25~28/9 部署結算周位

2020/09/25 19:31:17 網誌分類: 經濟
25 Sep

25/9 周五恒指收報23235, 跌75點, 連跌兩天創月內新低, 反彈在望

今日恒指高開, 扭轉過去三日低開的弱勢, 亦係失守24000以來首次出現高開, 雖然最終收跌, 但跌75點為17/9以來收市跌得最少的一天, 代表沽壓放緩, 大市正醞釀反彈, 可能係因為下周二(29/9)期指結算, 好友力撐

9月港股破位而下, 跌到阿媽都唔認得, 不過9月最後一周(28~30/9)的3天, 港股不會全跌, 會作出反彈, 因為

~ 有結算因素, 好友會作出反擊, 推高結算價

~ 30/9 基金季結粉飾櫥窗效應

~ 今年恒指月尾最後6天的升跌日數, 多數係2升4跌(去年係3升3跌), 目前恒指(23~25/9)1升2跌, 9月尚有3天, 預示28~30/9(周一二三)當中可能會升1~2天

~ 從另一個慣性走勢來看, 過去8個月, 無論該月收升或跌, 恒指最少都升9天, 如今只係升了7天, 尚欠2天升市, 所以下周可能補漲, 升2天, 才能符合每月起碼升9天的慣性走勢

~ 9月第三周, 國指反常地升了4天(通常每周升2~3天), 當時我說國指收升超標, 第四周會補跌, 收跌日數會增加, 結果呢? 第四周國指跌了5天, 即係跌得多就會補漲, 升得多就會補跌, 如今第四周國指跌得多, 下周就要補漲, 即係月尾(28~30/9)升市日數會增加

~ 平保於23/9趁低吸納匯控, 市場解讀為阿爺不會將匯控納入不可靠實體清單, 國壽於21/9通過港股市場以每股平均價$4.2339買入工行H股2000萬股, 涉資8468萬元增持, 市場解讀為阿爺慶中秋及國慶護盤, 俾股民開開心心過節

~ 本周港股及唔少權重金融股都跌到走樣, 嚴重超賣, 隨時會作出技術性反彈

~ 沽空增加, 熊熊不斷下移, 目前已落到23700水平, 有上攻誘因, 以往出現大跌浪, 當貼價新熊登場, 港股就會掉頭急彈屠熊, 如跌浪未完, 大鱷食1~2口熊就會再落山, 如果吃3口熊就代表大市已見短底, 展開反彈浪, 閒閒地彈逾千點

~ 港股已失守所有平均線, 除非有特大利好消息, 否則當技術性反彈結束後就要繼續尋底, 向23000.22800.22500進發, 不過淡友想插穿23000就要中美股市破底才能成事, 如中美股市見底, 港股亦不會獨自破底, 會炒番上24000來擴大10月波幅

~ 中港股市跌到走樣, 沽壓這麼大主因係侵侵抹黑及打壓中港, 以人權為藉口撤資, 丹麥養老基金AkademikerPension昨日公布,將會出售所持的中國股票、債券,並停止投資中國, 理由是出於對中國侵犯人權行為的擔憂, 早前侵侵亦下令美國基金沽出中資股

港股今個月跌勢加劇, 跌幅全面, 相信係有基金及機構投資者大規模減持中港股票, 所以連優質股都破位而下, 洗倉式下跌, 屢創新低

~ 恒指現水平(約23300)賬面值比率(PB), 市賬率為1倍, 市況好時應有溢價, 現水平係大平賣, 已跌至不合理水平, 今日低見23124, 9月初造淡的大鱷已夠水位食胡, 或會有價值投資者趁低吸納

