所謂人權
2020/01/15 11:49:45 網誌分類: 政治
今日，想同大家分享我 2014 年 6 月中，發表過嘅一篇回應，內容方面，我會作少少修正。記得當時喺佔中前夕，我第一次對所謂嘅西方普世價值，作出咗都幾嚴厲嘅批評。香港近呢大半年發生嘅社會事件，可以話喺佔中嘅延續，而事態發展到今時今日，我諗大家應該已經有足夠嘅體會，去了解一啲以往難以接受嘅宏觀事實。
物競天擇，適者生存
有云：物競天擇，適者生存；古往今來，永恆不變。意圖違反呢個自然定律嘅，小至個人，大至國家，勢必走上滅亡之路。進化論，亦喺基於呢個自然定律，物種之所以能夠進化，皆因面對弱肉強食嘅世界，優存劣亡，只留低適者可以繼續繁衍。進化之路，只能向前，絕不能停，停，就會招至滅亡。
到人類發展到近代，就出現咗智慧，智慧令到人類創造出文明，從而主宰呢個世界。不過，文明亦同時衍生咗驕傲同自我。結果，驕傲同自我，搞出咗「人權」呢樣嘢。人權令到人類多次違反「物競天擇，適者生存」呢個自然定律，招至一次又一次嘅失敗。如果人類再唔覺悟嘅話，最終會走上滅亡之路！
嘩！講乜嘢呀！歪理！人權從來都喺公認嘅真理啦！
人權與自然定律
其實我都好唔想達至呢個結論，但可惜每當我退一步，以宏觀角度去睇果陣，見到嘅世界的確喺咁。就睇人權嘅基礎：「生存」。話說每個人，一出世就擁有生存嘅平等權利。咦？乜唔喺適者，先可以生存咩？原來呢個人權嘅最底線，本身就已經違反咗「適者生存」嘅定律，而當「適者生存」遭淪陷，「物競天擇」亦會隨之失守，因為响人權嘅最底線之上，會衍生一系列嘅平等權利，最終會衝擊到「物競天擇」呢個定律。
近代一個最典型嘅例子，就喺共產主義嘅崛起。共產主義，本身就喺建基於人權，呢種人權，就喺每個人，都擁有平等財產嘅權利，所以財產必須平均分配俾每個人。無疑，一個共產主義社會，完全違反哂「物競天擇，適者生存」呢個自然定律。個體無須競爭，社會無須進步，人人共存，人人共產。結果所有奉行共產主義嘅國家，都喺徹底失敗，無一倖免。
資本主義，之所以能夠成為近代較成功嘅財產分配體制，正喺因為佢符合咗「物競天擇」。通過對社會貢獻能力嘅競爭，促進咗人類嘅進步。不過人權呢個包袱，始終令到人類無法遵從「適者生存」呢個定律。結果，人權就衍生咗「福利」呢樣嘢，「不適者」通過福利，逃過滅亡嘅厄運，得以生存。可惜大自然嘅本質就喺殘酷，優者响數目上往往遠少於劣者；違反「適者生存」嘅惡果，就喺物種以優少劣多嘅比例繁衍，步向滅亡！
人道、人權、民主
一條解決呢個問題嘅出路，就喺將劣者，轉化成優者。早期嘅福利制度，喺以「人道」為基礎，所以只會為劣者提供生存嘅最基本元素。响最基本嘅福利制度之下，劣者會被社會歧視、忽略，意識上，同滅亡冇分別。不過呢種歧視、忽略嘅社會態度，反而能夠激發起劣者改變命運嘅動力，令佢地置諸死地而後生，轉化成優者。發展中嘅資本主義社會，因為能力上只能夠提供最基本嘅福利，往往造就咗呢個促進劣轉優嘅環境，令到社會高速向上發展。香港嘅上一代，就正正喺一個典型嘅例子。
但唔知幾時，福利開始變質，慢慢轉化成福利主義，原來罪魁禍首，又喺人權！
以「人權」為基礎嘅福利主義，唔單止為劣者提供生存嘅最基本元素，更將佢地嘅生活質素，提升到同優者貼近，甚至對等，結果大大降低咗劣轉優嘅動力。而更甚嘅喺，人權將每個人嘅政治權利，劃上等號，呢家嘢，就喺所謂嘅「民主」。
响「物競天擇，適者生存」呢個自然定律，得以嚴格遵守嘅情況之下，一人一票嘅民主制度，喺唔會有問題，因為劣者已經完全被淘汰，唔再存在啦！但可惜，人類無法遵從「適者生存」呢個定律，响福利主義之下，優少劣多嘅比例就會被極化。從此，劣者唔再需要咁辛苦將自己轉化成優者，以取得社會嘅資源，因為佢地已經能夠以大多數嘅選票，令到政策向福利傾斜，「物競天擇」終於受到衝擊。
而每當「適者生存」遭淪陷，「物競天擇」失守之後，下一步，就會喺滅亡之路！
民主何價
民主制度發展成熟嘅國家，普遍都喺入不敷支，之所以維持得到今時今日，喺因為佢地能夠通過經濟手段，掠取其他國家嘅血汗同資源。堪稱世上最民主嘅國家，亦喺世上最入不敷支嘅國家，呢個國家，利用軍事、科技、貨幣，去渣乾其他發展中國家嘅血汗同資源，先至可以填補佢要維持呢個自命最民主嘅制度，而需要付出嘅沉重代價。唔喺咁嘅話，呢個國家嘅體制，一早就已經崩潰咗。
至於冇足夠嘅實力，但又要引入民主制度嘅國家，結果當然喺陷入無窮無盡嘅政治撕裂當中，經濟一沉不起，最後惟有廉價出賣自己嘅資源，去供養人地西方國家嘅民主自由啦！
天，從來冇賦予過我地每一個人平等嘅權利，只喺人類嘅驕傲、自我，以為可以勝天！
所謂人權，淨係扯淡😀
天，從來冇賦予過我地每一個人平等嘅權利，只喺人類嘅驕傲、自我，以為可以勝天！
正是人類滅亡之主因
施永青這篇文章立意相近：
https://www.am730.com.hk/column/新聞/人生而不平等-活著更增差異-204858
好文不厭百回看👍🏻😊