放生嘅虛偽

2020/01/13 08:53:22 網誌分類: 放生還是放死
13 Jan

喺咁多華人傳統習俗中,我最不以為然係放生,依家有單海龜龜背被刻上放生兩個字,然後隻龜病死咗嘅案例,應該喺龜背刮痕引起感染所致。放生係一種最虛偽嘅習俗,我覺得呢種習俗,根本係送啲動物凌遲處死,唔係放生,甚至衰過以前天主教嘅贖罪券。
放生與神棍虐畜
首先,唔係乜動物都適合放生,例如長期人生飼養嘅動物,你放生?不如話你餵緊啲猛獸好唔好?呢啲已經唔係放生,係殺生。但更離譜嘅放生,係將淡水動物放入大海,你不如直接殺咗佢哋好唔好?簡直挑戰黐線極限。呢類所謂放生其實應該直接告係虐畜,因為淡水動物放入大海,或海洋動物放入淡水,都係死狀可怖,呢種唔係殘酷對待動物又係乜。喺龜背上刻上放生兩個字,更明顯反映預備用嚟放生動物果啲友仔對動物嘅殘忍。
其實好多搞放生活動嘅宗教團體,特別係佛教同道教果啲,目的都係呃錢,佢哋睇中華人社會宗教唔係真係信仰宗教上果回事,純粹係為未知嘅世界買一張入場券、贖罪券心態去進行宗教儀式,呢種贖罪券心理,結果就係任何宗教都會墮落,變成一種生財工具,同宗教原有目的背道而馳。五百年前德國有位唔服氣嘅神父,叫馬丁路德,寫咗《九十五條論綱》出嚟,挑戰教皇搞出嚟嘅贖罪券,最後觸發宗教改革,以及基督教三分天下嘅局面(天主教、東正教、基督新教)。但咁多年嚟,佛教同道教未曾有過宗教改革嘅情況,所以大家見到嘅佛教同道教,喺華人地區都係十分之腐敗,放生呢個問題,只係眾多問題其中一個。香港佛門啲恐怖嘢,大家都知唔少,台灣嘅慈濟,話就話慈善組織,但台灣人一直對呢個組織嘅政治立場抱有極大嘅質疑。

所以解決放生等於虐畜嘅問題,治標係政府重罰亂咁 放生嘅友仔,以及加強教育,阻止啲人亂咁放生,至少係喺有利於動物福利嘅情況下,先可以進行放生活動。但長遠嚟講,如果華人社區嘅宗教無任何改革,無論係原生宗教,定係傳入中國果啲宗教都無改革,結果只會係贖罪券問題嘅永續輪迴,會繼續有動物枉死而無解決過任何問題。叫華人宗教改革,真係難咗啲。

回應 (0)
我要發表
user