九月仍然風高浪急
2019/09/02 04:12:58 網誌分類: 經濟
相比下，美股表現較強，杜瓊斯工業指數上周五喺憧憬中美貿易談判下攀升41點，收報26403點，連續第三日上升，全周升3%；標準普爾500指數升1點或0.06%，報2926點；全周升2.8%；納斯達克指數跌10點或0.13%，報7962點，結束兩連升。不過，三大指數自5月以來首次錄得單月跌幅，亦為今年的第二個單月下跌。
本地政局短期好難平靜
9月份股市如何，中環茶友齊聲話無得估，皆因中美貿易談判和本地政治事件仍在發展中。中美今個月埋枱傾，從美國總統特朗普開始有點焦急的表現，談判可好可淡，不能一面倒預測。本地政局則似乎凶多吉少。過完8.31，跟住就有9.2開學，估計在10.1中國70周年國慶前，本地都好難平靜。
現時本地政局受中美關係和台灣選舉影響。美國總統特朗普再度把香港與中美貿易談判掛鈎。如果中美在貿易問題上談不攏，香港局勢很有可能變得更加嚴峻，就算中美談得好，依然有台灣大選的影響，所以本地政局好可能在可見將來維持不明朗。其中一位茶友話，港股被人打完心口打背脊，點解指數仲有26000點咁高呢？一個好大的技術性原因，係現時藍籌成份股中，好多都係內企，好似股王騰訊（700），主要業務同香港基本上全無關係，其他四大內銀、三桶油等重磅股份，都不會反映本地政治因素，大大沖淡了本地局勢的影響。
另一個重要原因，係現時雖然旅遊、零售受打擊，但這些行業對股市比重好細，重要的金融、地產都仲未受明顯影響。信用評級公司標普就認為，儘管經濟和財務指標惡化，但香港長期評級「AA+」依然獲得良好的支撐，此基於香港經濟的高收入水平、政府龐大的財政儲備，以及經濟的強勁外部地位。不過，如果經濟持續表現疲軟、以及如果財政靈活性和財政狀況結構性受損，香港的強大信用基本面可能隨着時間的推移而被腐蝕。該機構認為，政治風險對港府的信用評級構成了最重要的短期風險，但暫時認為這是不太可能發生的情況。外資暫時按兵不動，所以港股同息口都未有大變，市場氣氛仲係幾平靜。
樓市跌幅仍屬溫和
地產方面，最新公佈的樓價指數再度回落，係連續第二個月錄得跌幅，但跌幅相對溫和。以全年計，樓價仍然有7%左右的升幅，上個星期推出的馬鞍山新盤亦去到貨。樓價未明顯下調，內需仲可以維持。關鍵係未來樓價表現會點，暫時公眾對本地資產價格信心仍然未有好大動搖，願意劈價賣樓的業主仍屬少數，所以股市信心仲未有好大衝擊。
茶友話，投資氣氛變得好快，關鍵仲喺美國手上，若然中美喺新一輪貿易談判談不攏，在選舉逐步逼近下，美國下手會愈來愈重。如果特朗普打起貨幣戰，資金由內地和香港流出，利率推高，樓價就可能加速下跌，股市氣氛就會急促轉壞，所以港股現在好似好硬淨，但如果美國出重手，下跌空間仲可以好快好大。
美股欣欣向榮反而要小心
當然，這個情況係中美談崩之下才會發生，若然中美兩國有進展，甚至有原則性的共識，咁局面就會好轉，股市形勢又會唔同。茶友話，如果美股表現差，特朗普擔心攪局會影響美股，中美關係反而無咁易爆，如果美股一片向榮，咁香港股民就要小心。喺呢種難於預測的政治市，只能講9月股市，仍然好大機會係風高浪急，有錢撈底執平貨無壞，但若然不是銀彈十足，就不要因為大市已經連跌兩個月，回調近3000點就冒進大力掃貨。
增持有啟示 大戶做明燈
港股8月份大跌，不少股份創出新低，吸引大股東開始出手握貨，當中李嘉誠基金已接連動用銀彈增持約長實集團（1113）股份。
李嘉誠基金會上周連續4日入市入貨，涉資約5.7億元，估計周五可能都有繼續出手，連同上周動用4.3億元增持，基金會兩周合計以10億元增持長實。
候郭老太霍大班出手
李嘉誠基金會外，中環茶友視為明燈的大戶還有兩個，一個是新地（016）郭氏家族掌舵人郭老太，以及長和（001）大班霍建寧。新地郭老太在去年10月時曾經出手增持股份，當時李超人剛出手增持了長實，她就加入買貨行列，入貨價為111元左右。上個星期新地跌到111.1元，從時間和價位睇，已經相當接近上次出手的條件。過去郭老太入市賺錢機會好大，究竟她會否在短期出手，抑或再等局勢較為明朗呢？
一向較少出手增持的霍大班，在今年5月份曾經連環出手買入長和股份，在李超人增持長和後，霍大班仍然未出手。早前出手時，長和股價大約在74元左右，上周長和收報68.3元，本來更加抵買，不過，英國首相約翰遜賭一鋪，不惜叫停議會以硬脫歐作為談判籌碼，正因為這個原因，令長和股價蒙上不明朗因素。
陸羽仁
回應 (0)
我要發表