3月下旬築底部署反彈

港股創新低秒殺小牛後V彈, 反彈在望

19/3 周四恒指收報21709, 暴跌582點(最多下跌1152點, 一度上升88點)

國指收報8559, 暴跌241點(最多下跌510點), 國指小幅跑輸恒指

競價開市位的啟示

港股已是連續六日低開, 而且收得差, 係淡友主導大市的訊號, 只要明日(周五)高開, 就係好友反擊訊號, 明日轉節氣春分, 預示有大變, 過去兩日港股正在醞釀反彈, 只係欠缺利好藉口, 今日中港股市係同步創新低, 估計將會同步止跌回升, 股災不應只得一般年波幅約8000點, 不過今個月已跌幅已足夠, 無需破底來擴大月波幅, 理應炒番上去結算, 造淡食胡反手買上

牛熊分布失衡: 21%牛 VS 79%熊

投資者信心非常虛怯，在恐慌情緒主導下，基金大規模贖回潮湧現，基金經理只好沽貨套現, 投資者拋售風險資產, 資金明顯流出股市, 基金拆倉拖累金、股、匯、債全面被拋售, 人民幣轉弱, 人仔資產受壓, 資金流入美元及短債避險，美匯指數強爆

今次大跌浪約有24000張肥牛已暴斃, 大鱷食夠牛牛喇! 牛熊分布嚴重失衡利上攻, 睇牛熊分布, 今日大插只係吃了1464張小牛, 跌幅與殺牛不成比例, 跌得多, 吃得少, 唔係大鱷的風格, 可能係淡友夾硬推大市落山平淡倉, 如果明日插千點直落20700都只係食到約600張瘦牛, 仲衰過今日, 你話大鱷會點做呢? 假如今日係假跌穿22000大位, 明日就會彈番上去, 大市不會在21500超筍價區游走, 推上去一則可消化超賣, 二則可用高價養肥牛牛, 待日後插穿21000就更和味

13/3低見22519出現跌浪第一隻腳, 反彈乏力, 高見23631後再插, 17/2低見22676, 當時以為是W底的第二隻腳, 如今看來當然不是, 好明顯今日(19/3)低見21139才是第二隻腳, 雙腳企穩就會有大彈高, 當向上受阻就會再尋底

好友已經死得七七八八, 今個月大鱷已殺了約24000張牛牛, 20000樓下冇牛, 人心惶惶, 個個都話後市要隊穿20000, 人人向下望反而應向上望, 因為樓下牛牛都未出世, 即係暫時唔會落去, 既然唔落地獄, 就即係要走番上去, 否則唔夠波動空間, 根據慣性走勢, 只要創新低後出現一支大陽燭(要高開高收的大陽燭, 不是大插收窄跌幅的陽燭), 股民就會飛撲入市有助推高大市, 亦可逼退淡友, 大鱷就可乘機派貨

=======================================

沽空比率:

呢幾日我說有淡友食胡其中一個原因係過去幾日的沽空持續縮減, 回顧今年1月尾港股大插, 當時沽空率爆燈, 隨後逐步回落, 大市跌多幾日就止跌回升, 按時間推斷, 今日可能已見短底, 或者係3月低位已出現

如果未來幾日大插插, 沽空比率就應該係上升而不是持續下降, 所以後市反彈機會大

本周沽空比率:

周一18.11%(近日收市高位), 周二15.11%, 周三14.95%, 周四13.15%(港股創新低)

今日港股沽空比率為13.15%

主板股票表現
上升　　　　　　 326　　 10%　
下跌　　　　　　1604　　43%

唔好見這麼多下跌股份就驚, 港股跌幅全面, 似係斬倉止蝕盤, 所以股價狂插跌過龍, 今日成交高達$1910億, 亦符合我的看法, 就係大鱷夾硬隊穿21500大位來逼死淡友, 逼股民止蝕, 跌至現水平中美股市再唔護盤的話, 企業違約爆煲風險大增, 所以央行必需要出手

