11月份財經留言版

11月份開新局~反彈在望 升 升 升 升

恆指已連跌四天(27~30/10)，炒一周期權的淡友今日可能已食胡，今年恆指未試過連跌五天或以上，所以下周初開局理應反彈，通常跌穿平均線都不會一去冇回頭，市弱上去吻別, 市強就會收復平均線再沖頂

由於10月份壓低收，報24107 （高位24970）,  已回吐10月份大部份升幅，10月收市門檻低，令11月較易收升，首先要假設11月係收升月，多數係月初見底，下旬才見頂，應市策略係逢低買上做好友

10月份恆指主力在24000~25000之間游走，30/10收24107， 由高位24970已回吐近千點，跌至波動區間下方，現水平造淡值博率低，滙債形勢已好轉，有利股市, 不過出入市不要太勇進，富貴如浮雲，賺錢輸錢快來快去袋唔穩，下周美國大選， 無論做好做淡 ，真係要萬分小心

日前預測10月尾結算周回吐目標24000~24200，如有壞消息，11月就會隊穿24000再下試前底，如有好消息就上破25000挑戰25500, 今日低位24030，已回吐941點，剛好達標, 反彈在望, 市強未見大頂的話, 通常跌600~800點食1~2口牛就會反彈，再挑戰前頂

本周(27~30/10)恒指有843點周波幅，為今個月最大周波幅，結束4周升勢，真係撐埋結算及螞蟻ipo就縮手，等下周開新局再玩過

10月結算周港股打破慣性走勢跌足全個星期，按照慣性走勢不會連續兩周都日日跌, 恆指於23/10見頂24970後掉頭向下，競價開市日日都係低開，只要下周一(2/11)高開，就係好友反擊訊號

3/11 美國大選及4-5/11 聯儲局議息, 要小心金融市場會大幅波動，如美元 站穩94 繼續走高， 股市壓力就會增加, 如美元下行跌穿93則利好股市, 人類有史以來最巨型的ipo螞蟻, 獲155萬人認購, 超購390倍成凍資王, 於周五(30/10) 截飛後，港匯已轉弱，下周開新局，港股飛天遁地來擴大11月波幅都有可能， 無論造好抑或造淡, 入市不宜太進取, 以免被挾屎，估計11月開局大鱷或會先上山屠熊

＃＃＃＃＃＃＃＃＃＃＃＃＃＃＃＃＃＃＃

睇周五(30/10)早市港股的盤路，好友大鱷似係想倒升收市， 不過下午美期突然暴跌，所以好友才縮手，但仍力守24000來埋月結，所以下周開新局好友必須要出手來穩住大局，因為港股已失守所有平均線，如跌穿24000沽壓就會加劇

10月份港股由好友主導, 反正10月肯定收升，今日壓低於24107收可以減低11月收升的難度， 下周一(2/11)港股表現就要睇國指，因為大量權重中資成份股剛公佈業績，內銀第三季業績改善，10月份內地製造業PMl數據亦靚仔, 連續8個月處於擴張區間, 中國經濟數據冠絕全球, 一眾利好消息或會吸引買盤

恆指9月份暴跌後，10月果然跟過去十年的慣性走勢，10月大反彈2.76%，升648點， 而10月尾彈散亦符合水星逆行(10月14日至11月4日)利淡, 應市策略係見大插執平貨，因為港股有大媽睇場，內地股市自成一國，縱有利淡消息, 歐美巿場對中港股市負面影響力亦較細

老外積極沽出A股，而大媽就掃貨, 滬大媽繼續掃QQ，但深大媽沽QQ食胡，QQ衝高回落收陰燭, 諗唔明點解大媽係$600仍掃QQ，真係輸死貼價牛熊， 好友淡友都要死, QQ屢創新高 可能係畀螞蟻的高估值帶動，另外亦有可能係炒11月中公布的業績, 手痕造淡QQ/港股要小心, 要思考為何大媽動用這麼多資金狂掃QQ， 要看通QQ才落注， 因為QQ是港股溫度計, QQ未見頂的話，港股亦未見大頂,

~~~~~~~~~~~~~~~~~~~~~~~~~~~~~

去年第四季阿里巴巴上市，亦係用來推高港股穩定人心，當時香港 正值黑暴混亂期 ，美國制裁中港，人心虛怯立立亂, 今年10月份 不斷傳出美國想打壓螞蟻金服的消息，但螞蟻仍能如期於 10月招股，計畫於11月初上市, 螞蟻上市日期 正是 美國總統大選之時， 絕不會是巧合,

阿爺可能係想用螞蟻來抗衡美國大選引發的市場波動，巨無霸螞蟻IPO招股有助熱錢流入中港金融市場, 有托市味道, 如螞蟻成功上市, 就會快速加入成份股， 由於螞蟻不是第二上市，可以佔恆指比重高達10%

10月份恆指只得1296點細月波幅，違反了過去幾個月多數有 1700~2300點月波幅的慣性走勢， 預示11月恆指會有大波幅， 因為不會連續兩個月都做細波幅,

以月波幅來看，10月理應上破25000，殺上25200~25500來擴大月波幅, 不過受美國大選前的避險沽壓拖累， 所以大鱷忍忍手留力，可能拖到11月才殺上去

早前當科技指數登場後，港股變天，估計11月當螞蟻上市以及納入國指成份股之後， 港股又會再變天，科技股是港股溫度計, 所以不應用舊思維凈係睇舊經濟股來分析港股的走勢，否則好易睇錯市

歐美疫情進一步惡化，加上美國大選陰霾，避險情緒升溫， 美元重上94, 10月份 中港美三地股市衝高回落， 就係投資者 偷步於3/11美國大選前 獲利止賺,

中港美三地股市11月表現就要睇無形之手護盤 的功力，10月已結束，未來一周無論周波幅抑或月波幅都開新局，玩法唔同咗, 睇住資金流及大媽手影就會知道港股能走多遠

美國大選前避險，美股10月份偷步下挫，累積龐大跌幅，雖然美元重上94，但人民幣走強連升三日，美國十年期債息亦回升，收0.826%，有阿爺大媽做後盾，基金經理對港股後市樂觀，建議趁低吸納，但對美股表示憂慮，不過認為政治對美股影響只係短暫, 市場預期美國大選後將推出更多刺激措施, 投資者趁低吸納

