消費800蚊 即賞一天本地遊 旅發局「賞你遊香港」首日熱爆
2020/10/28 04:12:21 網誌分類: 生活
Kelly喺旅發局網頁發現一個好吸引嘅本地團，行程包括到訪志蓮淨苑、到五星級酒店享用半自助午餐、參觀天際100香港及戲曲中心等，喺十一月有四個出發日子。該旅行社職員回覆小妹電話查詢時話，報名第一日反應已經好熱烈，大約二百個名額，昨日中午迅速爆滿。另一間旅行社報名情況同樣熱烈，仲話之後報名嘅市民，會被列入候補名單，如果有人退團，就有機會補上。
想參加「賞你遊香港」嘅市民，需要喺十月二十日之後，喺本地零售及餐飲商戶嘅實體店舖，消費滿八百蚊，然後憑最多兩張收據，經旅發局網址www.holidayhk.com/zh-hk/free-tours/報名申請一次免費嘅本地遊，最快個批下個月一號就可以出發啦。
揀啱自己心水嘅本地團後，需要根據網頁和旅行社嘅指示，留低申請人嘅姓名、電話、電郵等，之後就會收到旅行社職員嘅電話確認，提供埋相關單據嘅相片，以及交低一百蚊按金，就完成報名程序，而出發當日要將單據正本交比旅行社，按金亦會發還。
Kelly Chu
■本地團嘅行程包括到訪志蓮淨苑、到五星級酒店享用半自助午餐、參觀天際100香港及戲曲中心等。
回應 (0)
我要發表