《放寬按保：醫生律師買到樓了》

如果你攞到七粒龍珠，叫到隻神龍出嚟許願，但係d龍珠被黑能量污染，條神龍壞Q咗，願望要10年後才實現，你會乜嘢願呢？

2010年，前前特首曾蔭權在電台上被一個醫生質問，點解樓價咁高，佢同律師朋友買唔到樓。曾特首回應大西北仍有很多$3000-4000/呎嘅單位可供選擇，也會大力打擊炒家壓抑樓價上升。

此後，政府推出多項樓市辣招。炒家沒有了，剩下只有自用和長線投資者的市場結果如何？政府房屋政策缺失固然很大，不過個人認為那個醫生亦應該為自己不負責任的幼稚言論感到羞恥，而相信如果佢無及時反省，應該已承受了惡果。

沒想到10年過去，那位醫生當年的願望竟然迎來政府遲來的實現。800萬以下9成按揭，1000萬以下8成按揭，壓測如不能通過可加少量保費代替，仲可以分攤30年。不過時至今日，呢位醫生應該都唔會買了。

水已吹，咁講下新招影響啦，唔廢話了，point form列出如下：

1. 現時500-800萬的2房及3房物業走勢跑贏

2. 400萬以內物業、納米樓（少於300實呎）和1000萬以上物業跑輸

3. 對於現價600-1000萬物業業主而言，只要有足夠收入證明，就能將自住物業透過內部轉讓套現8成市值，估計買咗樓5年以上的朋友至少能套現200-400萬不等。無可避免會令市場錢更多。呢股購買力買唔買就睇市場氣氛，但流動性更高就一定。

4. 能力達到要求水平的買家唔再需要為發展商高成數二按而焗買新樓，選擇闊咗。

5. 由於現實住到人嘅樓（至少2房甚至部分平價3房），大多處於400-800萬區域，今次欠缺首期的上車人士唔洗為9成按揭焗買納米樓。

6. 平時注重生活品質而犧牲了儲蓄的中產朋友，因為1成首期都ok，也有機會上車。

7. 今次我會視為泡沫市的起始點，因為壓測能用保費代替的安排以及放寬高成數按揭，無可避免會令一些能力不合資格的人士上到車，從而中期產生危機，但放心，不是現在。

8. 有好多人未留意到林鄭宣讀施政報告關於房策的最後一句「後者（1000萬8成按）同樣適用於樓換樓」。呢句其實救咗一批數年前買600-1000萬新樓，取用咗發展商高成數有毒按揭嘅買家。今次佢哋有機會將樓按回歸銀行體系。

9. 請注意，今時今日政治市大於一切，只要有壓倒性的政治事件，影響會大於以上一切經濟因素分析。諸位自求多福了。

4年半前我做咗一個樓價首期對照表，到今日，佢終於可以完成歷史任務退休了。

不過我唔打算再做新嘅對照表了，幾年過去，我亦進入了另一個階段，有其他更重要的事等住我去做去投資。

下次再見。