4~6/5 立夏止跌回升

2020/05/04 21:55:31 網誌分類: 經濟

04 May

港股低開低收呈陰燭, 失守10.20.50天線, 大舉屠牛

4/5 周一恒指收報23613, 暴跌1029點(最多下跌1059點)

國指收報9599, 暴跌441點(最多下跌460點), 國指大幅跑輸恒指

賴朗普一句打算加徵中國新關稅, 全球股市應聲倒下, 港股大成交下挫, 投資者爭相走鬼, 不問價沽貨, 大鱷真係奸險, 大裂口低開748點, 開市後續瀉, 一跌到尾, 好友不得不投降止蝕, 今日港股暴跌構成「島形頂」強烈利淡訊號，進一步確認上周三升穿50天線係假突破, 只係為了結算夾硬推高大市,

今日港股大插, 肥青等技術派所說的25000~25500已成泡影, 消化沽壓後能否再闖關就要看上証生唔生性, 因為2000點月波幅的話, 5月就要睇23000~25000爆哪一邊, 上証收2860, 已突破2850關鍵阻力位, 只要上証守得住2850上破2900, 恒指就可重上24000並挑戰24500

收跌周多數在星期一二見周頂(可能會受內地休市而影響慣性走勢, 要看會否周三彈上去才創周頂), 周三四五見周底亦未必跟, 因為本周會受內地休市影響已擾亂了慣性走勢

明日關鍵在能否升穿今日高位23897來擴大周波幅, 因為今日港股一棍插得太過份, 跌勢過急, 淡友似乎想趁內地休市, 冇A股制肘, 港股亦冇大媽護盤, 乘機偷雞殺跌, 大鱷就順勢大舉屠牛, 上証長假期前急升, 突破關鍵位2850, 收2860, 淡友亦會有顧忌, 可能呢兩日食快餐趙完鬆

如明日反彈, 就要用今明兩天(或周三)的最高位來減一般周波幅(通常有800~1000點), 就可估算本周底部, 同樣地, 如果昨日23585已見底的話, 就要加800~1000點來估算本周頂部

明日關鍵在QQ能否守住$400, 建行能否守住$6, 只要守得住, 就代表港股不會深潛, 淡友會否在內地後日(周三)復市前, 又或者今日已食胡, 明日或會拿拿臨食胡回補空倉, 今日港股技術指標雖然轉淡, 但亦不應太悲觀, 就算市弱每周都會有1~2天收升, 打開逃生門

由上周高位24855跌至今日低位23585, 跌幅1271點, 已夠水位俾短炒大鱷轉身, 因為通常嘔1000~1200點就會反彈, 24000大位亦不會一去冇回頭, 會有吻別, 反彈阻力24000/24176, 要收於其上大市才回穩

收跌周不會在周一開市造底, 亦不會在星期一見底(但可能受內地休市影響, 已一步到位創本周低位, 本周會否破底就要看未來幾日彈上去能否做夠周波幅),

一如早前預測5月市況, 將會是風高浪急, 大上大落, 期指呈低水部份是受了成份股除息影響, 5月份有大量成份股除凈, 期指部份低水是受成份股除息影響, 見期指低水現貨亦未必走低, 港股本周會否創新低要看美元會否上破100, 人民幣能否守住7.1, QQ能否守住$400, 最關鍵係睇周三內地復市表現, 如上証企定定冇插就利好港股, 當然亦要睇互聯互通老外及大媽的手影,

股神畢菲特投資旗艦巴郡公佈首財季業績,由盈轉虧,期內虧損497.46億美元(約3880.2億港元)遜預期,去年同期賺216.61億美元, 連股神都虧蝕, 怪不得其他基金經理及大鱷都輸到嘔

大鱷操控港股的手法係好淡通殺, 好友淡友都不能獲利, 盈利未袋穩就會嘔突, 連環大插插殺好友(3月中股災), 然後止跌回升, 拗腰接連爆升殺淡友, 淡友於股災大賺的盈利嘔番晒出來, 當3月尾展開一個月的反彈浪, 好友滿心歡喜大賺, 但4月中就失驚無神掉頭大插殺好友, 好友由賺變蝕, 今日果然歷史重演, 今日港股大插, 熊熊下移, 大鱷食飽牛牛隨時可彈上去屠熊

${#icono0_51}$ ${#icono0_51}$ ${#icono0_51}$ ${#icono0_51}$ ${#icono0_51}$ ${#icono0_51}$ ${#icono0_51}$ ${#icono0_51}$ ${#icono0_51}$ ${#icono0_51}$ ${#icono0_51}$ ${#icono0_51}$ ${#icono0_51}$ ${#icono0_51}$ ${#icono0_51}$

