裝修名人堂 楊師傅 真誠勤奮三十歲月 好心態成就好工程

2020/07/29 00:17:11 網誌分類: 生活
29 Jul
裝修名人堂 楊師傅 真誠勤奮三十歲月 好心態成就好工程

楊師傅在裝修工程行業打滾三十餘年,依靠著漫長歲月的經驗,成就了今天這位真正的老師傅。

從鄉下做工程來到香港,裝修工程每一範疇都動手深入學習過,楊師傅坦言這一份工作,不是人人能做好的辛苦工。「做裝修始終係做粗嘢,辛苦同時又要有技巧。唔係隨便話做就做到,係要浸出嚟。」

「裝修幾辛苦冇人知,裝修唔係每part都好搵,有啲真係捱同浸出嚟。但係接得張單返嚟,幾困難幾麻煩都要拆掂佢,唔縮得,要完美咁完成佢。」他從不看輕每一項工程,裝修從來不能避重就輕,每一部份都要細心認真裝修,這才對得起客人對你的信任,亦因此客人對楊師傅非常滿意。

好心態成就好工程 監工睇清師傅真本性
「做裝修最緊要心態好。」楊師傅多年觀察師傅的經驗,直言心態不好難成好師傅與好的裝修團隊。「呢度做幾日,嗰度做幾日又唔做,師傅唔夠認同細心,就成個地盤都慘啦。心態好嘅情況之下,人哋會留意到你,你又可以俾到好嘢人。」

同樣一個好的監工師傅也很重要,監工如「睇人」,了解每位師傅對裝修的心態是否良好。 。「做監工,你要知道到你啲師傅嘅功力,例如呢個泥水師傅好叻嘅,你講兩句交帶下就得,如果係唔太叻嘅泥水師傅,砌幅磚牆砌得唔好,真係要教要睇實。你由佢做到乜乜斜斜,四條邊都唔平,高高低低咁,人哋點收貨,點執姐?」

以觀察集大成 從不忽悠每位客人
監工要觀察,動手做也要學觀察,楊師傅從小就掌握這技巧。問到他所擅長的項目,楊師傅笑言到這個年紀,應該要十項全能。「做咗咁多年應該要範範都叻啦,因為真心努力捱好多年,認真學認真做。」

「以前班底冇工木,我哋做櫃仔,自己鬥木自己砌,而家全部都廠嚟囉。我以前做泥水,落到嚟電又做水又做,油漆做木工都做。」

「仲要醒目啲,睇多啲先識得做,望多啲師傅點做。睇得多會觀察到有啲師傅好叻好聰明,佢可以慳好多工,佢啲手法做出嚟仲靚仲正,就要學佢。」

「好似做油漆咁,揸筆手勢揸得靚啲,油拎得多啲,髹落去就好順。如果你落少啲油,揸筆唔好,手震,分分鐘髹十下八下都唔靚,人哋髹兩下就ok。真係一邊睇一邊學。」

透過不斷地觀察,會發現裝修確實是一門工藝,也不是隨便能忽悠過去的。「慢慢就會覺得做呢行好有技巧好有藝術,唔係話做就做到。」

「其實,睇得多,就算未做過,都大概知點做,會知邊度平唔平,邊個師傅叻唔叻,睇地盤多就知,好似我老婆咁,哈哈!佢之前喺地盤做雜工掃下地,依家師傅叻唔叻佢一睇就知,佢有時會教返師傅要點做點做,叫佢做佢當然唔識做,但佢識睇。所以唔好以為可以呃到啲客,啲客會睇得出,做就全力做好佢。」

克己寬人 通情達理方成好師傅
能當老師傅有自己班底且備受敬重,楊師傳兩大原則,克己與寬人。「我依家做唔做好閒,但我依家都一定會落手做,我唔會只係行行企企,都會執下頭尾。人哋架車好靚,我架車係用嚟放架生,做呢行唔勤力搵唔到食。呢個我原則,我哋經營方式。」

寬人則是對待客人的態度。「我只會計大數,細數從來唔計。每個師傅都唔同,有啲師傅鑽個窿都同你計,我唔會,日後好相見嘛。其實大家走盞下有咩所謂,啲細數算啦。姐係加裝個窗簾你冇理由加人哋錢?」

「做人係咁,賺唔可以賺到盡,咁樣同客人個感情就會好,樣樣講到錢咁就冇意思。我教仔女都一樣,唔好搵人著數,你搵人著數就冇後路,蝕底少少唔壞,係好事。因為我哋賺嘅係大數,你蝕少少俾人哋係通情達理。」

楊師傅一生給了裝修,從沒離棄。以刻苦耐勞的個性,在裝修工程界中堅定前行。

想裝修屋企/維修家居?登記「裝修佬」免費裝修報價,24小時內專人回覆,為你推介最適合你的裝修公司。
回應 (0)
我要發表
user