東拉西湊講孔子後人

孔子，無可否認是聖人，但也不過是一個人。他或許是很聰明，很有家教，但家族流傳下來，傳到了今天，當中還有多少孔子先天DNA和後天教育，那就很成疑問了。超級政治蠱惑仔劉備尚且可誕下個扶不起的阿斗，何況孔子七十幾代之後的後代？

話說，孔子有個後代在台灣，廿幾歲，讀到碩士畢業，駕著電單車，背後載住條女，狂飆之下仲夠膽死扭轉身同條女傾偈，前面忽然走出一個七十幾歲阿婆，呯嘭一聲，撞到阿婆飛起，死埋。剛發生車禍時，他可能驚得滯，警察問乜就答乜，認晒罪。到左法庭，竟然推翻自己口供，「我去救阿婆之嘛，居然被人當賊辦！哼！以後我見到有人受傷，我都唔救喇！」有目擊證人喎。「個證人近視架！佢睇錯左唧！」最後，衰左，話之你係孔子後人都要收監。

撞死人仲要砌辭狡辯，呢d叫乜野呢？不肖？小人？非禮勿言？當然都無錯啦，但令祖幾千年前其實已經下了七字的評：「巧言令色，鮮矣仁」

當然，你可以話樹大有枯枝，孔子後人的確不乏名人，乒乓球員孔令輝、粵劇名伶孔令馥（藝名謝雪心）、近代圍棋高手孔祥明，都是孔子後人；當然還有那個民國時期腐敗刮財、以權謀私的孔祥熙。

順帶一提，曾聽人說William Hung孔慶翔都係孔子後人，都唔知堅定流。莫非姓孔的全部都係？真係好驚孔咯！

世間事，總是物以罕為貴，XX後人雖然好巴閉，但如果數目比想像中多，那就不太值錢了。

我就差了一點，翻開歷史書，好像沒多少名人是我的「疑似祖宗」，最巴閉那個，只是那位蜀中無大將時唯有推佢做先鋒的－－廖化！近代好似有幾件，但大纜都扯唔埋，一個廖本懷，一個廖暉，一個廖秀冬，哈哈，仲有廖碧兒！真係……勁唔掂！