10月下旬港股震住上

15/10周四恒指收24158, 大跌508點,

國指收9762, 跌158點, 連續5天跑贏恒指

今日港股雖然反艇, 恒指失守50及100天線, 但過去一個月恒指通常跌1~2天就反彈, 今日跌了1天, 但暴跌的幅度已等同跌了兩天(有時大鱷會借突發消息來插水殺倉趙完鬆), 換句話說, 恒指即將作出反彈, 10月開局已假設10月份係由好友主導大市, 無論點跌, 震完都會殺上25000, 今日大插後, 下一個高危期係月尾結算周, 因為好友大鱷或會在3/11美國總統大選前食胡鬆人

10月份港股開局後連日急升, 累積龐大升幅, 獲利沽壓湧現, 今日才作出似樣調整, 10月市況向好亦有可能係基金9月季結後, 基金經理再沒有埋季結交數的包袱制肘, 10月入市就可更進取, 只要在3/11美國總統大選前避險就可以了, 順帶一提, 美國大選受郵寄選票影響, 將會在3/11幾日後才能宣布大選結果, 所以11月初金融市場必定會立立亂, 而月尾結算周剛好是內銀公布業績, 29/10期指結算

早前網誌曾分析恒指及道指本來有3500點差距, 但9月恒指暴跌, 將差距大幅擴大至4000~4500點的不合理水平, 過去兩日恒指反彈本來已將差距收窄, 但今日急挫再度將差距擴大, 目前道指(28514) vs 恒指(24158), 兩者差距4356點, 恒指大幅跑輸極不合理, 後市一係道指下跌, 一係恒指補漲追上去, 才能收窄差距, 換句話說, 恒指有條件追落後上25000, 今日暴跌可能係大鱷借利淡消息隊港股落山殺好友, 當清左場趕走好友, 熊熊養肥, 大市就會重拾升軌, 大鱷亦有誘因於3/11美國總統大選前推高大市獲利, 當淡友逃命, 好友牛牛上移, 就係港股掉頭向下的時候

雖然美國有意阻撓螞蟻上市, 但市場普遍認為螞蟻仍可如期招股, 加上市場憧憬26~29/10召開的五中全會將有推動經濟發展的政策出台, 阿爺或會推出救港措施, 市傳內地監管將放寬大型銀行第三季讓利要求, QQ新手遊登場熱賣, 美元走弱, 人民幣強爆, 都有利港股後市

道指已連跌2天, 由今年3月起, 通常連跌2~3天就反彈, 未見過連跌4天或以上, 由於中港美三地股市係同步見底頂, 侵侵有股市救火隊托市護盤來為競選造勢, 上証有阿爺睇場, 只要中美股市觸底反彈, 好友就可借勢反擊,

~~~~~~~~~~~~~~~~~~~~~~~~~~~~~~~

消化沽壓.儲力向上

昨日恒指高見24808, 第一次挑戰關鍵位打回頭多數係試水溫及引淡友入局, 按照尋頂市每周都會有新高的慣性走勢, 當大市本周完成調整, 下周就會升穿本周高位24808再創新高, 只要重上24800, 就會挑戰25000~25200阻力大位, 過去半年恒指月波幅多數有1700~2300點, 本月低位23674, 如好友唔想破底, 想擴大月波幅的話, 就要上攻, 只要守住24000, 就要殺上25000, 25000~25200(保歷加通道頂+9月頂部)阻力極大, 250天線在25500係超級阻力大位, 要有強烈利好消息才能上破

9月開局高見25254就碌落山, 跌到阿媽都唔認得, 但9月尾低見23124就拗腰向上, 一如早前所說, 大鱷愛好淡通殺, 殺完好友就會殺淡友, 點跌落黎就點上番去, 10月港股係9月的翻轉版, 聽聞大鱷利用人工智能 AI（Artificial Intelligence）來操盤, 所以港股往往以極速飛天遁地, 急跌急彈, 所以小散戶跟唔上電腦的拍子, 就成為大鱷的點心

按照過去十年的統計, 10月恒指月線有8次大升, 加上9月港股跌過龍, 10月恒指大幅反彈機會就更大, 由今個月低位23674反彈至昨日高位24808, 累計上升1134點, 以每月最少都有1700點月波幅來看遠遠未達標, 所以今日殺跌有可能係震倉, 後市會破頂, 按照慣性走勢, 收升月多數會在該月下旬創月內高位, 多數係20號之後

自從五一黃金周長假期復市首天(9/10)上証收3272(當天低見3260創10月低位), 其後上証每日都收3300之上, 而恒指亦只係長假期復市首兩天(5~6/10)收24000之下(5/10低見23674創10月低位), 其後恒指每日都收24000之上, 換句話說, 只要10月下旬上証冇插穿3260創新低, 恒指亦不會插穿23674, 只要上証守住3250/3300, 恒指亦能守住24000, 反覆向上尋頂,