+++++++++++++++++++++++++++++++++++++　

明日轉節氣春分變盤轉升

通常每周升跌係2~3天, 上周恒指只係升了1天, 反常地少, 按照慣性走勢恒指不會連續兩星期都只係升1天這麼少, 所以早前我估今個星期升兩日, 加上周四五多數係1升1跌, 今日跌即係明天升, 明日轉節氣春分, 有可能變盤轉升, 不過係星期五一向有周末沽壓, 如能收升食得晒沽盤, 就反映好友反擊動力增加, 買盤強過沽盤, 希望人民幣生生性性守住7.1止跌回升, 大媽全力掃QQ.工建行, 誠意何嘉, 必有後著

上証連跌7天, 我就唔信繼續連跌, 今日入貨買阿爺會救市, 港股9RSI 報14喇! 嚴重超賣要彈高喇!

今日上証雖然低見2646, 不過收市又彈番上2700, 收2702, 跌26點, 冇事冇事, 中港股市創新低皆因人民幣今日暴跌650點子, 收市報7.091，創去年10月中以後最低水平, 中國股匯都要等阿爺護盤

23000，22000，21000都有淡友食胡

今早開市前我話再插的話，淡友就會袋袋平安食胡鬆人， 因為造淡要在周末前收手, 結果中段創即市低位21139後就抝腰嘭嘭聲沖返上去， 全日計收復一半失地，尾市彈到去22000關前，21000樓下牛牛當堂貴咗好多, 大鱷冇益人, 如果大市彈上去, 牛牛就會愈來愈肥

今日恆指一度大跌1152點， 竟然只係殺牛約千隻，極度反常, 通常食幾千張咖! 淡友今日真係好趕時間, 唔通淡友真係想喺星期五之前食胡鬆人? 所以今日夾硬隊穿21500?

按照陸Sir所說, 美股淡友陸續食緊胡, 而按照慣性走勢周四五是港股創新低的時間窗口, 所以港股淡友都有可能跟 (連大淡友試兄都吃了淡倉轉好倉), 今日再隊落21139, 短炒周期權的淡友就有胡食

調整上一個牛市(2016~2018年)升幅0.786倍為21532，與2016年12月低位21488點十分接近, 今日低見21139, 已到了今個月的下跌目標, 年波幅做夠8000點, 中港美三地股市都同步落到重要關口, 係時候拗腰彈上去了

====================================

靜候人民幣止跌回升

我講過三大測市指標當中人民幣係影響港股頭號關鍵指標, 人仔七連跌, 係拖累國指及上証七連跌的元兇, 係同步, 因為人仔瀉, 老外就要沽A股, A股跌就禍及H股, 恒指亦受拖累, 幸好QQ受人民幣影響較細, 加上是權重股, 所以大媽掃QQ來撐市, 當人仔止跌回升, 老外就會買A股, A股升就會推動港股向上

今日多隻指標股創新低後就拗腰彈高, 只要權重股不破底, 港股就不會創新低, 一如我早前所預測, 本周的波幅理應細過上周, 所以本周不應見20000, 今日已見本周低位機會好大

我的想法是, 特朗普不會容忍美元強勢一直企102之上, 因強美元不利美國, 人民幣過強或過弱都不利中國, 物極必反, 當匯市出現逆轉, 股市亦會跟隨反彈, 不過陸續有指控說今次肺染源頭在歐美(有醫學專家稱美國及意大利在去年9月已出現新冠肺炎, 美國疾控中心亦已承認新冠當流感計), 導致疫情於全球大爆發, 而2003年沙士只限中國境內, 所以較易控制

全球央行合力救市, 水浸市場點都會有幫助, 但多數分析師見股市續跌就話放水冇用, 但我認為有可能係周初淡友未食胡, 所以唔俾股市升, 亦有可能係想推低股市逼人斬倉, 然後在低位收貨