港股高開高收呈陽燭, 成交急降, 大龍鳳先兆

5/5 周二恒指收報23868, 升254點(最多上升315點)

國指收報9698, 升99點(最多上升130點), 國指小幅跑輸恒指

感覺上昨日港股暴跌係大鱷趁大媽不在偷雞殺跌趙完鬆, 所以預測今日會向上擴大周波幅, 本周會再上24000, 淡友亦可能於昨日臨收市隊多一棍創低位23585時已食胡,

~ 受內地五一黃金周休市影響, 估計本周唔跟慣性走勢於周三四五創本周低位, 周一低見23585已見周底, 向上擴大周波幅尋找周頂, 市弱彈600~800點, 市強彈1000~1200點, 23585+600~1200=24185~24785, 巨型下跌裂口在23897~24549, 保歷加通道頂在24743, 通道底在23399

~ 如計恒指800~1000點周波幅, 本周反彈目標將會在24185~24385~24585, 如5月跟4月走勢, 可能係跌下彈下, 在10及20天線穿梭, 好淡通殺

~ 今日轉節氣立夏, 港股止跌回升, 指標股QQ冇創新低, 守得住大位$400, 代表港股已完成調整, 本周不會隊穿23585創新低, 亦守得住4月下旬低位23483, 好友健在,

~ 上周五收24643, 本周一暴跌可能係震倉, 先落山殺牛1045張, 然後上山屠熊, 好淡通殺, 好過周一夾硬沖上25000殺熊就會放生牛牛

~ 昨日港股反艇, 其中一個原因係離岸人民幣急跌, 內地休市, 冇在岸人民幣做參考, 如果明日人民幣不跌反升, 又或者企定定, 就利好中港股市,

~ 一如昨日所說, 上証於長假期前向上突破, 收2850之上, 港股佛誕假期仍未反映, AH股同步的話, 港股就應追落後, 上証守2800並上企2850, 恒指就應企24000之上,

~ 昨日港股急瀉創新低, 今日底頂上移急彈高收係利好訊號

~ 昨日港股急瀉呈大陰燭及島頂形態, 大鱷不但殺牛逾千張, 全城看淡, 亦吸引熊熊飛撲入市, 大幅下移至可屠殺範圍, 23900向上每百點都熊, 今日大鱷亦吃了一口小熊6張, 果然係好淡通殺,

恒指低開高收, 單日轉向呈大陽燭, 大舉屠熊

6/5 周三恒指收報24137, 升268點(最多上升366點, 一度下跌0.64點)

國指收報9807, 升109點(最多上升151點), 國指小幅跑贏恒指

人民幣暴跌440點子, 收報7.0959, 7.1危危乎, 港股收市U盤沽壓大增, 尾市升勢轉急可能係好友夾硬推高食胡, 早前估計本周收跌, 看來未來兩日淡友會反擊, 按照慣性走勢周四五不會全升, 而且恒指已連升兩天, 過去三個月恒指兩連升後多數斷纜, 即係明日收跌才符合慣性走勢, 港股本周會否再試底就要看上証表現, 只要上証守得住2850, 本周港股就不會破底

港股表現遠勝ADR除了受內地股市造好帶動外, 亦係因為要托市來俾中資企業配股, 推高QQ來撐市, 不過QQ高見412.2就打回頭, 今日高見24235, 已進入本周反彈目標範圍24185~24385~24585

周一的巨型下跌裂口在23897~24549, 目前已回補至24235, 在目前市場氣氛下本周不會全數回補, 不過以周波幅計, 月中應會全數補回裂口, 市弱彈600~800點, 23585+600~800=24185~24385, 今日累計已反彈650點, 只係勉強達標

今日港股雖然急升, 但內銀內險卻暗地裡捱沽, 有托沽味, 美元走強, 升穿100大關, 人仔弱利淡中資股, 老外及大媽齊齊走貨, 內銀內險A股大跌, 相關H股上升乏力, 國指未能大幅跑贏恒指, 代表再上乏力, 今日港股是否吻別10及20天線和24000, 明日見真章

按照收跌周的慣性走勢, 不會在周四五創周頂, 如今日高見24235已見頂,
就算再上也走不遠, 24400~24500會見阻力, 如要落山, 向下支持24000/23800, 近日恒指即市波幅收窄, 只得230~410點

${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$ ${#icono_72}$