8~14/4 跌下彈下

2020/04/08 19:42:26 網誌分類: 經濟
08 Apr

長假期沽壓效應, 港股結束兩連升, 消化沽壓, 儲力向上

8/4 周三恒指收23970, 大跌283點

一如昨日收市總結所說, 如果4月係收升, 好友主導大市, 亦未必肯花子彈全個月一直撐住高位到月尾結算, 會係跌下彈下, 殺/震牛養熊, 消化沽壓後再上, 不過17/2恒指見頂28055回落以來, 未試過連升兩周, 如本周收升, 就係連升兩周, 進一步確認好友主導4月市況

中港美三地股市通常係同步見底頂, 今次反彈浪, 如見中美股市見頂, 好友就要小心, 要留意大媽呢兩日於恒指升穿24000後係一路推升一路出貨, 今日於24191開出即插, 反映恒指於年度低位21139反彈逾3000點後獲利盤出籠

過去一個月港股不斷有配股活動, 亦係港股跌唔落的原因之一, 大行要托市來維持市場氣氛, 所以港股往往係一插即彈, 大鱷一路推升一路屠熊, 當牛牛養肥就要小心大市突然掉頭下殺

自從港股觸底反彈以來, 於尋頂期間每次跌完都會破頂而上,尋頂市每周都會有新高, 如出現兩連跌,又或者大跌超過200點後翌日無法收復失地,就係第一個利淡訊號,如收市失守10天線就係第二個利淡訊號,大市可能已見短頂,會嘔600-800點甚至千點,當上証見頂港股亦會同步見頂, 現時港股最大上升動力係月波幅未達標, 仍有上升空間, 以及熊肥牛瘦, 人民幣走強

港股成敗在人仔, 人民幣連升3日後今日掉頭向下, 港股亦跟住落山, 今早人民幣中間價大幅上升456點子, 不過最終低收, 收跌132點子, 報7.0682, 月初美元一路爬番上100水平, 幸好於101卻步, 人民幣才得以守住7.1大關, 當人仔轉強, 有助推高中港股市

要不是昨日下午美期爆升, 昨日恒指就應閃上24000阻力大位試水溫, 然後落番去23800, 養肥熊熊再上, 這樣的升勢才健康, 但昨午夾硬爆上24262, 升勢過急, 亦升過龍, 加上長假期沽壓效應, 隨即惹來獲利沽壓

以月波幅計, 港股已收復10及20天線, 走勢向上, 24262唔似係大頂, 相信只係回調整固, 震住上格局, 港股能反彈到哪個水平就要看上証,因兩地股市係同通常係同步見頂

港股今日回調整固, 消化沽壓, 反而有利後市, 按照慣性走勢, 收升月會在該月下旬創即月高位, 以月波幅2000點就要上24800/10000, 下一個阻力整數關口24500/10000, 12/3下跌裂口24657~25140及9817~10019阻力非輕, 要有好消息或上証爆上才能突破, 如無法突破阻力位就要慎防會掉頭大插,殺好友後再上, 總的來說, 全球股市於三月份出現股災, 四月係復活節, 在全球央行合力救市下, 四月股市就復活了, 散戶要好好掌握減磅的良機, 不要忘記股市正處於熊市

~~~~~~~~~~~~~~~~~~~~~~~~~~~~~~~~~

恒指跌1天後例彈

恒指由高位24262跌至今日低位23897, 回吐365點, 如果見短頂就要再插多一棍下試23800關鍵大位, 如果24262不是短頂就會三日內破頂, 尋頂市每周都會有新高, 不過要小心 月中會作出調整

10天線正不斷上移, 唔想失守就要再上24000, 港股能走多遠就要看權重股QQ能否升穿$390大關並進一步走高, 再上阻力就係$400大關, 滬大媽今日買QQ係好現象, 不過近日大媽已不是一面倒掃貨, 係一路推升一路走貨, 代表後市仍有隱憂,23000樓下有太多裂口未回補是後患

自從19/3觸底反彈以來, 恒指跌1天後翌日例彈, 未見過連跌兩天, 按照呢個慣性走勢模式, 明日就應反彈, 炒一周期權的好友亦要食胡, 今日港府的大規模保就業的救經濟措施亦利好市場氣氛,假期前後例牌大龍鳳,不宜遲持重倉過長週末,短炒博反彈亦應減磅

今日港股成交只得$945億, 昨日成交高達$1264億創高位24262, 大成交沖頂冇好下場, 今日就作出調整, 今日國指大幅跑輸恒指, 皆因今日老外沽A股食胡, 內銀內險A股全面下跌, 明日滬深股通關閉一天, 老外冇得沽A股, 希望A股沽壓紓緩上証可以乘機作出反彈, 上証能否上破2850是關鍵, 因為上証要企2850港股才有動力爆上, 否則只係虛火上升

原定3月5日舉行的第十三屆全國人大代表大會受肺炎影響推遲, 如果未來幾周開會, 或會有資金炒救市政策, 只要上証突破2850殺上去2900, 有望推動港股向上, 港股最大優勢係上証仍在低位, 仍有上升空間, 成為港股的後盾, 所以港股回調也不會深, 好友理應會守住23800, 震住上, 一路養熊一路推升, 如收市低於23800不妙,係見頂訊號