23000有股民博反彈, 結果止蝕/坐艇, 22000有股民博反彈, 結果止蝕/坐艇,21000股民輸到怕, 失去信心, 唔敢再博反彈, 今日插到21139的確係有唔少股民死心止蝕, 當人人灰心, 唔敢再博反彈, 就係彈高之時, 今日驚嚇的一棍大插就令股民輸到心慌冇眼睇, 人人向下望, 逆向思維, 反彈在望, 因為 rsi 14通常會有死貓彈

明日係春分大節氣, 或會有變化, 而巧合的是陸蛇說明日(周五)美股結算, 而港股一周期權亦要收割, 今日淡友可能已食胡, 相信係今日夾硬插逾千點的原因

我見到有分析說21000水平長線可入第一注, 這些買盤可能係今日港股反彈的其中一個原因, 現水平港股市盈率少過10倍, 極具吸引力, 只係市場氣氛差, 所以股民不敢大舉入市, 但唔排除有投資者正在暗暗於低位吸貨, 所以當大市急彈, 短炒股民就夠膽追貨, 當買盤增加, 港股上升動力就會增強, 不過肺炎疫情持續惡化, 熊市如有反彈亦不會持久, 後市仍會破底

今晚人仔報7.15係離岸價, 在岸仍收係7.1樓下, 報7.091, 等阿爺做野, 只要人仔轉強, 利好港股, 如人民幣續瀉, 港股亦會跟住瀉

春分轉節氣, 恒指高開高收呈光頭光腳大陽燭

20/3 周五恒指收22805, 爆升1096點

牛熊分布: 19%牛 VS 82%熊, 牛太少, 熊下移養肥中

恒指昨日收21709, 做了第二隻腳21139, 如果今日大插破底, 大鱷係得不償失, 會益左淡友, 因為21500樓下冇乜牛, 所以港股作出報復式反彈, 今日港股爆升, 成功吸引初生BB牛上移至22100水平,

尋底市每周都會有新低, 即係下周會插穿21139, 按照今個月的慣性走勢, 創新低後最多托兩天就破底, 今個月係跌市就係連跌, 升市就只係一日貨仔, 如能打破呢個慣性走勢, 就係利好訊號, 今次港股跌浪大媽係日日掃貨護盤, 各國央行就不斷出招救市

港股嚴重超賣下今日終於作出似樣反彈, 觸發點係人民幣反彈, 亦可能與富時調動有關, 人民幣結束七連跌轉升, 而國指及上証亦同步結束七連跌轉升

近來港股往往係玩偷步, 跟住道期來炒, 道期急升, 所以港股亦爆上, 而今年恒指周一競價開市升跌例牌跟周五的道指表現, 所以今晚道指升跌就會反映在下周一港股競價,

今次股災跌浪道指及恒指每次都係升1日就回吐, 未見過連升2天, 所以只要今晚道指收升, 就係連升2天, 港股理應跟隨, 如道指未能打破彈散尋底的宿命, 就會拖累下周一的港股, 調整上一個牛市(2016~2018年)升幅0.786倍為21532，與2016年12月低位21488點十分接近, 所以昨日插穿21500水平即彈, 上証昨日低見2646, 只要上証冇破底, 有助港股回穩

人民幣由11/3起轉弱展開長達七天的跌浪, 人仔弱, 老外就走鬼, 由12/3起老外就日日大手狂沽滬股, 由當天起港股就暴跌, 所以我一直說港股升跌與人民幣表現相關性極高

美元由逾3年高位103回落, 強勢美元升勢回順, 人民幣隨即結束七連跌, 收市大升249點子, 報7.0661, 分析指美國聯儲局與9間央行展開貨幣互換, 以緩解全球美元緊張的形勢

