港交所有「特朗普折讓」
2020/08/17 04:13:07 網誌分類: 經濟
中美貿談破冰暫落空
至於原訂在上周六舉行的中美貿談視像會議，結果沒有如期舉行，外電引述消息指，是因為內地要舉行北戴河會議，報道同時指兩國未有新的開會日期，雖然消息認為不代表有重大分歧，但原先期望雙方再度接觸，可望有點好消息的希望就暫時落空。中美政經關係備受關注之際，美國海軍航空母艦戰鬥群列根號（USS Ronald Reagan）重返南海，展開海上防空行動。根據官方最新公佈照片顯示，列根號上周五重返南海，多架軍機不斷升降，消息指行動是要表明，美方對盟國和夥伴承諾，以及用合作方式，維護區域穩定和海上自由。
另一方面，恒生指數公司上周五於收市後公佈季檢結果，加入阿里巴巴（9988）、藥明生物（2269）及小米集團（1810）作為成份股，將會剔出信和置業（083）、旺旺（151）及神華（1088），將於9月7日起生效，成份股數目維持50隻，上周五炒「染藍」在望漲近4%的美團（3690）就大熱倒灶。國企股指數方面，會加入小米（1810）、美團（3690）及阿里巴巴（9988），會剔出國藥（1099）、比亞迪（1211）及中信證券（6030），成份股數目維持50隻。
三隻恒指新貴都屬於新經濟股，經過今次變動，傳統產業在恒指佔比下降，新經濟成份增加，恒指平均市盈率上升之餘，未來受中美科技戰和金融戰影響將會愈趨明顯，大市波動性有機會加強。於這樣的市況下，如果特朗普只是出口術，投資者仍可以用炒上落策略做點短期買賣。
美國總統特朗普作風係想講就講，不作矯飾，所以經常有驚人之語，好似最近他直言港交所（388）無運行，將會跌落地獄，就聽到香港股民耳都側埋。特朗普和港交所有甚麼仇口，要講到咁盡？一個字就係錢。按照他的想法，港交所做咁多生意，現在美國因為《港區國安法》實施制裁，紐約交易所就可以搶回這些失去的生意。
想斷中國搞科技水源
美國引用《香港自治法》，聲稱是保護香港的人權自由，特朗普宣佈取消香港特殊地位時，意思卻是「呢次你仲唔死，紐交所呢鋪發啦」。人大立法後，英國政府延長港人用BNO入境限期，雖然好多人覺得是想吸引有錢人去當地買樓消費，但至少講出來都係仁義道德，無特朗普講得咁白。
不過有金融界人士聽完後就話，不要以為特朗普係儍仔，他這番話不是要說給香港人聽，而是要說給華爾街聽。香港人點諗，其實他一點不關心，就算聽完反感又如何？最重要是華爾街背後的財團大鱷，覺得他有為美國金融機構爭取利益，支持他繼續做總統，所以他才要講得咁白，畫公仔要畫出腸。
特朗普話要打殘港交所，究竟有多大影響呢？金融界認為，若不是美國不斷向香港出招，恒指好有機會上咗三萬點，港交所更加一早衝破400元。試想想，上個星期騰訊（700）宣佈業績不俗，本來股價好大機會創新高，但因為美國政府提出清潔網絡行動，打擊騰訊旗下的微信，令股價蒙上陰影，成個大市氣氛都受影響。如果沒有這個因素，無理由杜指已經28000點，香港仲喺26000點樓下。
美國政府現時目標好清楚，就是中國同香港有邊瓣好做的，就以國家安全為由，再加香港問題去施壓。呢個情況好似二次世界大戰後，雖然德國係戰敗國，美國卻堅持不用德國賠償，反而向英國猛追打仗欠下的軍火費，結果搞到英國財政崩潰，要讓出英鎊的全球結算貨幣地位，所以打金融戰美國早有經驗，最重要原則就係要從中取利。
中美最大矛盾係科技戰，打科技戰其實係鬥燒錢，只要看現在科網巨股隻隻近萬億市值，但盈利可能只係100、200億元，怎樣可以支撐龐大的投資計劃，所以利用股市融資，係搶佔科技橋頭堡的重要手段。美國一方面不希望中概股去美國集資大搞，同本國科企競爭，同時又不想生意跑到香港，如果要做到這點，最有效方法當然係先摧毀港交所，之後紐交所同納斯達克交易所點樣魚肉中概股，就可以慢慢研究。
有戰略意圖玩殘港股
美國要扼殺中國搞新經濟水源，中國回應係以開放應對封殺，容許外資入股中概股，同時跑去美國上市，這樣雖然把公司股權利益和監管大權放到外國手上，但至少可以獲得生存同發展空間。面對特朗普話要封殺，港交所股價反應尚算溫和，皆因大家覺得美國暫時還找不到有效方法，既讓紐交所賺錢，又能阻截中概股。不過，由於特朗普已暴露玩殘香港股市的戰略意圖，港交所已呈現「特朗普折讓」或「金融戰折讓」，當公司股價升得愈多，美國和華爾街大鱷眼紅追殺風險就愈大。
走了港航來東海 國泰又要接戰書
全球航空業停擺，國泰半年虧損近百億元，估計未來有可能要裁員。在這個環境下，深圳富商黃楚標申請在香港開辦航空公司。黃楚標有意淡市入局，外界不無意外，但他在內地一早有經營東海航空，來港只是順手做多個地方，但對國泰來說，剛剛先砌低香港航空，跟住又來間東海航空，簡直係一波未平、一波又起。
黃楚標在香港最廣為人知的是，幾年前經營雄濤廣播，幾年前他又開始由做房地產，到跨界別經營航空業，現在還愈做愈起勁，要到香港插旗。國泰航空過去幾年，一直面對香港航空及旗下廉航香港快運挑戰，直至去年港航母公司海航財困，總算打退強敵，點知現在又輪到黃楚標出來挑戰。
業內人士估計，今年疫苗面世前，航空業半停擺狀態不會扭轉，國泰上半年蝕99億元，下半年有政府補貼，但相信都要蝕幾十億。之後就算航空運輸解禁，好多人可能都不敢搭飛機。最重要係經過一年時間，可能好多商務旅客都習慣用視像會議，代替長途商務飛行。商務客係航空公司真正賺錢的生意，加上中美關係又差，影響往來人流，所以復元可能好慢，如果仲多家新公司加入競爭，機票想食水深一點，補番損失都不容易，所以真係壞消息接踵而來。
航空業這麼難做，為何黃楚標仍然有興趣呢？有人話電台難做他都敢投資，可見他的性格不是一味講錢，或者係喜歡挑戰也說不定。
陸羽仁
回應 (0)
我要發表