精美小冊子 圖文並茂 旅發局推介行山樂 東涌線13公里親近大自然
2020/01/20 04:12:28 網誌分類: 生活
旅發局朋友帶隊，一行人一早由東涌出發，行無耐就到咗侯王宮，見到有人燃點成棵樹咁高嘅大香還神，大家入內參拜之後，沿東涌古道上山，雖然名為古道，但修築咗紅毛泥行山徑，所以行得幾舒服，中途喺沙螺灣見到一個名為「千里眼」嘅大型藝術裝置，大家不停開心打卡，跟進繼續上路，沿途可以飽覽港珠澳大橋美景，去到末段係石路，比較難行，但可以鍛煉身體，出一身汗，人都舒服晒。行咗四個多小時共十三公里，終於到達水鄉大澳，享受一頓漁村美食，為行程帶來完美嘅句號。
《香港郊野全接觸 登山遠足‧單車旅遊指南 2019-2020》推介多條行山徑，分類為「地質奇景」、「壯麗美景」、「回歸自然」、「日落魔力」、「漁村生活」同「騎行樂趣」，梗有一條啱行山愛好者心水。
旅發局話，佢哋請來National Geographic雜誌嘅得獎攝影師，走遍香港，拍下不同主題嘅行山徑美景，吸引旅客來港，親近大自然。
大家都攞本小冊子睇吓，去行下山，紓減吓生活嘅壓力。
Kelly Chu
■沙螺灣嘅「千里眼」大型藝術裝置，係最佳打卡點。
■旅發局新出嘅小冊子，推介多條行山徑。
■侯王宮內的巨型大香。
回應 (0)
我要發表