筲箕灣撞山妖同洪聖廟洪聖爺顯靈(拜神要小心)

我家姐半年前驗到條頸有個腫瘤,唔知良性定惡性,
佢聽人地講去少人既廟拜會特別靈,
於是佢自己去左筲箕灣後山上面間廟(唔係洪聖廟,係山上面間乜神都有既廟),仲應承好番會還神.

我家姐離左婚,我同佢同埋佢個女一齊住,佢入院,我幫佢鄒住個女.
後來佢做完手術第二日佢個女就狂喊,仲喊到發燒,話見到有人o係屋企,嚇到我死.
之後幾晚,唔係晚晚,但係間唔鐘佢就喊.
我自己都聽到幾次敲門聲,敲完幾下成晚就唔會再敲.

我家姐後來講話佢拜過神話會還神(需然唔知點解班神急成禁,要人做完手術即日還神),
我即刻買份寶去還神,點知仲大鑊...

我去到後山,見到直上間廟條樓梯有個道友吸完毒o訓o係度,
於是行右邊條樓梯,
明明見住條樓梯係上間廟,但係行極都行唔到,
行行o下連間廟都唔見埋,越行越唔對路,
成座山本身好細,但係行到對腳好酸,
睇一睇個電話,應該行左差唔多八九個字,
上去其實應該淨係要十分鐘.
因為沿途有幾個神牌,爛左既神像同埋馬桶,好得人驚,
而最得人驚係行極都唔似行錯路,返左原位,係行極都唔同,行極都仲有,好似越行越深,但係一直都係上緊樓梯.

我真係好驚,於是掉頭落山,過多一陣,再望電話,見到已經再行左成四個字,真係好驚.
點知突然聽到有d怪聲,好似人扮雀仔叫,
個時覺得有人好過死o係山上面,
行落o的,見到好怪既事.

樓梯之外,山上面本身冇乜空地,
但係有7-9個細路,全部著白色t,黑褲,四個屈埋o係樓梯左邊,淨返個幾個係樓梯右邊,企o係個石膊度望,
全部都係短頭髮,
班細路講緊野,但係好似扮雀仔叫,右邊班細路笑緊,但係都好似扮雀仔叫(係扮雀仔叫,唔係真係似雀仔叫聲)

需然日光日白,但係我已經好心寒,企左一陣終於把心一橫,落去問佢地.
一開口,突然有個著紅衫既人o係我後面走過黎,對我o殊一聲,跟住招一招手叫我跟住佢.
個人係後生仔,著件紅色有帽外套,牛仔褲,有鬚根,面色蒼白,
佢行埋班細路度,又係對佢地o殊一聲,但係個音調好怪,又係高音左,好似變埋雀仔叫,
跟住叫我行,有兩個細路仲望住我地,但係冇跟黎.
行左一兩分鐘,轉個彎,已經見到山下面個公園,
有兩條路,一條有棵樹o訓o係路中間,一條又要兜右少少先落.
但係明明兩條都清清楚楚見到落山,
佢一見我望右邊冇棵樹條路,即刻話(有樹條路)呢條先係落架,o個條返轉頭.
我已經行到冇力,當然唔敢試.
跟住行到落山,佢淨係講句唔好再黎啦就行走左.仲行得好快.
我已經冇力所以坐o係公園櫈.

點知惡夢仲未完...因為我由頭到尾冇還過神...

o個晚,家姐個女照喊,我一帶佢出去廳又照聽到有人敲門,
今次o係我家姐間房入面有人敲,家姐個女都聽到,仲話有牛牛.
結果唯有一齊o訓,聽朝揾風水老.

夜晚發夢,落左樓下見到後山班雀聲細路,但係個夢係完全冇聲,
行近o的,佢地居然全部係動物頭,
唔單止有牛頭馬面,係十二生肖動物,但係唔齊,
需然記唔清楚,但係肯定冇龍,蛇,雞,有牛,馬,豬,兔,
淨低o個幾個真係唔記得係乜.
跟住唔知點解又變左o係後山,仲成個後山都係香圍住條石梯,
我又跟住佢地行上去,見到帶我落山個後生仔坐o係一塊石膊,o訓緊.
跟住突然好嘈(之前完全冇發現周圍冇聲),
有牛叫聲,個後生仔醒左,仲對班十二生肖話又帶佢(我)返黎做乜,
佢又同我講,你(我)仲未落山o羊?行過一次仲唔識路?
跟住就聽到有人禁屋企門鐘,醒左.
一行到門口,居然見到度門自己鎖緊.

第二日,揾完一個又一個風水o老,道士,
又話惡鬼,又話阿爸阿媽返上黎接我家姐,又話心理作用.
終於灣仔揾到一個識請神既師父講得出乜事,仲知道好多我冇講既野.

佢話我家姐拜多左,除左神仲拜左後山d山精,又應承山精會還神.
個紅衫後生仔係山下洪聖爺廟既洪聖爺,見到我比山精捉左先救我,
跟住最得人驚係佢話要請神傾,點知佢居然扮雀仔叫(我冇同佢講過後山班細路扮雀叫).
最後佢話洪聖爺話我同我家姐都有魂魄比班細路(山精)收埋o係山,
叫我還神比山下洪聖爺,我地全家以後都唔好再上後山.唔好上山還神,
仲有我一世都唔可以食魚同海入面既o野(唔知點解,更加唔知點解係我唔係家姐,況且我好鍾意食魚).

化完寶,還完神,真係再冇怪事.
問返家姐先知道幾樣o野,令我更加信洪聖爺救左我地兩個.
原來我家姐落山時留左幾枝香拜石梯邊個爛觀音像同神牌,照樣應承會還神,同大師講拜多左完全符合.
我發惡夢比山精引返上山個日,我家姐o個晚有一刻個心跳得好快,呼吸唔到,又突然冇事.
我家姐問個女o係屋企見過乜(我唔敢問,驚嚇親細路女),佢話有個好快既人,著紅色衫.
最神奇係佢原來手術後係驗到仲有o野但係唔想講比我地聽,但係我拜左洪聖爺之後佢化驗結果居然乜事都冇!

而更奇怪既係我家姐根本由頭到尾反而冇拜過洪聖爺,淨係拜山上面o的神.