樓市唔驚衰退驚水乾
2019/11/18 04:14:01 網誌分類: 經濟
阿里招股餐會要取消
同港股比，華爾街近日真係牛氣如虹。借於商務部長羅斯話，中美「極有可能」達成協議，美股氣氛大為好轉，三大指數周五開市即創新高，齊以全日最高位收市。 杜瓊斯工業指數上漲222點，報28004點，此消彼長下，已遠遠拋離恒指近1700點。標普500指數上漲23點，報3120點。納斯達克指數收高61點，報8540點。三項指數均創收市新高。
杜指已連漲4周，標指更連漲6周。今年初至今累計，杜指上漲20%，標指攀升24.5%，納指則抽高29%。大市急漲下，各類型股份幾乎都向好，對貿易戰敏感的Caterpillar、波音、蘋果等重磅股升逾1%，蘋果及微軟、Alphabet、迪士尼、沃爾瑪、應用材料均見歷史高位。
美股升得咁開心，在美國掛牌ADR都略為造好，預示恒指周一高開75點，報26402點。在港招股阿里巴巴 （BABA-US） 周五股價上漲 1.53%。不過，內地媒體引述消息人士指出，管理層出於對物流和安全的考慮，決定取消本來的午餐會，改為透過視像電話舉行這次的香港IPO投資者會議。
美國欣欣向榮，作為貿易夥伴的香港卻幾乎感受不到良好氣氛。根據政府公佈，本港第三季經濟按年收縮2.9%，與10月底公佈的預先估計數字相同，是10年來首次錄得按年跌幅；經季節調整後第3季經濟按季下跌3.2%，同樣與預先估計數字相同，顯示香港經已步入衰退。考慮到經濟在今年首三季實際收縮0.6%，以及下行壓力持續增加，將今年全年實質本地經濟增長預測，由8月覆檢時的0-1%，下調至負增長1.3%，是09年以來首次出現年度跌幅。
港府大力調低經濟預測
從預測下調的幅度，反映經濟下滑速度相當之快。 本來，11、12月份係消費的高峰期，基數相對較大，然而，過去一個星期市面急劇惡化，不但港鐵受影響，連巴士都無法正常行車，不少國家進一步提高香港的旅遊警示。由於現時距離聖誕只有1個月，相信海外及內地遊客都不會來港度假了。不少商戶本來諗住捱完聖誕後再決定做唔做落去，現在結業潮有可能提早到來，所以政府大幅調低預測應唔係靠嚇。
經濟前景不樂觀，但樓市卻不跌反升。代表二手住宅樓市走勢的中原城市領先指數（CCL）最新報182.1點，按周升1.5%，升幅為29周最大，並連續上升兩星期。當中大型屋苑領先指數CCL Mass報183.66點，按周升1.8%，升幅為84周最大；CCL中小型單位指數報182.28點，按周升1.77%，升幅同為84周最大。三大整體指數齊升兩周，CCL Mass累升2.18%、CCL中小型單位指數累升2.04%及CCL累升1.73%。
中原指數主要反映二手樓表現，指數上升相信係《施政報告》放寬上車盤按揭的效應反映。由於政府容許首置人士按揭成數可以增加，不少儲首期儲了多年的用家急急上車，推動了二手樓反彈。陸羽仁同發展商高層傾起，他對前景就不算太樂觀，話現時新盤開售仍然賣得，但都要睇樓盤類別同地點，熱門地點的細單位銷售無問題。如果地點較為偏軟，銷情就不會太快。如果經濟前景繼續惡化，新盤銷售可能就會放慢。
兩大因素撐住樓價
雖然市面立立亂，地產股受壓，但同98年亞洲金融風暴時比，地產股大跌7、8成比好得多。高層話，地產股今次抗跌力咁強，主要有兩條大柱撐住，一係供應有限，未來幾年土地都無法增加，係呢個想法下，業主都不急於套現，減少了下跌壓力。另一個原因係低息，喺98年金融風暴時，由於聯繫匯率被狙擊，隔夜息曾夾高至300厘，一挾之下銀行成為驚弓之鳥，成個市場又水乾，樓市跟住就碌低，所以樓市最驚就係乾水。高層話，香港人底子厚，經濟衰一陣無問題，對樓價影響未必好明顯，但如果香港的利息抽高，或者見到資金大量外流，咁業主同地產股投資者就唔可以咁老定。
又一城聖誕樹 打卡手慢已被焚
近日商場成為衝突熱點，擁有不少商場同收租物業的太古系輪流創出一年新低。上個星期位於九龍塘港鐵站的又一城，更被打到溶溶爛爛，需要全面停止營業一段時間，成為受創最重的大場。這個商場太古已經出售多年，但好多人都仲未知，以為係太古屬下物業。
一早賣咗畀星基金
其實，太古早在2011年已經出售又一城給新加坡基金豐樹產業，只是好多人無留意，一來因為新買家作風低調；二來係當年交易後，聽聞管理商場的原班人馬幾乎全部過檔，所以風格無點大變，如果無細心留意，就未必知道轉了業主。
自6月爆發警民衝突後，不少商場都出現人群聚集和破壞，又一城卻一直相安無事，直至最近一、兩個月才開始多了黑衣人聚集。
有中環茶友話，今年好多商場都縮減聖誕裝飾，又一城未知是否覺得相對事態無咁嚴重，所以早前一如既放擺設大型聖誕樹。雖然今年聖誕樹看來比較簡單，但茶友都提前影相打卡，點知跟住無耐棵樹聽講已經被焚，真係睇見都覺得心痛。
陸羽仁
回應 (0)
我要發表