傳統股穩陣卻難大升
2019/12/30 04:13:05 網誌分類: 經濟
美股無限風光在險峰
港股大幅造好，但美股上周五雖然再試高位，三大指數齊創即市新高；惟全日表現反覆，升幅不大，納指更倒跌收市。杜瓊斯工業指數最後一個交易日升23點，收報28645點。標準普爾500指數升0.11點，報3240點，標指今年累計漲逾29%，距離1997年的29.6%最大年度升幅只有一步之遙。納斯達克指數跌15點或0.17%，報9006點，同時是連升11日後下跌。
美股無限風光在險峰，紐約期金也連續第四個交易日上升，為8月上旬以來最長升浪，收市報每盎司1518.1美元，為3個月來最高收市價，升3.7美元，升幅0.2%，全周計升2.45%，為超過4個月最大單周升幅。現貨金曾經升至近兩個月來最高。分析指，近日持續有資金流入金市，對沖其他資產可能下跌的風險。
恒指還有兩個交易日就告別2019年，至上周止大市上升接近9%，升幅雖然無美股咁好，都應該算是不錯，但投資者一般感覺未必一樣。指數升幅不俗，普羅股民卻未必覺得好易賺錢，皆因今年走勢相當CHOK，年初中美貿易談判氣氛惡劣，大市下插，低位大部份人未必敢買，到年中情況稍定大市彈高，投資者追進後突然又爆社運事件出來，結果指數下插。當區選前街頭衝突，這個時候股價滑落，大家又未必有心情執平貨。
港股民升市賺錢仍覺難
另一個係揀股，今年表現好的主要是內地新興產業好似藥業、科網，香港投資者喜歡買或熟悉的行業或股份好似銀行、地產，上半年表現仲可以，下半年就大走樣。以太古（19）為例，本來今年房地產部門受惠寫字樓市道，航空業又復甦，股價上過103元高位，但下半年撞正社運，而且好運滯咁商場生意同航空業都食正衝擊，股價好似撻生魚咁撻下來，以上周收報71.8元，同高位差不多跌了近3成，同低68元只係彈了5%。
好似太古透明度高，資產又豐厚，本來是一間好公司，有中環茶友話，用這個價錢買來收益博增值，輸錢機會好少。對於這個講法，陸羽仁的回應有點矛盾，覺得認同，又有點不認同。說認同，係太古確係間好公司，現價派息有4厘以上，係低息環境下，派息率的確幾穩陣，就算輸不會輸得太多，好彩的話仲有機會收息賺價。
說不認同的話 則是今年香港一片亂局，太古兩大核心業務都受重創，連同寫字樓租務在內，可能都內傷咗，未來是否能維持派息現在不敢講。現在市場當炒係醫藥、科網這些有前景的行業，這些板塊的估值都係高，派息都係低，同太古這類傳統公司剛剛相反，所以如果以炒股主要睇前景博增值賺價計，太古就缺乏概念。
同樣情況都發生係本地銀行股恒生（11），恒生係好多香港股民的至愛，因為管理好，派息吸引，所以估值高。不過，今年銀行表現就落後大市。這個現象不但在本地薑身上，在跨國銀行好似滙控（005）都係一樣。在網上我比較過恒生和招行（3968）比較，今年恒生就跑輸給招行，而且恒生全年股價不進反退，跑輸大市，顯示受到社會運動的衝擊。
香港銀行地產行頭太成熟
本來，銀行業就算不是夕陽行業，至少都係成熟行業，所以強如美國的金融指數，在分類中都屬落後類別，表現最好的大行摩根大通，都同新經濟股的強者有距離。香港的銀行股今年要面對中美貿易談判同社會運動兩面夾擊。來年經濟放慢，銀行生意好難有大增長，所以令到連恒生都無法有表現。
香港投資者，過去最喜歡買地產、銀行股，最熟悉這些公司的業務，然而，這些行業都開始有最好日子慢慢過去的挑戰，一場社會運動，更加速了落坡的速度。最近，北京叫澳門搞新交易所，香港好多人都話澳門無論點搞都不可能挑戰香港，因為香港擁有法制優勢、資金自由流通，加上人才和群聚效應，金融中心的地位無一個城市可以代替，這個說法不去爭拗，就當是百分百正確，但股市買的是前景，香港的金融業已經做得咁好，未來還可以再好多少呢？以恒生現在13倍的市盈率，估值可以提升多少呢？從這個角度，說這類型股份下跌空間有限，輸極有個譜可能是對的，但可見將來的發展空間，就欠缺想像力。正因為港人最熟悉和喜歡買的股份令年無運行，所以就令投資者覺得指數升幅雖然不算差，但就覺得賺錢無睇起來咁容易。這個情況在未來，譬如上半年仍有可能維持，所以買股投資都要開始拉闊角度。
放假找節目 亞博館睇騷食飯夠穩陣
近半年無論係國際抑或本地藝人紛紛取消在港演出。不過，中環茶友放假期間，就入了機場博覽館睇音樂劇《獅子王》，仲試了新開的中茶餐廳NUVA。
《獅子王》係名作，在世界各地都有演出，茶友在倫敦都欣賞過。今次在亞博館的演出比劇場版大規模，這個劇特色之一係道具同舞台設計非常精細，大批道具都是專程運來香港，一看就知係落本的大製作，或者這同該劇係迪士尼的作品。香港近年有不少國際劇團來港，好似《貓》、《夢斷城西》等茶友都欣賞過，這一套就特別適合全家一齊欣賞。
去博覽館最方便係坐機鐵，現時有即日來回的優惠票，交通費不算貴，最重要係現在好多活動都隨時受社會運動影響，但亞博館就相對平靜，要預節目就比較穩妥。元旦同農曆年若然要找節目都可以考慮。
新餐廳NUVA水準不俗
茶友今次係睇日場，未入去睇前知道有新餐廳NUVA可以食飯，於是一早訂了位試試，發覺水準不俗，有幾個菜式都幾精緻，好似有個迷你版的黯然銷魂飯，用細細隻的初生蛋配叉燒，既保留這個飯的特色，又不會太大碗食完一碗就食唔落其他嘢。
陸羽仁
回應 (0)
我要發表