鄧達智妙手設計港龍空姐服縮腰線拉長腿部比例
2020/10/22 04:12:09 網誌分類: 生活
鄧達智對小妹話，當年為港龍航空諗新制服，係一次好玩嘅經驗，當年佢見到環球嘅航空公司空中服務員嘅制服，空姐千篇一律係出面外套，入面白恤衫，再穿裙，佢就諗如何突破。
有一次，William搭乘出名多靚空姐嘅維珍，俾佢見到一個空姐為客人放行季上頭頂櫃嘅時候，一舉手一伸腰，件白恤衫就拉鬆咗出來，要用手整番埋，喺客人面前好尷尬，佢即時諗港龍嘅新制服唔可以咁，結果佢敲定連身裙嘅設計，好處係唔會有維珍空姐嘅問題，同時可以三十秒快速換衫，等空姐們輕鬆改頭換面送客人落機。
仲有美感方面，William有獨到嘅睇法，由於亞洲人多腰長腳短，不似歐美人身材比例腰短腳長，所以佢特登縮短咗港龍制服嘅腰線位一吋，令到睇起來腰短咗，令到腳嘅比例長番，整體變成腰短腳長，外觀苗條咗，人人開心。至於空姐圍巾採用有蘇格蘭嘅格仔設計，係代表香港又中又西嘅背景，好有心思。
Kelly Chu
■港龍空姐制服出自鄧達智之手。資料圖片
■空姐圍巾採用蘇格蘭格仔設計，代表香港中西合璧背景。
回應 (0)
我要發表