十條命都唔夠死（股樓篇）
2019/10/20 09:29:24 網誌分類: 經濟
註：《十條命都唔夠死》喺一個未完成嘅系列，早前已經發表過三篇。由於我會轉到呢個平台繼續，所以果三篇舊文，會重 PO 上嚟俾大家參考，今日就 PO 住第一篇先。其實，就算喺已經睇過嘅朋友，或者都可以再重溫一下。有啲理念、想法、道理，喺恆久不變，經歷時代、環境嘅變遷，唔單止唔會過時，仲可以有更深嘅體會。
原文日期：2019年4月15日
所謂，光陰似箭，唔經唔覺，告別資深會員專欄，都已經有一年零兩個多月，其實呢段期間，我又唔喺完全冇寫嘢嘅。我出過兩篇文章，第一篇，喺半年前嘅《致香港工程師學會的信》，由於喺一封公開信，所以破例放咗上專欄。而第二篇呢，就喺俾 72/F 形容為「散文」嘅《約定》。
再談買樓嘅對錯
近呢一年，我除咗間中返嚟回應箱，睇下有冇人揾我麻煩之外，都已經好少上呢個地產網。既然今日有 MOOD 寫少少嘢，梗喺先 SCAN 下呢度，有乜嘢題材，點知，原來又喺啲樓價升升跌跌、好淡互片之類嘅悶蛋嘢。不過我覺得「悶蛋」果啲，唔知點解，從來都喺大眾嘅焦點，恆久不變。話說，最近汪生出咗個題為《未來 18 個月樓市升 30%》嘅訪問，即時惹起全城熱話，湯生第日就跟手寫咗篇《樓市可以立刻上升 30%》，仲寸爆業界所謂評論員，贏果陣大吹大擂，輸就話乜嘢「假跌」喎！幾日後，汪生可能想為自己嘅言論降下温，於是就出咗篇《樓市升完一樣會跌》，叫人唔好因佢過往嘅準確而盲目追隨啦，但文中亦有強調「真升」呢個詞。之後我又見湯生响《真相是最重要》一文中，重提 18 個月內上升 30% 嘅言論，仲話有人同佢講，樓市喺「真升」唔喺假升，叫佢唔好唱淡樓市添。
有時睇下啲磚家博弈，你一言，我一語，都真喺幾富娛樂性。不過希望大家明白，我唔想收律師信，所以一定要鄭重聲明，上一段提及果兩位磚家嘅言論，好大可能只喺各自表述，互相之間喺冇任何關係嘅。所謂博弈，都只喺我自己假想出嚟啫！其實，升升跌跌，真真假假，真喺咁重要咩？如果有磚家睇錯市，有讀者做錯決定，咁錯嘅，就一定喺讀者自己，而唔喺磚家。你買樓唔買樓，睇嘅，喺你自己嘅需要同能力，唔喺睇啲磚家點估個市。如果有任何人問我點睇，我都只會拋返我告別篇呢一句出嚟：
《後市樓價究竟喺升定喺跌，從來都唔應該作為用以衡量今日買樓決定是否對錯嘅標準》
以上呢一句，比任何樓市評論更重要。記得我以前曾經話過，過份聚焦樓價，只會令市場原來嘅走勢，去得更急，真心想樓市降温嘅話，唔喺去唱好，亦唔喺去唱淡，而喺乜都唔好唱，當佢透明。如果啲市民大眾，對樓價嘅升升跌跌、好淡嘅互片，都喺同我一樣咁，覺得「悶蛋」嘅話，個樓市就唔會咁波動。不過現實歸現實，要大家當個市透明，當然喺冇可能。就睇最近有報導話，依家嘅港樓，貴絕全球，平均都要近 K 萬。呢份報導出咗之後，我彷彿幻聽到，全港各區，都充滿著慘叫聲。我冇誇張，真喺慘叫聲，唔信？你可以 GOOGLE 一下，睇睇啲報導同一眾嘅回應點寫。
磚頭嘅緣份、租樓嘅命格
其實我有啲唔明，港樓貴絕全球，算乜嘢新聞？好似唔飲唔食幾多年啲咁嘅廢話，都唔知聽咗幾多年，有乜咁新鮮？你有你個市升升跌跌，我有我嘅生活同忙碌，如果你唔喺短期內要買樓，咁呢啲噪音，又關你乜事？但如果你真喺想買樓嘅話，咁就唔該你親身落區巡視一下啲放盤，唔好懶到淨喺識得睇埋啲乜叉報導同聽埋啲乜叉磚家亂吹。全港十八區，住宅物業，有新有舊，有大有細，高層低層，有海景、山景、路景、樓景，唔同間隔、用料嘅質素等等。消費者有權選擇，唔好俾啲 AA 誤導，思考清楚，自己實際上需要啲乜嘢，能力方面，首期上、供樓負擔上，得唔得。睇唔啱嘅，又或者能力上唔適合嘅，就下回請早。買樓唔喺買菜，切忌心急，個盤走咗，即喺同你無緣，今次攞足經驗，下次就更加識得揀，個轉數仲會快啲。能力範圍內嘅，買貴咗，唔算笨，買錯咗先至喺笨。