~~~~~~~~~~~~~~~~~~~~~~~~~~~~~~~~~~

黃金交叉利好訊號

早前預測本周港股會收升, 而按照慣性走勢, 收升周的高位多數會在周四五出現, 即係24262不是大頂, 不過由於本周恒指波幅已達標, 冇必要本周殺上24500, 因為要預留多些上升空間俾下周,

中港股市相關系數高, 港股不能獨自去偷歡, 要上証殺上2850挑戰2900, 港股才能登上高峰, 回顧3月中上証企2800樓上, 恒指就在24000水平, 上証企2900樓上, 恒指就在24500水平, 如上証失守2800就會拉住港股落山

有部分歐洲國家透露或會由下星期起逐步放寬抗疫措施, 反映肺炎疫情紓緩, 疫苗開發亦露曙光, 市場風險胃納上升, 外圍股市亦造好, 反映資金流利好股市, 不過普遍分析都認為只係熊市大反彈, 不應對後市過份樂觀,港股愈升就愈要小心大市突然轉向

港股10天線已升穿20天線, 出現黃金交叉利好訊號, 但逆向思維,出金义亦同樣代表港股已累積龐大升幅,獲利沽壓會加劇

隨著全球央行愈來愈多救市措施, 肺炎疫情亦有好消息, 基金經理及普遍投資者入市態度轉趨積極, 所以港股每次回吐跌一日即彈, 如見連跌兩天, 就要小心好友已鬆人, 近來當RSI上破50港股就腳軟, 亦受制於RSI 60, 如能站穩, 下一浪RSI就會上70, 到時就要小心會大插插

~~~~~~~~~~~~~~~~~~~~~~~~~~~~~~~~~~

尋頂之旅

港股於3月上旬股災式急瀉尋底期間, 淡友當道, 該時期收市U盤多數係走低, 19/3見底21139, 當20/3春分止跌回升, 轉勢向上, 當天收市U盤就開始頻頻踢高收, 反映好友已奪回主導權, 反覆向上尋頂期間, 偶爾作出調整, 但由於熊肥牛瘦亦限制了下跌空間, 因此港股冇再創新低, 目前熊多牛少, 港股正處於震盪上行階段, 估計4月會係收升月, 按照慣性走勢即月高位會在4月下旬出現

3月股災月恒指月波幅高達5666點, 點跌落黎就點彈番上去, 4月波幅就算收窄, 有2000~3000點月波幅都不足為奇, 22800+2000~3000點月波幅的話, 起碼會見24800, 量度升幅會見25500, 不過我認為5月不會上呢個水平, 大鱷會唔會打開逃生門益蟹民及技術派呢? 目前不斷下移的50天線在25300附近, 阻力非輕, 打個折扣暫定反彈目標24800~25000, 所以往後當上破24500就要步步為營, 留意有冇出現見頂訊號

不進則退,由於不明朗因素多,唔好淨係向上望,向下方面,如上証無法突破2850, 恆指亦會受制於24500整數關囗,就要落23500~23800, 假期前後例牌大龍鳳,月中係回調的時間窗口

港股想企穩24000/9800之上, 就要上証升穿2850再上2900, 亦要人民幣走強或肥熊配合, 才能向上推進, 否則夾硬沖上去都會打回頭, 每次港股作出調整都係跟住上証, 當上証見底, 港股亦會同步見底, 只要上証重拾升軌, 向上突破, 就會推動港股更上一層樓, 當人民幣轉強, 中港股市就會生猛晒

斬倉/洗倉/贖回潮已暫告一段落, 目前股市正處尋頂階段, 百年一遇的肺炎疫情大爆發導致全球股災, 迎來破天荒史上規模最大的救市措施, 淡友當然縮手, 好友奪回主導權炒反彈,但要慎防 熱錢來也匆匆去也匆匆,見好要收割, 暫定目標係挑戰25000水平

============================

港股高開高收呈陽燭, 大舉屠熊

9/4 周四恒指收報24300, 急升330點(最多上升338點)

國指收報9811, 急升129點(最多上升142點), 國指小幅跑輸恒指

今日尾市踢高收, 一則殺熊以免夜長夢多, 擔心復活節假期有變, 二則推高大市來預留下周回調水位, 未見頂前大鱷想守住23800~24000水平

港股問題在技術派一面倒上望25000~25500, 肥青/沈大屍/梁燈神全面看好, 反而要小心大鱷變臉大插殺埋好友, 震完倉再上

上証一直未能突破2850, 更遑論2900~3000, 一如我早前所說, 如上証腳軟, 港股亦難以獨自去偷歡, 因為港股想升係要靠A股推高H股, 近來內銀內險H股冇乜力水

下周才是月中, 有排都未到月尾結算, 復活節長假期後冇誘因一路殺上去25000, 如果大鱷唔想太早飛天, 要擴大周波幅的話, 有可能要再下試23800~24000, 今日滬深大媽不約而同沽出QQ, 係利淡訊號

軟銀早前透露要配售阿里巴巴套現, 近日爸爸反覆走高, 可能係大行推高股價再折讓配股, 成事當天亦唔知市場有何反應