人民幣結束連跌彈高, 守住7.1水平, 人仔死唔去, 今日老外大手狂掃滬股, 為7/2以來資金凈流入最多的一天, 係推高中港股市的功臣, 不過由於今日富時指數調動, 未知大手掃貨盤是否與此有關, 如下周一老外沽貨, 就可印証今日的買盤只係富時調動的被動性買盤

今日港股成交高達$1713億, 當中收市U盤成交佔$268億(包含富時指數調動), 未知午後港股急升, 除了跟道期外, 是否亦受了富時指數調動影響, 周末金融市場往往係風高浪急, 消息紊亂, 持重倉過周末係高危

23/3 周一恒指收報21696, 大跌1109點, 斬倉抑或震倉?

連續兩日港股都係競價大裂口開出, 大升大跌, 企錯邊根本冇得走, 好友淡友都要死, 上周五港股各項測市指標都向好, 博反彈貨都未食晒, 今日就裂口大插, 大鱷分明係想好淡通殺, 大升前必有一震, 究竟今日係斬倉走鬼抑或係震倉趕好友落車, 明日揭盅,

今日港股暴跌除了受人仔急瀉影響外, 亦係受美期拖累, 近來港股多數係睇住美期偷步升跌, 上証今日急挫低見2656, 不過冇插穿前底2646, 人仔大插526點子, 收7.1187, 人仔弱, 中港股市反艇, 只要阿爺明日撐人仔, 中港股市就可借勢作出反彈, 今日恒指失守22000大位, 回顧19/3恒指首度收22000樓下只係1天, 翌日即刻彈番上去收,

今日人民幣雖然暴跌, 但其實全球央行聯手救市後, 匯市形勢已改善, 避險貨幣見頂回落, 美元受制於103掉頭向下, 日圓愈走愈弱, 預示資金可能重新投入股市,

恒指已連續兩日冇創新低, 如明日插穿今日底部21659, 按照慣性走勢本周就會收跌, 不過如果仍然冇破底, 違反了慣性走勢, 就係利好訊號, 代表本周會收升, 即係周五(27/3)會收22805之上, 好友可能正在部署轉倉或下周一結算位, 今年恒指例牌跌兩周就反彈, 過去兩周恒指收跌, 如跟慣性走勢, 本周就應收升

如果恒指跟上周, 本周就可升2天, 如人民幣止跌回升, 恒指甚至會升3天, 因為以往一般每周升2~3天, 過去4周的星期二, 有3次升市, 一次跌市, 即係明天收升機會大

如果上周五春分轉節氣後未彈完, 今日只係震倉, 那麼落山最多食1~2口牛就要彈番上去, 今日大鱷已吃了一口牛130張, 只要明日港股大幅高開, 就係好友反擊訊號

人仔弱雞老外大舉沽貨走鬼, 幸好滬大媽狂掃貨撐市, 所以今日港股不但冇破底, 亦守得住關鍵位21500, 近日港股係跌下彈下來養牛熊及築底, 港股表面上雖然弱, 但其實近日已改變了單邊下跌的走勢, 每次反彈幅度亦大, 可能係因為臨近結算, 亦有可能係因為3月已做夠月波幅, 而且牛瘦熊肥, 再插亦冇肉食, 反而熊熊愈養愈肥, 並且下移至22900水平, 只要有好消息, 挾上去不難

今早開市位已是全日最低位, 一開即彈, 午後雖然沽壓加劇, 但仍守得住關鍵位21500, 冇創即市新低, 係利好訊號, 今日恒指雖然嘔晒上周五的升幅, 不過國指只係跌367點, 冇嘔突上周559點升幅, 係大媽掃貨護盤的功勞, 國指大幅跑贏恒指, 國指已站穩8290/8500, 技術指標利反彈, 今日回吐後有利延續上周五春分的升勢, 博反彈買大媽股勝算較高

港股高開高收呈陽燭, 部署屠熊

24/3 周二恒指收報22663, 升967點(最多上升1057點)