~~~~~~~~~~~~~~~~~~~~~~~~~~~~~~~

試完底再沖頂

明天(周五)係畫圖日, 假設本周由好友主導大市, 國指跟上証周線收升已無懸念, 不過恒指收24158, 非常貼近上周五收市位24119, 明日好友最好推上24217樓上收, 周線就會收陽收升, 連升3周, 今日低見24102, 10.20天線及保歷加通道中軸在24000~24200, 係好淡角力水平, 不容有失, 以恒指閒閒地超過300點即市波幅來看, 恒指明日一係見24000, 一係上24300~23400, 通常由好友主導的尋頂市好少連續兩日暴跌,

港股慣性走勢係沖頂打回頭就尋底, 觸底反彈就會再沖頂, 周三大市見頂24808回落, 市強未見大頂的話, 通常跌600~800點就彈(食1~2口牛), 市弱就會跌逾千點, 目前已嘔約706點, 科技股今日急瀉拖低大市, 港股升跌多數跟科技股, 只要科技股反彈, 港股就會跟住上,

大媽掃QQ.建行.平保, 穩住了國指, 今日國指大幅跑贏恒指, 上証雖然收跌, 但內銀內險A股逆市上升, 表現亮麗, 利好國指, 睇盤路似乎有資金換馬追入落後的中資金融股, 螞蟻即將招股, 有助穩住市場信心, 基金經理普遍看好10月份港股表現, 估計低位會有買盤趁低吸納, ipo大行亦要營造利好氣氛來造勢, 市傳繼阿里巴巴之後, 百度亦會於今年第四季來港第二上市

14/10~4/11水星逆行, 14/10恒指飛天見24808, 今日遁地見24102, 相信急升急跌的市況陸續有來, 恒指能否守住24000就要看QQ $550的守關能力, 過去幾周大市及科技股升勢過急, 當有利淡消息就借勢調整, 消化沽壓, 而落後的內銀內險就接力撐市, 皆因內地經濟復蘇表現冠絕全球, 人民幣強爆, 加上憧憬有國策扶持, 成為吸引資金的主因, 通常國指強, 港股好, 國指雖然收跌, 但卻是連續5天跑贏恒指, 反映人民幣走強已起支撐中港股市的作用

恒指約23300賬面值比率(PB), 市賬率為1倍, 市況好時應有溢價, 25/9低見23124係大平賣, 已跌至不合理水平, 即係跌過龍, 大插約2000點後, 9月初造淡的大鱷已夠水位食胡, 價值投資者或趁低吸納, 結果3日後(即5/10)就重上24000水平, 其後反覆殺上24808, 反映恐慌性拋售大插插出現的筍價往往係一瞬即逝, 大市不會長時間在不合理水平徘徊 

業績公佈:
2020-10-23 中國海外發展.長城汽車
2020-10-25 中國神華
2020-10-27 匯豐.中國平安
2020-10-28 中石化.人保.中國財險.中國人壽.
2020-10-29 粵海投資.中石油.建行.信行.比亞迪股份.中信証券
2020-10-30 江西銅.中國中鐵.國航.南航.中聯重科.中國鐵建.農行.工行.民行.中銀香港.太保.中國建材.交行.招行.中行