~ 參考過去幾個月尋底之旅的下跌步伐, 自從7/7見頂26782之後, 每逢出現特大利淡消息, 恒指都會下沉一浸(26000.25000.24000)的走勢來看, 淡友想再插穿下一個整數大位就必需要有極淡消息出現, 然後才能降級插穿23000, 向第二季低位22756/22519進發, 總之美國總統大選前後金融市場必定會大幅波動, 要綁好安全帶,

~~~~~~~~~~~~~~~~~~~~~~~~~~~~~~~~~~~~~~~~~~

9月淡友大鱷食飽就彈得

~ 早已說9~10月係高危月, 港股於9月破位而下, 今日見短底23124, 大鱷想預留多少下跌空間俾10月呢? 假設10月仍會創新低, 反正9月的波幅已夠水位俾大鱷轉身, 9月尾就可玩窒窒步勒住來跌, 先行作出反彈, 上山屠熊, 待養肥牛牛及等待利淡催化劑才下殺,

~ 23500係好淡勝負關鍵位, 今年上旬當跌穿23500都見趁大量低吸納買盤, 淡友有可能於今日插穿23200回補空倉食胡, 短炒大鱷或會入場掃貨, 都有助港股下周作出反彈

~ 今日創9月新低23124, 已回補1/6的大部份上升裂口23089~23540, 尚餘少許裂口未回補是後患, 不過目前恒指月波幅2130點已達標, 假如你係造淡9月的淡友大鱷, 會冒風險持有淡倉過中秋國慶長假期, 抑或係23200附近先行食胡止賺呢? 只要淡友肯回補空倉, 就會觸發大市急彈

~ 內房恒大否認負面傳聞, 多間大行亦護航唱好, 匯控及恒大沽空高企, 都有挾淡誘因, 趁反彈就要好好掌握, 因為尋底市沽壓大, 高位往往係一瞬即逝, 如能彈上關鍵位(23800.24000)仍能高企不下, 就代表買盤強, 沽盤收斂, 利好

~ 29/9(周二)係兩條賤美老鬼的首場總統競選辯論大會, 美股近來跌到走樣, 辯論大會前侵侵可能會下令托市, 否則會俾拜登恥笑他的股市政績泡湯, 由於中港美三地股市多數係同步見底, 當美股止跌回升, 又或者美元回落, 好友就有藉口反擊, 本周港股大插插亦有可能係淡友大鱷想係侵侵踢高美股前推低港股食胡

~ 保力加通道底部在23000附近, 加上港股累積龐大跌幅, 或會觸發似樣反彈, 下周反彈目標23600~23800,

~ 由7月起展開的跌浪每次跌穿整數關口(26000.25000.24000)都係一去冇回頭, 預示下周(9月尾)縱有反彈亦難以重上24000, 不過10月開新局未知好友淡友誰主浮沉, 如果好友反擊, 又或者中美股市冇破底, 恒指於10月就有望上企24000, 如果中美股市破低, 23000就危

~ 尋底市弱彈高難, 亦好難連日上升, 當收市升超過200點, 又或者出現連升, 就係回穩轉勢向上訊號, 市弱由低位累計彈500~800點(23124+500=23624~23924), 市強彈1000~1300點上24200~24500

~ 人民幣結束四連跌, 收升38點子, 當美元回落(最好跌穿94), 就係港股彈高之時, 因為9月港股急瀉係受美元急升所拖累, 所以當美元轉弱, 股市就會急彈, 點跌落黎就點上番去

{#icono_72}{#icono_72}{#icono_72}{#icono_72}{#icono_72}{#icono_72}{#icono_72}{#icono_72}{#icono_72}{#icono_72}{#icono_72}{#icono_72}{#icono_72}{#icono_72}{#icono_72}{#icono_72}{#icono_72}{#icono_72}

結算前夕好友反擊, 港股超賣反彈

28/9 周一恒指收報23476, 急升240點, 結束兩連跌

上周四道指創新低26537, 拖累上周五上証及港股同步創9月低位, 上周五道指冇再創新低, 中港股市今日亦跟隨冇破底, 中港股市三地股市同步展開反彈, 美元由兩個月高位回順, 失守94.5水平, 下試94, 9月港股的跌浪係受美元急升所拖累, 如今美元轉弱, 利好股市, 今日港股急升係有匯市支持, 反彈力度增強, 恒指創9月最大單日升幅, 美期急升, 港股偷步彈高, 大鱷借勢挾淡, 逼淡友回補空倉, 港股一升到尾, 咬住高位唔放,

今日港股雖然彈高, 不過人心虛怯, 下跌股份比例高, 而且唔少成份股升幅不大, 主力靠匯控死貓彈, 貢獻恒指今日的一半升幅, VHSI恒指恐慌指數上升, 港股危機未除

雖然美股反彈, 不過明日是期指結算, 9月港股由淡友主導, 淡友贏到開巷, 未必肯放手, 或會力壓結算價, 長假期前避險沽壓亦會加劇, 除了科技股外, 亦要留意地產板塊, 當地產板塊造好, 港股上升動力就會增強, 地產板塊弱, 港股不會好, 市傳內地監管要求大型內銀控制房貸規模, 消息利淡內房內銀股, 明日起港股通暫停, 港股失去大媽條大水喉, 港股大鱷玩晒

上周五低見23124, 已回補1/6的大部份上升裂口23089~23540, 尚有少許裂口未回補是後患, 可能拖到10月水逆期間就會全數回補, 如果大鱷唔想放生23200樓下的肥牛, 今次反彈就不能走得太高(向上阻力23800), 否則會放生好友, 如能收23800之上, 就代表大鱷已轉了口味想食熊熊, 大市已轉勢向上,熊不斷下移至屠殺範圍, 周三(30/9)非常關鍵, 是黑期結算+基金季結+月結+中秋國慶長假期前夕, 大鱷要畫周線及月線

=============================

28/9 (周一) 結算前夕/轉倉高峰期

29/9 (周二) 期指結算+港股通暫停6天+美國總統選舉首場辯論

30/9 (周三) 黑期結算+基金季結+月結+中秋國慶長假期前夕

1/10 (周四) 民陣大遊行/集會(警方唔批准) ~ 黑暴遍地開花暴動日