國指收報9184, 升432點(最多上升486點), 國指大幅跑贏恒指

今日港股表現確認上周五大升是轉勢向上, 大升前必有一震, 昨日只係震倉, 震牛養熊, 明日有望出現今次跌浪的首次連升, 估計好友部署本周五收22805之上, 本周收陽收升, 部署下周一的結算位,

各項測市指標全面向好, 港股昨日再試底, 高低腳成功築底, 會企得更穩, 「島形底」形態有利進一步走高, 技術上會升穿16/3高位23631, 淡友命危, 只要有好消息或等養肥熊熊, 就會挑戰23800~24000

25/3 周三恒指收報23527, 暴升863點, 收復10天線, 兩連升見沽壓

兩連升後例牌斷纜

大鱷推高港股大舉屠熊1793張, 好友連日反擊可能是為了結算, 不過升勢實在過急, 加上由7/2起, 恒指最多連升兩天, 所以按照慣性走勢明日應收跌, 不過估計好友本周會力守支持位22800~23000, 市強只會小幅收跌, 回吐後會再上攻, 如收市下挫超過200點, 翌日未能立即收復跌幅, 就可能已見短頂,

如本周收升, 周五就要收22805之上, 而向上23800~24000係關鍵阻力大位, 23600~24100只得小熊, 欠缺吸引力, 要再養多一陣, 肥熊在老遠, 牛牛不斷上移亦拉住港股後腿, 港股要磨下, 消化沽壓, 待養肥熊熊才會再上攻, 人民幣強弱是港股升跌關鍵

今日港股早市已見獲利沽壓, 但午後突然夾硬升多一浸, 可能係短炒好友推高食胡鬆人, 亦可能係預留明日的回吐空間, 想拋離23000來保底, 因為人仔先高後低, 午後走弱, 收市大跌240點子, 收7.1009的高危水平, 係利淡訊號, 明日中港股市沽壓會加劇, 大媽今日已不是單邊掃貨, 係一路推升一路出貨獲利, 散戶跟住大媽手影買賣可保平安

過去兩日全面向好的測市指標已有改變, 出現利淡訊號, 因為當人民幣轉弱, 港股沽壓就會增加, 今日國指結束三連強, 跑輸恒指, 過去三日恒指收市U盤都係踢高, 但今日卻走低, 代表獲利盤湧現, 今日港股臨收市才推上23500/9500整數大位之上, 未經沽壓考驗, 不能盡信, 明日會見真章, 企穩大位5天才能確認

按照慣性走勢恒指月尾6天不會全升, 如今已升了兩天, 過去兩個月恒指未試過周四五連升, 加上本周恒指只係跌了一天, 跌市日數未達標, 所有慣性走勢都預示明日要收跌

由於19/3低見21139反彈至今日高位23569, 累計反彈2430點, 已經夠水位俾大鱷轉身, 今個星期的周波幅1910點亦已達標, 不過按照慣性走勢, 周四或五係創新高的時間窗口, 所以明日恒指或會伸多一腳上去造頂, 即係會升穿今日高位23569才回吐, 前高位23631會是下一個阻力, 打開逃生門小心蟹貨出籠

目前只得中國的疫情紓緩, 其他國家正在加速惡化, 港股好難獨善其身一路殺上去, 或會是震盪上行, 當人民幣轉弱港股就會反艇, 當RSI升抵50就要留神, RSI上到55大市就危, 小心大鱷可能玩好淡通殺

支持位

上升裂口(22753~23062)
上升裂口(9237~9345)

今日恒指打破慣性走勢出現今次跌浪的首次連升, 又係跟美期玩偷步, 由於道指都係未試過連升, 估計今晚道指會續彈, 老外連續兩日大舉掃A股, 係中港股市連升兩天的功臣, 不過由於人仔再度轉弱, 如明日老外沽貨獲利, 利淡中港股市