五窮月勁Chok玩短炒
2020/05/04 04:13:09 網誌分類: 經濟
美股在香港假期連續第二日下跌，三項主要指數跌至一個星期最低，美國PMI大幅下挫，加上總統特朗普威脅提高中國關稅，加上企業業績欠理想，拖低美股。杜瓊斯指數上周五更單日下跌622點，收報23723點；標普500指數下跌80點，收報2832點；納斯達克指數下跌284點，收報8604點。
預託證券顯示大幅低開
總結一周表現，杜指和標普500指數都是跌0.2%，納指跌0.3%，三項指數都是連續第二個星期下跌。不過，4月份美股表現不弱，標指飆12.7%，是1987年1月以來最佳；杜指上揚11.1%，創33年來最佳單月表現；納指勁升15.5%，是2000年1月以來最強。
由於美股接連兩日低收，市場恐慌情緒因為數據欠佳同特朗普打口水戰升溫。港股在美國掛牌的預託證券反映港股周一復市會低開近千點，實際會否咁差仲要真係開市時才見真章。
特朗普聲稱要加關稅作為中國播疫的賠償，甚至回應註銷中國所持美債的說法，話現階段毋須考慮。這個說法有點嚇人，令外國市況急挫。
近期港股未必完全承接外圍走勢，而係會睇內地A股，年後就睇美股期貨表現，另外特朗普說話五時花、六時變，若然美股因為中美貿戰復燃急插，他可能又會轉口風。如果指數真係大幅下挫過千點，相信會有投資者會考慮低吸，趁5窮月走走短線。
過去炒股節奏係年頭例旺，年中轉淡，跟住到年尾又再炒上。這個節奏的出現，同公司消息和資金流向有關。年頭基金開始新一年帳薄，態度通常進取些，期望先做出一些成績，同時年頭會報告去年業績，跟住就派息除淨，於是基金經理在3、4月跟住消息炒作。去到5月，消息出得差不多，股價又炒了一陣，於是大家停一停手，等個市調整，休戰得一、兩個月，到7月份又開始炒上半年業績，然後9月、10月又唞唞，到年尾就炒高個市埋數，方便分花紅。
今年全球經濟運作因為疫症完全打亂，頭一季公佈業績大家根本無心戀戰，好多公司4月份已經發出盈警，甚至預告上半年都會虧損，所以原先炒作的3、4月份變成反高潮。同一時間，市場開始消化上半年經濟停轉的消息，對業績不抱期望，所以最近幾間公司好似滙控（005）、渣打（2888）、中石化（385）都係盈警後股份趁壞消息反彈。
立會選舉成不明朗因素
中環茶友話，上半年係非常情況，十間公司九間生意都大受打擊，市場不會有寄望。投資者焦點落在未來復常後公司的表現。現在不少公司股價在比1年高位低3、4成，甚至5、6成，估值反映了今年無錢賺的衝擊，所以如果業務無受永久傷害，投資者已經收貨，所以今年炒股的節奏，和過去差異好大。
茶友話，今年炒股另一個不明朗因素係9月份的立法會選舉。雖然係疫症期間社會運動稍為緩和，但過去一個星期黑衣人重新活動。由於今次非建制派擺明要爭取在立法會過半數議席，估計在選舉前社會氣氛又會轉激。選舉過後若然立法會主導權落在非建制派手中，政府同議會天天開火，本地投資環境會持續不明朗。從炒股角度，今年時局亂過亂世佳人，能夠短炒的日子不多，所以如果本地確診人數繼續歸零，外圍又無大鑊爆出來，5月可能就係短炒的窗口。
對於有興趣短炒的投資者，會問有甚麼目標。從全球疫情同經濟狀況，內地最先爆出新冠肺炎，但北京以重手防疫，令中國經歷疫情打擊的時間是大國中最短，而且復元最早。現在內地開始全力催谷復工復產，感覺相對良好，故此中資股短期投資價值較值得留意。好似中石化煉化（2386）最近一級級彈高，股價升得急可能會回調一下，投資者可以睇住個圖買賣。
香港控疫相對成功，雖然遊客來港或出口會受外圍拖累，但本地消費若稍復，至少可以靠內需圍爐取暖，無奈係社會不穩因素有可能又至，所以本地股短炒可以，中線波動在所難免。
本地股本港連續多日零確診，經營海港城等大商場的九倉置業（1997），上月最後一個交易日彈2.7%，收報32.75元，為最強勢藍籌股。如果不是爆出特朗普口水戰壓低美股，本地消費股係落後板塊，長假結束後有可能會追落後。
醫藥物管值博率在下降中
短炒除了睇有甚麼股好買，同時也要留意有甚麼股要避開。醫藥股今年大超班，但若然疫情紓緩，加上開發藥物的成績愈來愈接近揭盅，若然炒得高又交不出功課的股份有可能會大幅回落。假期前，近月強勢的遠程醫療股平安好醫生（1833）急插，收降6%，報107.4元，不排除有資金開始食胡鎖定利潤。醫藥、內地物管這些升得多估值又高的股份，短炒值博率似乎正在下降中。
電視廣播新主席是典型香港仔
電視廣播在假前舉行董事會，選出新主席，結果由許濤接替殼王陳國強。許濤是何許人也？有中環茶友笑言，不要見到個名兩個字就以為他是內地人，此君現年四十出頭，父親是華僑，幾歲就來了香港，算得是香港仔。
許濤在香港讀書，在名校華仁畢業，之後去了美國放洋留港，然後加入過麥堅時顧問同高盛，路徑同好多香港讀書讀得叻的精英相似。近幾年他就加入華人文化基金，成為基金話事人黎瑞剛的愛將。隨著基金入股電視廣播，他成為大台董事。這次殼王以退休為由交棒，他順理成章接任。以這個年紀繼邵逸夫、方逸華同殼王後執掌本港最大電視台，實在後生可畏。
許濤接任主席，同一時間行政總裁李寶安獲委為副主席。李寶安由亞視轉到無線，擔任總經理後在眾多要員中跑出，成為行政總裁，今次再加副主席銜頭，成為一人之下，千百人之上的傳媒大哥大，盡顯電視圈不倒翁的功力。
大台今次一老一嫩配搭，主席擅長公司財務，李寶安是會計師出身，多年在電視業浸淫，應付過不少危機。今年電視廣播既遇著經濟大環境衝擊，又遇上反修例人士圍堵，新董事會說得上是迎難而上，小股東自然期望新組合能夠有神奇的化學作用，令公司盈利同股價有日可以回春。
陸羽仁
回應 (0)
我要發表