誰最恐懼 721？
2020/01/04 09:41:26 網誌分類: 時事
話說江永祥响一個訪問裡面，被問及 721 果陣，提到一啲事實，結果惹嚟咗一場風波。我諗江 SIR 作為警察公共關係科嘅一名要員，應該非常清楚，有啲嘢，其實唔太方便以警方嘅身份評論，但佢仍然選擇去觸碰呢條界線，我就反而覺得，喺非常高明。見佢諗清諗楚慢慢講，內容雖然碰界，但唔算踩界，所以班黃媒想借呢單嘢嚟煮佢，就真喺唔使旨意。
今次江 SIR 作出少少犧牲，向大家拋出咗一個錦囊，不過似乎各位反對黃黑嘅各界人士，到依家都仲未意識得到。
罪惡嘅不歸路
其實，事態發展到今時今日，果班黃黑之徒，以及支持佢地嘅假和理非，已經走投無路。依家惟一可以 KEEP 住呢場運動嘅，就喺有理冇理，乜叉都屈哂啲警察，總之就以一切手段，保住黑警嘅假象，同仇警嘅情緒，其他乜嘢訴求，都已經唔再重要。或者簡單啲講，仇警呢招，一旦失效嘅話，包裝罪惡嘅糖衣粉碎，整場運動，就會即時瓦解！
我唔喺講笑，點解會搞成咁？因為佢地走上咗罪惡呢條不歸路，惟有繼續抹黑警隊，先至可以令到罪惡合理化，先至可以維持呢場運動。THAT'S WHY 佢地當 721 好似命根咁，難得呢隻萬花筒，呃到一大班自以為好醒同中立嘅儍仔轉軚，令到形勢逆轉，將大量市民，轉化成佢地犯罪嘅護盾。你想翻案？佢地真喺會同你死過！
721 萬花筒
所以江 SIR 輕描一句，就惹嚟黃黑陣營極大嘅反彈，黃媒群起反擊。人地只喺話「有一班人」帶咗一班示威者到現場，牽引咗成件事嘅發生，其實呢個講法，冇乜大不了。但有一個人，就即時對號入座，發哂難渣咁，唔知呢個人，咁緊張做乜？
當日，一個外區議員，帶隊走入元朗搞事，根本就喺眾所周知，擺到明响現場，同班黑衣人一齊挑釁當地居民，但竟然冇人去質疑。反而一個當地議員，响另一個唔同嘅時空，跟當地人握個手，講句鼓勵嘅說話，就俾人一口咬定勾結乜嘢黑社會，本來就已經講唔通。但可惜果位當地議員，見自己處於下風，就選擇咗避重就輕，你逃避，人地就梗喺乘勢追擊，結果就連個議席都輸埋。
黃黑嘅死穴
所以，各位反對黃黑嘅各界人士，唔好再逃避啦！仲以為 721 對你地不利嘅話，就喺嚴重錯判形勢。黃黑陣營之所以有咁大嘅反彈，喺因為有人點中咗佢地嘅死穴，佢地攬得咁緊，其實已經露哂底。你地唔單止唔應該逃避，仲要借江 SIR 呢單嘢，將 721 重新擺上枱，團結各方嘅輿論同文宣力量，將事實嘅焦點，移離無辜嘅執法者，糾正返去果啲罪魁禍首度，集中火力，群起鋤爆佢地呢個死穴。
我想問大家，究竟喺邊個，最恐懼 721？
答案呼之欲出！
事情最近兩月終於慢慢見到曙光，但願香港以後能認清方向，發揮自身優勢更上一層樓。