暴力「私了」 不能接受！

喺剛過去嘅周末，一班暴徒例牌將示威升級成為暴力衝突，行動越來越無法無天，除咗襲警、搶槍、縱火同向警車掟汽油彈之外，大家仲見到其他動魄驚心嘅畫面，就係一個又一個市民被暴徒「私了」，瘋狂圍毆暴打，甚至即使血流披面都要繼續打落去。廣男認為，呢種濫用利刑嘅歪風越嚟越嚴重，如果執法部門唔嚴厲執法，社會大眾唔發聲阻止，咁香港肯定會步入「誰大誰惡最正確」、由暴徒「管治」嘅黑暗時代。 

 最少五人被圍毆、浴血

 廣男睇新聞，見到喺日前嘅元朗流血衝突當中，最少有五人被暴徒殘暴襲擊，當中最令人心寒嘅，係有兩名男子同示威者、暴徒起爭執，繼而被大批暴徒圍毆，兩人被打至血流披面，就算有鏡頭影住暴徒施襲都好，啲暴徒都仲要出「連環拳」打人，甚至有女暴徒用疑似鐵架嘅物體趁機襲擊其頭部；事後被襲人士向記者表示香港咁樣令佢「想死」，仲要有在場人士問佢做乜「唔自殺」，亦有人涼薄地稱都未打死人，「未算犯法」，是非觀念扭曲得令人心寒！ 

 另一邊廂，喺元朗有一男子被懷疑破壞暴徒嘅文宣，結果又落得被以眾凌寡、襲擊嘅「下場」，被襲男子就算想乘的士離開，一班暴徒仲要包圍的士，強行拉被襲男子落車，然後再打到該名男子頭破血流。連同另外兩名喺元朗被襲嘅嘅人士，單單喺元朗，一晚之內就至少有五人被暴徒「私了」，情況令人極度憂慮！  

 無法無天 漠視法紀

 老實講，一班暴徒嘅行為，可以話係無法無天、目無法紀，其實之前已經不時出現市民被暴徒襲擊嘅事件，依家單單喺一晚、喺同一地區，就有幾宗市民被暴徒襲擊嘅罪案，如果市民接受呢種暴力嘅「私了」事件，咁社會以後就肯定唔再需要法律、法治；只要有不同意見，暴徒、示威者或者其他人也好，有咩事自己用武力解決問題就得喇，名符其實「誰大誰惡誰正確」，有人若果弱不禁風、寡不敵眾，好抱歉，邊個叫你唔夠人「強大」，所以被襲、被欺凌，都「無得怨」！  

 當一班示威者、暴徒不斷聲稱自己要捍衛自由、爭取民主嘅時候，廣男覺得呢班人所做嘅事實在十分矛盾；難道佢哋要爭取自由，就可以傷害他人、剝削他人嘅自由？難道因為意見不同，其他人就要犧牲、失去免於恐懼嘅自由？如果一班反政府人士要嘅民主、自由係咁樣嘅，廣男諗呢種民主，真係無乜人想要！至於佢哋稱因為7.21衝突、警察問題所以令佢哋施暴，對唔住，暴力就係暴力，如果有「理由」就可以施暴，咁法治社會都會變成「暴徒社會」，大家如果真心愛護香港，一定要發聲制止，唔好助紂為虐。 

原圖：文匯報