木水火
木水火
木水火

賣國試題也覆核 香江學生真冇譜

2020/07/04 13:00:01 網誌分類: 時事
04 Jul

賣國試題也覆核 香江學生真冇譜  {#iconb_234}

依家啲學生忽然又變得好進取敢言喎!當年魯迅對民眾嘅態度係「哀其不幸,怒其不爭」;功夫茶都相信,中國人就係太多幻覺,以為自己可以苟安、混世,天冧下來自然有高個子頂住,自己唔行善都可以得到善嘅環境!如果魯迅睇到當今啲學生竟然有一、兩個咁有「正義感」,唔知佢老人家對民眾嘅苟且態度會否改觀呢?  {#icons_dog10} 

是咁的,考評局早前取消本年度中學文憑試(DSE)歷史科一條涉及中日關係嘅題目,涉案題目問考生是否「同意1900年至1945年間,日本為中國帶來的利多於弊」。呢條三分題竟然引起連番爭議,可謂「一題激起千里浪」!日本侵華,虐殺我子民、凌辱姦殺無數婦女,點分析都係只有弊喇!出題者顯然用心不良,擺明賣國!功夫茶只能「惡其卑鄙,怒其混帳」!  {#iconb_24}

教育局眼見爭論不休,網上討論區更多粗鄙例子,甚麼「老婆做雞利大於弊」;嗱,眼見咁「討論」落去,只會引來離題萬丈、言不及義,教育局覺得保持沉默唔係辦法,於是決定揮慧劍,斬咗呢條「弊多於利」嘅試題,合乎「割斷歷史是不行的」呢個大原則!阿哥,一條三分題,要分析從一九○○年至一九四五年嘅中日關係是否「利多於弊」,仲唔係玩嘢? {#icono_38}

點知有個中六考生竟因此提出司法覆核,指考評局取消試題嘅做法,係基於只有一種歷史觀,會引發起寒蟬效應喎!嘩!果然「香江生氣恃風雷」,功夫茶都唔使學龔自珍對天狂呼:我勸天公重抖擻,不拘一格降人才咯!香港教育,近年其實唔係只出廢青!一味食飽冇憂米,以為「香港獨立,唯一出路」係「利多於弊」,而睇唔到自己想「獨立」都冇能力,真係「獨立」,十成十餓死街頭呢個殘酷現實! {#iconb_366}

呢,覆核人仲大義凜然,指考評局有既定嘅檢討機制,局方取消試題決定前,並無依從相關程序!仲有吖,特首及教育局局長對事件表態用語強烈,佢認為係向考評局施壓喎!果然係正義學生哥!考評局就回應指局方委員會嘅決定係「學術判斷」,未有證據顯示屬政治決定;又指本案爭議狹窄,不會造成寒蟬效應。其實,邊有咁易造成「寒蟬效應」啊!七一國安法已刊憲生效,啲示威暴徒一樣當警方舉紫旗警告冇到! {#icono_39}

之不過,正義學生哥雖然敗訴,但從另一個角度,大家睇到香港仲係地靈人傑,唔係淨係出啲「叫人衝,自己鬆」嘅狗熊,唔係一見《港區國安法》一出,「兄弟爬山,齊上齊落」即刻驟變成「田雞過河,各有各撐」嘅冇膽政治小學雞!至於考評局當初竟然畀呢條試題出街,肯定大有問題,教育局呢隻無牙老虎,幾時先肯正視呀?  {#iconb_233}

功夫茶

https://orientaldaily.on.cc/cnt/news/20200704/00190_001.html

回應 (1)
我要發表
321
321 2020/07/04 23:38:11 回覆

泛民一眾黃師,黃校長,教育界黃人大搞一輪程序公義,要死也要賴地一番,等普罗市民弧疑一番是对是錯,蠱惑眾人視線,最後不了了之,又逃过了譴責!!

user