有人話，買樓，就算為自住，都喺一項重大嘅「投資」，一定要做足功課喎！但如果你嘅所謂「功課」，唔喺我上一段講果啲，而喺好似買股票咁，走去搜集埋啲經濟、市場數據，評「估」一下個後市，「估」計一下個 TIMING 啱唔啱，喺唔喺入市嘅最佳時機，咁我諗我唔使睇你個相，都知道你喺乜嘢命格。我可以好肯定咁同你講，你同磚頭無緣，所以你未買樓果陣，啲樓價會喺咁升，到你呢頭出手買咗呢，果頭個市就會跌，到時候你梗喺會自作聰明，諗住「止蝕」沽咗佢啦！但你唔沽由自可，呢頭沽，果頭個市就升返。
哈哈哈！喺咪俾我批中哂呢！不過唔緊要，呢個世界，總有人買樓，亦總有人租樓。既然你同磚頭無緣，夾硬要你買，都只喺會害咗你，倒不如一世租樓住就算。做人，最緊要開開心心，所謂，天下之大何愁無處容身，何必咁執著呢？
不忘初心
本來今次返嚟，冇諗過寫磚頭嘅，但結果都喺忍唔住寫咗一大堆。我話覺得「悶蛋」啫，轉個頭，又話幾富娛樂性，做人，有時都幾矛盾。72/F 話，想睇鴻文，唔喺散文，其實我真喺唔知道，點先至算鴻文。我寫嘢，從來都喺諗到乜就寫乜，大眾嘅口味，我唔太關心，THAT'S WHY 我唔會喺一個成功嘅專欄作家，告別專欄，果然喺一個正確嘅決定。
講到成功嘅專欄作家，响呢個網站，當然喺非湯生莫屬啦！記得當年，一篇《細價樓將會在三個月內爆煲》，令到湯生响一夜之間爆紅，之後出報紙專欄、出鏡接受訪問、做節目，最近仲响 TVB 見到湯生現身耀才嘅廣告入面添。所謂，成功非僥倖，有得必有失，但相信湯生所得嘅，一定比佢所失嘅多。雖然我見湯生，不時話自己「被人鬧」，但我又唔多覺佢成日俾人鬧喎，或者多得呢個網站嘅「鏡子」功能，啲過火言論都已經被禁哂。
其實，今日湯生有名有利，亦不忘初心，肯响呢個網站，每日出幾篇文章，都已經算喺咁，大家真喺唔應該苛求太多。我既唔喺湯生嘅讀者，更加唔喺佢粉絲，但都好佩服佢嘅恆心同耐力。日日寫文，可以有乜題材？只能就當下嘅時事，或者就身邊發生嘅事情，寫下意見，舒發一下感受，而呢啲意見、感受，隨心而發，每日都可以唔一樣，甚至會有矛盾。就算今日，覺得個市會升，咁聽日呢，又可以覺得個市會跌，有乜咁出奇？總之呢一刻，喺真實嘅感受，下一刻，個感覺唔同咗，一樣喺咁真實，又冇呃人，有乜問題？所以我認為，大家對湯生嘅文章，以及對其他評論員嘅文章，都應該抱住同一個心態，就喺當「散文」咁去睇。各位睇嘅，其實都喺散文，散文當明燈嘅話，就真喺十條命都唔夠死啦！
十條命都唔夠死
記得一年前，湯生寫過一篇《匯豐150元不是夢》，話保守估計，匯豐三年內可以去到 150 蚊。之後佢仲舉咗一對年輕夫婦嘅例子出嚟，話佢地將本來打算買樓自住果千二萬首期連印花稅，全數入哂匯豐，收息交租好過買樓。如果你問我，點睇呢對夫婦，好簡單，佢地就正正喺我早前提過嘅果種「命格」，同磚頭無緣，只能夠一世租樓。不過都喺果句，有財有息，NO PROBLEM 嘅，天下之大何愁無處容身嘛！ 大家唔好誤會，我舉呢個例子出嚟，絕對唔喺要潤湯生，反之，我喺想趁呢個機會，為佢講返幾句公道說話啫。因為當時的確有啲朋友，對佢果兩篇文章，非常不滿，話點解作為磚家，竟然叫啲準上車人士唔買樓走去炒股。要知道，香港喺一個言論自由嘅社會，每個人都有發表個人意見嘅權利，冇人叫你盲跟。如果你睇咗湯生嘅文章，唔經大腦就走去瞓身入匯豐，到依家都仲未返家鄉嘅話，咁喺你自己傻仔，關湯生乜事？再者，只喺過咗一年啫，家陣仲有兩年，邊個夠膽死話，匯豐上唔到 150？有賭未為輸嘛！
