祝賀得獎歌手
2020/01/24 04:13:09
網誌分類:
生活
每年呢個時候都係樂壇派發成績表嘅時候，今年寰亞旗下歌手成績不俗，其中鄭秀文Sammi憑藉《我們都是這樣長大的》奪得「全球華人至尊金曲獎」和「叱咤樂壇至尊歌曲大獎」等多個大獎。星期日晚我哋喺中環ZEST by Konishi餐廳慶功，一來祝賀我哋一眾歌手奪得多個樂壇獎項，二來大家一齊團年。
今年港台以特備節目形式公佈「第42屆十大中文金曲」得獎名單，當晚慶功party我哋都搞咗個小型頒獎禮，將「全球華人至尊金曲獎」及「十大金曲獎」兩個獎座交到Sammi手上，並將「最佳進步獎金獎」和「CASH最佳創作歌手獎」分別頒給陳健安On仔和馮允謙Jay。
除此之外，鄧小巧、梁釗峰、黃淑蔓仲有樂隊組合Nowhere Boys等早前亦在叱咤樂壇流行榜頒獎禮同埋新城勁爆頒獎禮上奪得多個獎項，當晚佢哋仲一齊合唱慶祝，絕對係可喜可賀。
見到大家嘅努力付出得到回報，我都衷心為佢哋感到高興。譬如Sammi，其實不知不覺間，佢加入公司已經有十五年，咁多年嚟大家就好似大家庭一樣，一齊經歷音樂道路上嘅酸甜苦辣，一齊努力，一齊進步。正如Sammi喺Instagram上都講，只有謙卑和努力，就是前行的力量……每一步都行得不容易，但值得。每一位歌手嘅成功都絕對不容易，你哋嘅付出同努力，都係值得嘅！
講開又講，今次party嘅餐廳ZEST by Konishi，係我哋新開嘅一間日式 X 法式Fusion餐廳，由日籍行政大廚Mitsuru Konishi執掌，糅合新派法國烹調技藝與日本細緻味道，以日式風格呈獻法式料理。餐廳開業不到一年時間，即摘得米芝蓮一星榮譽，出品相當有驚喜。
新嘅一年，祝大家不斷進步！祝香港走出陰霾，再上一層樓！
林建岳博士
回應
(0)
我要發表