炒股眼光要離開香港
2019/11/04 04:12:59 網誌分類: 經濟
選舉年效應 香港難感受
特朗普這樣不滿完全可以理解，為了減低國會彈劾壓力同爭取連任，他不斷努力放出討好公眾的消息，包括喺美軍打死伊斯蘭國領袖後，繪形繪聲形容對方死前大哭大叫的場景，連美軍指揮官聽到都話無法幫手，因為係引爆自殺式炸彈前，無人知道發生甚麼事。特朗普講到咁逼真，無非係滿足選民的好勝心，總統去到咁盡，但央行行長至少表面上就不是太配合，他自然火氣大盛，鬧到出面。
特朗普發火猛轟，能否影響美息走向遲點揭盅，但至少對股市情緒有幫助。在總統發火打氣下，標準普爾500指數同納斯達克指數齊創收市新高。杜瓊斯指數收市報27347點，升301點，升幅1.11%，只差12點就創收市新高。
其他兩大指數，納斯達克指數報8386點，升94點，即市高位見8386.75點。標準普爾500指數報3066點，升29點，即市高位見3066.95點。過去5個交易日指數3次創收市新高。總結一周，杜指升1.4%，連升兩周；標指升1.5%，連升4周，為2月以來最長升市；納指升1.7%，連升5周。
美股喺全球放緩下創新高，其實已經炒緊選舉年效應。過去美股通常會炒選舉年政治效應，總統為求連任全力催谷。特朗普雖然行事難測，依然走不開這個傳統，甚至做得比其他人更加出力，美股能夠屢創新高不是沒有道理。不過，香港受內憂外患衝擊，投資者信心不足，就好難感受到這種牛市氣氛。雖然係咁，但上周美國減息後，港銀都跟減0.125厘，雖然減幅似有若無，但大方向反映利率向下，資金應該追入股市投資，所以最後一個交易日大市雖然低開，最後仍能企穩二萬七大關樓上收市。恒指收造27100點，全周升433點。內地IP遊戲營運商中手游（302）上市後翌日落鑊熱炒，收漲20.42%，報3.48元，成交額10.48億元，居成交榜第10位。
中小企老闆 喊得一句句
港股喺減息後氣勢同外圍差一截，主要係本地經濟差勁，公佈出來第三季按年大跌2.9%，按季更收縮3.2%。多間大行齊齊唱淡前景，香港經濟可能仍未「見底」。 高盛、美銀和摩通紛紛降低本港經濟增長預測。其中，美銀對全年經濟看得較淡，料全年GDP按年收縮2.1%，較原先預測低兩個百分點。
本地經濟無運行，最慘係中小企業。中環茶友講起，上星期特首林鄭月娥出席總商會活動，有個中小企講起目前困境，政府幫唔到手，境況令人動容。茶友識得個中小企老闆，生意本來做得不過不失，多年下來開了幾間分店，收入叫做好過打工小小，點知突然一個大浪冧過來，幾間分店全部蝕錢，捱了幾個月手頭資金已經清倉，他估計聖誕前後就彈盡糧絕，但暫時仲看不到暴亂會幾時平息，心情已經得愈來愈絕望。
中小企經營順景時擴張，老闆見開一間分店就多一間賺錢，手頭現金用來交上期付裝修，周轉現錢不會太多，過去五個月不斷虧蝕，而且衝突變了游擊化，平日經常要走鬼，港鐵又提早關門，試問點樣做生意。他慨歎現在好多出來示威抗議者都係學生或者係打緊鐵飯碗，根本不知小生意人的壓力，所以他對前景看得好悲，認為到了明年初，倒閉同賣樓潮就會爆發。
5G股藥股同本地無關
中小企老闆喊得一句句，不過，港股現在不是反映本地經濟，而是看中國以至全球。好似上周五，內地5G商用正式啟動，5G股就見資金追捧。長飛（6869）、中通服（552）、京信通信（2342）都抽升，未來5G消息未完，股價有可能炒上炒落。藥股近月都係熱炒板塊。百濟神州（6160）獲美國安進藥廠（Amgen）購入逾2億股，總額約27億美元，股價單日飆32%收報110元。茶友找過百濟神州的簡單資料分析，公司主要做標靶藥物，雖然掛牌以來無賺過錢，但係美國食品及藥物局的認證就不斷過關，投資價值普通人真係好難拆解，直至終於獲得美國大藥廠垂青高價入股，股價先至爆升。這些股份基本上同本地經濟無關，香港點亂都不會影響這些公司運作，所以美國減息，香港跟住炒一輪放水，但投資者邊走邊炒，著眼點都係要稍為離開香港一點。
王維基為太太慶生 請齊城中叻男人
有「電訊魔童」之稱的王維基一向愛搞點子，一年前他迎娶了商界美女、總商會總裁袁莎妮，上個星期仲係君悅酒店搞了個生日兼結婚周年的驚喜派對，派對上仲大賣口乖，高呼「老婆我真係好鍾意你！」大家拍手之餘，終於明白為何有女強人作風的袁莎妮喺約滿後不再續約，專心做王太。
當日的驚喜派對只請四圍，主要係至愛親朋，當中再落場跑馬仔的熱門，西九管理局主席唐英年同前財政司司長曾俊華，仲有自由黨榮譽主席田北俊、行政會議首席陳智思。唐、曾、田幾位過去都曾經做過袁莎妮老闆，在現在政圈風雲幻變下，又再成為焦點。魔童話，他們都是太太口中的「叻男人」，所以要他們一齊來捧捧場。
王維基除了請了「叻男人」做賓客外，仲預備了支九公升的巨型香檳慶祝，又為每位嘉賓特別預備了一個TIFFANY玻璃紅心做枱禮。出席的男士去完之後，都話魔童搞派對同做生意一樣，將個標準提到咁高，實在有「做爛個市」之嫌。
陸羽仁
回應 (0)
我要發表