外國電影推薦 | hkdsegayau

1. Green Book 《綠簿旅友》

電影故事背景
Green Book 呢套英文電影改編自真人真事，講述嘅係以前喺美國嘅種族歧視問題。

1960年代嘅美國，種族歧視非常嚴重，如果有黑人闖入「非黑人友善」嘅地方，唔止會被嘲弄咁簡單，有時可能會被毆打，甚至導致生命危險。因此，當時有一本專為黑人而設嘅小冊子 “Green Book”，記載咗整個美國各個城市嘅「黑人友善」嘅場所，令黑人旅遊時可以更安全。

電影簡介
英文電影 Green Book 嘅主角有兩個：(1) 美籍非洲裔嘅黑人鋼琴家 Don Shirley 同埋 (2) 佢嘅美籍保鑣 Tony Lip。

電影裏面，Don Shirley 自願去到美國南方、黑人歧視嚴重嘅地區進行巡迴鋼琴演出，而為咗保護自己嘅人身安全，他請咗白人 Tony Lip 做佢嘅司機兼保鑣。Tony Lip 本身係一個頗為歧視黑人嘅白人，但係為咗家計、為咗金錢，佢決定接受 Don Shirley 嘅工作。

Don Shirley 進行巡迴演出期間，所遇到嘅事並唔少：作為活動嘅演出嘉賓，卻被拒絕使用室內嘅洗手間，只可以用室外嘅茅廁；當司機 Tony Lip 可以到餐廳進食，Don Shirley 就連踏入餐廳都唔可以，等等嘅事都引起咗觀眾對歧視問題嘅關注。

拓展方向
雖然 Green Book 電影主要環繞1960年代美國嘅種族歧視問題，但係同學做presentation 嗰陣，可以將英文電影嘅含意延伸至現代社會公平性嘅問題：對有特殊學習需要學生 (students with special educational needs, SEN) 嘅歧視、少數族裔 (ethnic minorities) 所受嘅歧視等等。

2. The Giver 《記憶傳承人》

電影故事背景
The Giver《記憶傳承人》呢套英文電影改編自一本相同標題嘅科幻小說, 故事主題環繞反烏托邦 (dystopia) 嘅主題。呢本小說出版於 1993年，而英文電影 (film) 就喺 2014年上映。雖然呢本英文小說同電影嘅出版、上映年份都比較早，但係所觸及嘅社會議題到而家依然適用。

電影簡介
The Giver 《記憶傳承人》電影全長只有90分鐘，但係小編 hkdsegayau 個人認為電影嘅深度、意義十足。小編自己都係做呢套電影的，電影時間唔長、亦都十分有意義。

英文電影 The Giver 嘅主角有一個：十二歲嘅 Jonas。

Jonas 居住嘅社會係一個看似烏托邦 (utopia) 嘅社區，實際上係一個牢獄、人民思想被控制嘅社會。呢個社會最大嘅特點係：居民嘅生活、一舉一動都被一個中央委員會監控住。社區裹面嘅每位小朋友年滿十二歲就會被分派到一個工作崗位、男女之間並無自由戀愛，市民同邊位異性結為夫妻係由中央分配、夜晚亦有宵禁防止市民外出。更重要嘅係，每一位市民嘅記憶都被奪去 — 市民並無生病嘅記憶、戰爭嘅記憶、政府控制市民嘅記憶等等。社會裏面所有正面、負面嘅記憶都由一位「記憶傳承人」負責記住。而呢位記憶傳承人就係 Jonas。

剝奪人類嘅記憶與思想控制 (thought control) 無異，當人類一出世就受到嚴格思想、行為嘅控制，從來冇享受過自由嘅人類當然唔識得反抗。但係，當 Jonas 發現自己一直身處嘅社會屬於一個極權統治嘅社會，佢決定要為社會做一啲改變。

拓展方向
The Giver 電影觸及到好多人性嘅議題：人類嘅自私 — 令中央委員會將所有負面、痛苦嘅記憶都放喺 Jonas 一人身上；人類嘅脆弱 — 令人類唔願意去背負負面嘅記憶。The Giver 呢套英文電影反映咗現代社會嘅一啲極權統治 — 最有名嘅當然係北韓嘅極權統治。同學喺可以反思一下：思想控制有好有壞，究竟係咩原因導致人類會採用極權統治，從而探討人性嘅醜惡。

3. The Fault in Our Stars 《生命中的美好缺憾》

電影簡介
The Fault in Our Stars 《生命中的美好缺憾》係小編好欣賞嘅一套電影，雖然電影背後嘅意義冇其他嘅電影咁深遠，但係以故事情節嚟講，呢套英文電影係幾易明、幾好睇嘅。

電影故事嘅女主角 Hazel 係一個甲狀腺癌症末期病人，需要隨身攜帶一部笨重嘅呼吸機嚟延續佢嘅生命。罹患癌症已久，明白自己隨時會失去生命嘅 Hazel 早已對生命失去希望，但係佢喺父母嘅迫使之下，參加咗一個癌症病人分享會，喺度認識咗男主角 Augustus (Gus)。

電影故事嘅男主角 Gus 曾經係一位出色嘅籃球健將，但係後來患上骨肉癌，因而被迫切除右小腿。同 Hazel 唔同嘅係，Gus並冇因為咁而氣餒，而係憑著自信、樂觀嘅性格，繼續生活落去。

Hazel 同 Gus 嘅認識為兩個人嘅生活都帶嚟咗重大嘅轉變，甚至擦出咗愛情嘅火花，從而令人反思生命嘅意義、面對逆境嘅態度等等。

拓展方向
癌症病人嘅故事並唔少，但係 The Fault in Our Stars 呢部電影嘅兩位主角都係年紀比較細嘅癌症病人，同學嘅反思方向可以係環繞生命嘅脆弱、自己對生命嘅見解、要珍惜生命等等嘅議題。雖然呢套電影情節未有觸及太多具爭議性嘅社會議題, 但係小編個人認為作為一部娛樂性嘅電影，The Fault in Our Stars 喺情節上同埋意義上都好值得睇。

小編hkdsegayau嘅英文SBA電影推介當然唔止咁少！即睇全文：https://hkdsegayau.com/dse-english-sba-film-recommendation/