維園中秋綵燈會佳節打卡好去處

2019/09/13 04:12:26 網誌分類: 生活

13 Sep

        　　今日就係中秋佳節，人月兩團圓，Kelly有賞月嘅好地方推介畀大家，仲係免費入場㗎！維多利亞公園一號足球場將會擺置光影裝置「千願亭」，其設計意念取材自南中國嘅燒火塔嘅傳統習俗，展亭嘅外牆由回收塑料升級再造成約五千磚塊建成，並加入LED燈，成為一盞盞亮麗嘅燈籠，小妹覺得係超級正斗嘅打卡地點，一定可以同你心愛嘅人留下美好嘅回憶。另外一個亮點，係金龍綵燈，突破咗慣常嘅造型，營造金龍飛舞翻騰嘅景象，展示傳統紮作嘅精湛技藝，又係selfie嘅熱點。

        　　新界亦有精采嘅綵燈會，今日喺沙田公園同荃灣公園都舉行綵燈展覽，方便新界區嘅市民歡度佳節。另外，大澳亦有過千個手繪燈籠會掛喺大街、河涌之上，為節日增添氣氛。Kelly提提大家，喺慶祝中秋節期間，記得唔好煲蠟，仲有要保持地方清潔、愛護公物同環境呀！

        Kelly Chu