Kelly Chu
Kelly Chu
Kelly Chu

上環金舖外市民大排長龍 「炒完大長金 再炒大長銀」

2020/08/11 04:12:16 網誌分類: 生活
11 Aug
          各國狂印銀紙,超低息環境下,資產受追捧,無郁一段時間嘅金價,喺呢幾個月係咁爆升,Kelly昨天行過上環一間老字號金舖,見到有人排長龍,以為佢哋買金,點知一個嬸嬸話︰「炒完大長金,再炒大長銀」,原來佢同其他人一早嚟排隊買白銀,因為金價升得多,現在難追,但用少啲成本就可以入銀,睇好會跟金價上升喎。

          昨早八點幾Kelly路過上環嘅利昌金舖,有成三、四十人喺門外排隊,多數係嬸嬸同婆婆,佢哋有人清晨六點幾就嚟霸位,唔係嚟買金,而係買白銀。其中一名嬸嬸對小妹話,以昨日白銀價為例,買入二百七十蚊一両,賣出三百蚊一両,換言之一入一出,可以賺一成利潤,佢笑笑口咁話︰「金舖每日派籌買白銀,籌數目有限,所以除咗出錢仲要出腳力㗎。」

          至於點解唔買金,佢話金價升得太多,入市成本大,反而銀就無咁貴,所以由之前買金轉買銀,佢好傳神咁形容自己嘅投資方法︰「炒完大長金,再炒大長銀!」搞到小妹笑咗。嬸嬸仲話,投資金同銀,都要比較有耐性,屬於長線投資,佢會持有唔放住。有一名八點幾先嚟到嘅張小姐攞唔到籌,佢話上星期嚟過都冇咁多人,原本打算再入一啲白銀,只好明天再嚟,再接再厲咁話。

        Kelly Chu

        
■上環嘅利昌金舖出面,有成三、四十人排隊為咗買白銀。p/  
 ■上環嘅利昌金舖出面,有成三、四十人排隊為咗買白銀。

   

■其中多數都係嬸嬸同婆婆,佢哋有人清晨六點幾就嚟霸位。p/  
 ■其中多數都係嬸嬸同婆婆,佢哋有人清晨六點幾就嚟霸位。

   

回應 (0)
我要發表
user