~~~~~~~~~~~~~~~~~~~~~~~~~~~~~~~~~~~~~~~~~~~~~

打不死的美股有見底味

近日美股雖然急挫，但道指多次插水後都神奇地踢高，收窄跌幅, 上週五(30/10)道指三番四次插穿 26200都急彈，而上周三四五(28~30/10)這3天，即市都隊穿26500， 但收市都能站在26500之上，可能係侵侵御用救火隊出手護盤

究竟 美股大插後多次都能收窄跌幅，係淡食胡回補空倉抑或係侵侵護盤救市呢? 假如我係侵侵，就會喺3/11投票前夕(2~3/11)護盤撐美股，因為如果美股大插災災, 侵侵有何顏面作出最後一擊拉票呢?

為何侵侵這麼看重美股表現呢? 因為根據歷史數據，總統任期內，美股升得越多，連任機會就越大, 而市場上有一個說法, 就係大選前美股大跌就代表華爾街大鱷不喜歡該總統, 想推佢落台, 所以沽貨隊散美股, 回顧1/9道指見頂29199後掉頭向下, 30/10低見26143, 暴跌逾3000點, 符合大選前暴跌總統就會落台的話, 代表侵侵無法連任

中港美三地股市多數係同步見底頂，道指及上證同時於30/10創10月新低， 換句話說，只要中美股市止跌回升，港股就會跟隨反彈

以過去幾個月的頂部26782，25847，25254，24970來推算，恆指11月會再上24500, 如有好消息, 就會破頂而上

頂部26782下移935點見25847，再下移593點見25254，再下移284點見24970

睇上述數據不難發現過去幾個月頂部雖然下移，但幅度越嚟越細，反映沽壓減輕, 恆指24000已找到平衡點，當 9月插穿23500落到1倍市帳率的筍價區， 買盤隨即湧入掃貨, 9月份只得5天收於23500之下，低見23124，幾日後就速彈上24000, 後市只要守得住24000的話, 就要重上25000才能擴大月波幅

30/10港股雖然冇創10月新低，但亦創了三星期以來最低位，力守整數關口可能係同 月結 以及10月份由好友主導有關， 10月份上證收升，港股亦跟隨收升, 換句話說， 未來幾日港股會跟住中美股市走

上證以兩周以來最大成交 下挫，近10月份低位收，報3224，急跌48點，3200支持力強, 現水平向下空間收窄，能否守住3200就要看老外是否繼續沽A股, 只要守得住3200, 以月波幅計就要上3350, 甚至3400水平

2020年第三次水星逆行：10月14日至11月4日

聯儲局議息: 11月4 - 5日

(5~6/11)周四五~中港美三地股市同步見底.同步尋頂

11月開局前建議逢跌買上， 當時估計11月港股會收升, 即係月初見底, 11月下旬才見大頂, 因為當大選明朗化， 資金就會入市， 唔好估頂，過去幾日一直提醒大家做淡係高危， 市場已作出部署買拜登勝，會取消貿易戰， 所以資金流入中港股市, 

如果11月係收升月，就不會在月初見大頂, 11月第一週 ，周五(6/11)已高見25799， 由於本周波幅1567點已超標，加上大市超買要消化沽壓, 大鱷刻意在25800關鍵位前卻步，忍忍手, 預留多些向上空間畀下周，順道引熊入局, 待市場出現利好消息, 就可借勢殺上去

尋頂市每周都創新高的話， 以週波幅計，下周就會上破26000，甚至更高，一般來說，恆指月波幅有1700~2300點， 如果大龍鳳就會更多，10月超細波幅，會谷大11月波幅, 500點一級上就會見26000.26500……

周一(30/11) MSCI 調動、黑期結算、基金月結

因頭條網登入時常出問題，所以另設後備留言區

SOHO網友備用落腳點~留言

https://sohofriends.blogspot.com/2020/11/111122.html?showComment=1606064147111#c419600479224921833

此頁已關閉, 請移玉步前往12月財經留言版