爭取文字記者權益協會

在facebook上有一個group，叫做「爭取文字記者權益協會」，當然，這種「協會」功能存疑，頂盡可能都係搞下網聚咁。group裏有些人會轉貼文章，不外乎講文字傳媒收入有幾低之類。

然而，看一看members一欄，發覺很多年輕人，話說得不多，但至少說得有文有路。

須知道，網上有些「小圈子」討論區，去過就知嚇親人。唱衰、發癲，純粹文字發洩，粗口多過正常字。再去「副刊小圈子」，仲得人驚，你會發覺全港副刊記者唔知點解都是做風月版的。在那種已經淪落的地方，人氣依然有，因為總會有人需要發洩XYZ。然而，在facebook那個沒用協會的名單中，一張張照片，都是挺「純情有格帶點倔和個性」的面孔，也就是我見慣了的那種。畢竟，在我接觸過的記者，特別是副刊記者之中，還是斯文有禮兼有taste的多，

也是窮的多。

做記者無乜錢途，做副刊記者更是窮霸，可以做十幾年，搵萬鬆d（衰過fresh grad）。做飲食版可以名正言順食人d野，慳番少少「食」；做IT版的穿得像電車男乾物女，可以慳番少少「衣」；做風月版既……唔知啦，未做過；做fashion and beauty就慘咯，一樣係搵萬鬆d甚至幾千，但一個二個將成份糧擺晒上身，名牌行頭勁過sales，查實有苦自己知。

或許，就是那個「副」字，令副刊記者的薪酬，成為廉價中的廉價，仲要求神拜佛不要遇到敗報呢類PK老闆。所以，做了七年副刊的我，婚後都要忍痛轉做港聞，叫做好少少，有d前境咁。唔多，叫做有。

儘管，我喜歡做副刊。那種無拘無束，那種可以讓文字與圖片飛舞於紙上的感覺，好令人回味。