見鬼勿O咀，潛水怕屈機
2008/04/29 00:01:08 網誌分類: 時事
在考試中居然考「潮語」，姑勿論「潮語」該否成為考試內容，姑勿論《Milk》是否日後考評局指定雞精書，這動作本身就已經非常無logic。
不是嗎？這叫做魯班門前弄板斧。明明是年過40（甚至50），頭髮稀疏的中年阿伯，今時今日仲以為食「藍精靈」、「十字架」好鬼潮，創作出金句「見鬼勿O咀，潛水怕屈機」，登時覺得自己走在潮流尖端，歪起個嘴喪笑，露出那已經泛黃泛黑的牙齒，yeah一聲，再出動陳年發晒霉既髮蠟，成身白衫白褲（記住，一定要大喇叭）但又要好閃果隻，拿起一部cassette收音錄音機（好大部黑色果款），掮在肩上，聲量校到最大，un下un下咁行，直頭想跳番一part舞，學似你後生果陣既偶象尊特拉華達咁，嘩，路上靚女個個被你迷倒，大嗌：好「油脂」，好潮呀……
阿伯，番來咯～～
Michael Jackson已經做左白人（兼毀左容），尊特拉華達已經變左肥尊，米雪菲花已經好殘……家陣莫講話《油脂》，Rave Party都out左九世耐喇！
玩膠，點知變左硬膠假膠，正一白木！遇著咁頹既paper，真係喪驚咯！等我教番你啦，見到咁既題目，大家真係「見鬼」，人人「O咀」，好想即刻「潛水」，但家陣考緊試，一係考一係肥，阿伯你擺明「屈機」，想點先家陣！！
屈機一詞，大概出自《街頭霸王II》吧？當時街霸2風靡全球，但有一個小技巧－－把對方屈埋牆，然後用撻，被撻者是擋不了的，一站起來，就被撻倒；再站起，再被撻……如此這麼，直至死亡為止。
屈埋牆撻，四隻字，太累贅，於是慢慢的變成「屈撻」。而「屈」的技巧，又不止於屈撻，還有其他。（例如對電腦蘇聯佬，垂直不停跳起出重腳，個電腦角色會不停走過來捱踢。）「你屈我？」「屈你又點呀？吹呀？」打機時用「屈」，五隻字又太累贅，於是又再簡化成「屈機」。就是屈機一詞的由來。
「屈機」二字，在我們打《街霸2》成長的一代人中，是不可能不懂的。所以，查實「屈機」這個詞，何止不潮，簡直喪out。
真要算是潮語的，該是「膠」，硬膠、假膠、玩膠、真心膠，那些硬膠出卷阿伯是死也理解不了的。