綠色浪費

#綠色和平
#取消每月捐款
#環保

抗暴力醫護同盟

綠色和平，估唔到你哋為左嘩眾取寵，家陣連醫療顧問都做埋之餘，仲要係冇證冇據，化驗都未有結果下就 ’估計’ 啲籃色水成份出嚟，講到真嘅一樣，仲指出埋各種後果喎！咁到底係藍色水裏面冇呢啲成份，你間化驗所太渣，所以連你指定嘅成份都化驗唔到出來，定還是一切都係貴機構老作呢？ 

其實你哋一向主打環保問題，冇理由睇唔到成個政治運動嘅其他唔環保嘅現象㗎？唔通你哋嘅小編對眼呢個月又係肓左？ 

綠色和平香港發言人，我哋呼籲你哋，如果要就香港這幾個月嘅政治活動表態嘅話，都麻煩你哋講多幾句環保問題，去貫徹你哋嘅環保任務吖。

為咗避免你哋一時語塞同詞窮，譴責同發表嘅內容，我都幫你做好左啦！

1)香港嘅示威者，麻煩唔好再喺地鐵站燒雜物及發泡膠啦！燃燒嘅雜物同發泡膠會發放出大量不能盡列嘅有毒成份及刺激心肺以及眼睛嘅毒氣，影響呼吸系統健康。再者，喺市民密集嘅地方以及住宅大廈，使用火水去製做燃燒彈以及去商店銀行縱火，一切因燃燒造成嘅氣味成分以及多餘嘅有毒氣體，都會直接進入大氣層及附近市民嘅肺部，嚴重影響健康，足以誘發哮喘甚至化學性肺炎㗎喎！其害處比起綠色和平提起嘅催淚溶液有過之而無不及，連唔係暴徒嘅人都被波及，避都避唔到㗎！ 

2)麻煩各位示威者停止使用大量紙張以及大量用高級墨水印製嘅文宣圖片於連儂牆四處張貼吖，一來呢D宣傳物品內容無聊，破壞城市景觀，二來宣傳過程除咗增加伐木及耗用大量黏合劑之外，正常市民將佢哋清除之後，亦因為紙張佔有大量黏合劑而無法做到廢紙回收，無形中就製造左極大量嘅垃圾，增加香港垃圾堆填區嘅負擔！你哋要繼續玩，就麻煩使用電子文宣途徑啦！ 

3)請各位示威者停止使用噴漆寫字及攻擊市民。要知道噴漆嘅過程會將大量揮發性有機物散播到空氣之中，清理嘅過程又要使用另一些化學溶劑，嚴重影響使用人士以及受害被私了之人仕嘅呼吸系統，必須將之取替。如有必要，我哋建議示威者改用墨魚墨汁呢一類天然成份，減少對大氣層造成負擔。 

4)大量示威者美其名為商舖進行裝修而造成刑事毁壞，結果商店又要重新裝修先可以繼續做生意，無形中製造咗大量裝修廢料，將各種物料嘅壽命縮短，實在非常之唔環保。因為我哋唔建議任何刑事毁壞嘅行徑，所以係呢個範疇上冇其他取代嘅建議。 

5)大量示威者，因為示威物資唔使錢自己買嘅關係，經常將一啲完好無缺嘅物資當為一次性嘅產品四處丟棄，毀屍滅跡，其中包括各種嘅大小雨傘啦，安全帽啦，包着身體嘅保鮮紙，以及隨時隨地換咗就丟棄嘅黑衫黑褲等等。以上次示威者衝擊機場之後，沿着青嶼幹線 ’沿途脫皮’ 為例，浪費嘅現象由示威裝備被大量拋棄，垃圾延綿數公里嘅情況可見一斑！唔該綠色和平提醒示威者，拒絕一次性，將所有示威物件回收重用，玩完之後帶返屋企，再進行廢物分類，親身攞去各地區嘅 ’綠在區區’ 呀唔該！ 

最後，我哋未知 ’嘥米飯’ 是否等同燒毁亞馬遜森林去飼養牛隻一樣不環保，但部分公家醫護人員收公帑做「政治鬥爭」工作，浪費納稅人嘅金錢，其實等同 ’嘥米飯’ , 雖然我哋唔係環保組織，我哋都要求醫管局可以從環保角度，將呢啲嘥米飯嘅員工辭退，減少浪費政府資源。 

綠色和平，你哋有冇補充？