仲有，當時湯生真喺親自大手咁入咗貨，證明佢唔喺老點跣啲讀者，呢方面，球叔可以做證。佢話湯生响星期四，即喺 3 月 1 日早上，入咗約 200 萬股匯豐，而當日嘅最低價喺 77.15，即喺現金值約 1.5 億港元。球叔所講嘅，應該喺真確，唔喺就已經收咗律師信啦！嗱嗱嗱，1.5 億，呢啲就喺叫做 SCALE，你冇咁嘅實力走去跟，就真喺十條命都唔夠死。
坦白講，當時中美貿易戰，正正喺開緊波，眾所周知，個股市唔會有運行，我都覺得有啲奇怪，點解湯生會响果個時候，走去入大藍籌。ANYWAY，始終喺人地嘅私人投資，唔太方便評論。只喺匯豐呢隻嘢，加埋 2018 年咁波動嘅市況，令我聯想起，當年嘅青姐。有人甚至响 YOUTUBE 上咗個《匯豐狂潮》添，睇完只覺唏噓，皆因 5 號仔，對於好多香港人，細至師奶阿叔、大至富豪級，心目中，都有果份情意結。記得上次匯豐跌到 50-53 果陣，我打咗個比喻，話假設有個聯「匯」機制，保證匯豐嘅股價，低唔過 50，高唔過 100，結果當時個最低位，守住咗响 44.5。今次匯豐由 60.35 嘅低位跟隨大市反彈，都叫做升返咗啲，但仍然喺跑輸大市，或者喺 UNDER 英國脫歐嘅陰影啦。不過如果英國，真喺硬脫歐嘅話，匯豐 50 元，可能真喺不是夢！
匯豐狂潮
題外話，我又揾到青姐另一段 YOUTUBE 片，解釋佢點解要喊，片裡面竟然見到，老 C 個嘜頭喎！又令我諗起最近湯生一篇《老C一年內會不會復出》嘅文章。中原作為全港最大地代，人地退唔退休，點會喺為咗啲乜 Q 牙骹戰咁兒戲？所以話，睇散文，唔好太認真，仲要將散文當明燈嘅話，就真喺十條命都唔夠死！
贈慶、贈言
真喺唔好意思，認識我嘅人都知，股票呢家嘢，我從來唔 BUY。咦？磚頭，我話「悶蛋」，股票，我又唔 BUY，咁即喺點？即喺話，寫完一大抽嘢之後，都仲未入正題囉！
記得八個月前，有 FACEBOOK 網友請我分享一下貿易戰之下香港及中國嘅前景，我話須要考慮一下，呢度又有人話，等咗我成年。睇嚟，真喺唔應該再拖，不過，再一次唔好意思，因為呢個前言，實在寫得太長，我要稍作休息，下一篇至開始入正題。
話時話，《十條命都唔夠死》呢個主題，都真喺幾衰。但希望大家明白，淡市寫衰嘢，即喺贈慶；好市寫衰嘢呢，就喺贈言。近排個市都表現得唔錯，恆指重上三萬點，從舊年十月底嘅低位，已經反彈咗超過兩成。如果你手頭揸住隻唔知乜股，升得果兩成幾，就以為自己揀中咗件荀馬，咁你未免開心得太早。李澤鉅話，外圍風大浪大，但從來，股市都喺首當其衝，而樓市只喺守尾門。與其咁擔心個樓市，倒不如先擔心一下個股市啦！
自 2008 年金融海嘯以嚟，香港再冇經歷過，真正嘅金融風暴，大家究竟知唔知點解？話說，陳總十月退任，關於佢嘅功過，坊間都喺聚焦埋啲乜嘢「逆周期措施」，而林奮強仲更加話，金管局有負香港人，抵鬧添！我諗各位搞錯哂，金管局嘅全名，喺「金融管理局」，唔喺「樓市管理局」喎！
其實，如果唔喺多得金管局，真正嘅金融風暴，早就已經嚟咗至少兩次啦！
（待續 ...）
在這邊繼續支持珍港兄，有時間請多分享宏觀經濟的看法。