冇意都好,講嘢得罪咗我,令我好嬲好嬲!跟住,我揾咗成搭友不但去圍你屋企,仲破門而入,見人就打,見嘢就搶,搶唔到就盡情破壞同打爛。事後,西風你唔可以報警拉我,唔可以向法庭告我。原因喺你得罪我在先,我好嬲之下至有咁嘅行為在後!如果你唔得罪我,我就唔會嬲,唔嬲就唔會衝動,唔衝動就唔會吹雞攪事!因此,有咁嘅局面情形,完全喺西風你嘅錯,反而我一啲都冇錯!!】

【仲有,因為打你打得唔夠過癮,所以得閒走去你嘅公司,你老豆老母嘅屋企,你老婆嘅公司,你仔女嘅學校等等地方去攪嘢!你都唔可以報警拉我,亦唔可以向法庭告我,所持嘅理由同動機同前面所提過嘅一模一樣!】

喺咁嘅情況,西風你接受到嗎?會唔會真喺啞忍?抑或同我死過?唔好唔記得,一切事情發生嘅源頭,喺西風你一開始就得罪我在先,咁我至嬲到報復!所以,攪事嘅我冇錯,所以冇罪!呢一切一切,喺西風你自己攞嚟;如果你冇觸動我嘅怒火同情緒,個結局肯定會改寫!

西風聽完呢個例子就覺得好攪笑!如果因為異見存在,就攞嚟做藉口,跟住為所欲為鍾意點就點,豈不是靠惡同靠人多勢眾就話晒事?進一步講,今日你惡過我就蝦我,即喺話第二時我惡過你就可以蝦番你轉頭?西風畢嬲都相信凡事都可以透過傾偈,喺求同存異嘅大前提下,彼此真心實意下,為咗解決件事而作出雙方都可以接受嘅要求或者讓步。

當然,傾偈個基礎在於雙方對事不對人;在於雙方想解決疑慮;在於雙方攞到平衡;在於雙方以大局為重替當事人嘅利益著想;自然就唔會意氣用事去攪彎一切,同做埋一啲唔見得光嘅勾當。

西風個人確立某啲理念:

1.接受時錯都變啱;

2.唔接受時啱都變錯;

3.切忌講一套卻做另一套;

4.講得千句萬句,不及恒持做到一句;

5.每個人要為自己嘅選擇埋單;

6.經驗喺靠痛苦換番嚟;

7.今日剃人頭,明日比人剃;

8.幾惡嘅人,好似水桶滴水咁會滿盈而瀉;

9.儒家講[己所不欲,勿施於人],西風愚見[己所欲,施於人];

0.福唔好享盡,話唔好講盡,艃唔好駛盡,勢唔好恃盡,因為會[物極必反]!

回應 (0)
我要發表
user