賤美放水托市, 虛火上升, 埋下炸彈, 下次災難可能係債災拖垮股市, 所以我除了一路升一路減磅外, 亦想做怪客, 趁大市踢上去累積#7500造淡

========================

港股暗湧

今日港股雖然急升, 但其實對比12/3恒指收24309的水平, 現時內銀內險係跑輸, 大市有暗湧, 博反彈見好要收

恒指於復活節前夕(9/4)收24300

恒指於12/3股災期間收24309

上述兩個日期多隻指標股的收市位對比, 反映今次反彈浪並非由內銀內險領軍, 如持貨要小心, 見好要收, 不宜重倉, 因為港股要飛天, 必需要有內銀內險做後盾, 否則根基不穩, 隨時會見頂掉頭大插插,

港股慣性走勢係一路反覆尋頂, 明明升得好地地, 但見頂後就會失驚無神大插急瀉, 令好友走避不及, 而淡友亦來不及部署買跌, 大鱷就可以好淡通殺, 目前係股災期, 入市要小心, 近來普遍財演及分析高手都唱好大市, 要慎防大鱷玩逆轉來殺好友, 23000樓下的上升裂口是後患, 早晚要回補, 只係等利淡催化劑

騰訊 收$391.4 (12/3 收$363.6)
中移 收$61.6 (12/3 收$55.45)
建行 收$6.27 (12/3 收$6.33)
平保 收$76.25 (12/3 收$81.35)
國壽 收$15.68 (12/3 收$16.24)
友邦 收$71.6 (12/3 收$68.8)
港交所 收$247.4 (12/3 收$238.4)

============================

港股高開高收呈陽燭, 大舉屠熊

14/4 周二恒指收報24435, 升135點(最多上升246點, 一度下跌17點)

國指收報9847, 升36點(最多上升90點, 一度下跌15點), 國指跑輸恒指

恒指續創即月新高24546, 但一如日前所說, 港股有暗湧, 國指上升乏力, 已是連續6日跑輸恒指, 係利淡訊號, 內銀見沽壓, 內險亦乏力再進, 會拉住港股後腿, 所以今日港股沖高回落, 收窄升幅, 要國指強, 港股才會好, 否則夾硬踢上去亦只係虛火上升, 如市強好友力守23800~24000水平, 回吐後就會再上

按照慣性走勢今日高位24546不會是頂, 明日會有新高, 向上阻力為12/3下跌裂口24657~25140, 不進則退, 如未能突破阻力位, 就要隊穿今日低位24283來擴大周波幅, 上到關鍵阻力大位小心好友趙完鬆, 要下試23800~24000, 月中是回調的時間窗口, 目前RSI在55~60的高危區, 要慎防升得好地地突然反艇, 係大鱷的一貫好淡通殺手法, 後市要看港股會否以窄幅波動來代替深度調整, 跌下彈下, 撐到結算

今日QQ高見$397.6, 我有諗過係$400關口熊QQ, 不過近期升浪大鱷主力靠QQ領軍, 而大市今個月仍未見頂, 所以我唔敢熊QQ, 過去一個月港股的反彈浪, 見資金泊入受經濟衰退影響較細的科技股, 新經濟股成撐市功臣, 所以QQ跑贏大市, 後市要看好友會否繼續利用QQ撐市, 能否上企$400, QQ由3/4起, 底部不斷上移, 走勢靚, 近日更上破$390阻力位, 作勢挑戰$400關鍵大位

今日滬深大媽不約而同沽出QQ獲利, 但QQ收市仍錄得升幅, 收$395, 升$3.6(+0.92%), 反映買盤強勁, 看來大鱷推高港股殺淡之心未變, 貼價熊命危, 不過當牛牛上移及養肥就要小心, 如有調整, 市強通常吃1~2口牛大市就會急彈, 不會在低位徘徊

肥青今日又講短線會見25000, 技術派一面倒向上望, 要小心大鱷變臉大插殺埋好友, 油組會議講掂數減產, 但油價見光死, 油股下跌, 港股又跛左隻腳, 其實近日多隻指標股沖上去成交縮, 代表上破24500買盤縮, 沽壓增加,

最新回應

史哥
史哥 2024/03/28

下月關鍵位為~ 16561 

向上 16561 17057 17569

向下 為 16064 15582

{#iconb_22}

門徒
門徒 2024/03/28

166對後市有一定指向性 {#iconb_22}

門徒
門徒 2024/03/28

嘩...乜挾到咁高既 {#iconb_61}

美味雞煲
美味雞煲 2024/03/28
@soho*...

元帥,咁我避開桂林先😄 冇諗過去貴州丫,但可以考慮嘅之前我就係三月去桂林,天氣一般亦都去睇過苗族表演,所以貴州可去可不去 ☺️ 可能有啲地方好靚我要深入了解吓先 🤭 想去嘅地方有四川、西安、西藏、新疆、雲南同北京,分兩次去😅🤣 

門師兄,快啲玩熟CFD等你帶隊🤭😚🙏