9~12/11 暗湧+聚頂+消化沽壓

新經濟股高位沽壓加劇.板塊輪動接力上

9/11周一恒指連續2日收陰燭, 收報26016, 升303點,

港股跟隨美期急升, 預示今晚美股會彈高, 不過近日港股升勢過急，我傾向減磅，唔少股份都升過龍，如果明日再伸多一腳上去, 港股超買情況會更嚴重, 獲利沽壓會加劇, 目前牛熊分布為牛58% VS 熊41%, 如果明日再沖上去屠熊, 熊熊就死得七七八八, 小心大市會掉頭向下, 落山屠牛

熱錢流入新興市場是無可置疑，並非中港股市獨升，日股創逾29年收市高位，台股創歷史新高, 今日多隻龍頭科技股例如QQ.美團.京東.小米.阿里巴巴等新經濟股高位出現利淡訊號, 升勢已露疲態, 或會落去補回一些上升裂口， 不過大鱷可能會托住指數由得股份落去補裂口, 因為舊經濟股買盤強勁, 有助撐住大市

國指已連升6日, 上周日日升, 按照慣性走勢不會連續兩周都係日日升, 預示國指明日沽壓會特別大, 估計本周國指跌市日數會增加, 要補跌, 11月港股似10月份, 由好友主導大市, 大漲小回, 反覆上升

以月波幅以及量度升幅計, 短線上望26500, 可殺熊約2000張, 估計呢個水平會有短炒好友食胡, 過去幾日急升遺下的上升裂口會拉住港股後腿

11月初上升裂口:
3/11 24486~24689 11月不應回補
5/11 25093~25353 11月不應回補
9/11 25800~25950 有可能回補

10/11 周二恒指收26301, 升285點, 惟國指收跌, 港股燒煙花利淡

輝瑞表示新冠肺炎疫苗試驗成效顯著，刺激美股三大指數齊創歷史新高，炒經濟復蘇的道指最多升1610點, 惟沖高回落, 收市升834點(3%), 為6月5日以來的最大單日升幅, 宅經濟股納指倒跌, 今次中港美三地股市借疫苗消息急升, 不過齊齊收陰燭, 似係燒煙花, 測市指標出現利淡訊號, 下行壓力愈來愈大, 美股出現見頂訊號, 中港美三地股市同步的話, 中港股市26474/10707/3387亦已見短頂, 後市要中美股市破頂, 又或者有強烈利好消息, 港股才能創新高

港股雖然已收復所有平均線，勢頭向上, 不過指數於高位已露疲態, 要回調整固後方能再闖高峰, 未重上平均線的落後股仍有上升空間, 呢種資金市通常係強股急升後就回吐，由落後股接力，當強股唞夠就會再起動，以輪動方式接力推高大市, 問題係今日高見26474, 已升抵今次反彈浪量度升幅目標26500, 如做超大波幅可見27000(7月頂26782), 不過26000樓下有三個上升裂口, 會拉住港股後腿,

恒指由25/9低位23124反彈至今日高位26474, 升幅3350點, 以月波幅計亦有2242點, 符合1700~2300點的月波幅要求, 按照慣性走勢, 收升月多數在該月下旬創新高

大市超買，淡友已死得七七八八，連大淡友昨日亦已投降, 由於短線目標已到，做好食胡減磅, 博回吐再買上, 因為一般來說, 當沖高受阻而回, 大市要調整, 消化沽壓才能再上, 目前港股似係聚頂, 早晚會跌穿26000, 如未見大頂, 通常由高位回吐600~800點就會止跌回升, 震完就會破頂

大鱷托住指數來出貨及換馬, 而家市場當拜登勝出, 當中美友好嚟炒，其實係博大霧，拜登及賀錦麗是不會對中港好，只係新上任首要任務係應付新冠肺炎，圍堵中國是次要，拜登是老狐狸，賀錦麗精明能幹，都喺反華份子，打壓中國亦是國策, 日後中國更難應付這些新班子

由於港股及科技股不斷跳空裂口上升是後患, 我估升過龍的龍頭科技股短線會落去補回一些上升裂口， 大鱷可能會托住指數由得股份落去補裂口, 大媽及大鱷喺23000附近收集唔少貨，所以有誘因托沽

呢幾日心思思想做淡阿里巴巴，因為螞蟻受政策規管，估值會下降，理論上會影響阿里巴巴表現，阿里不應站$290之上, 今早競價 科技板塊成交大得不尋常，高達$30億，而且係大幅低開，反映沽壓沉重，開市後果然插水

感覺上炒疫苗利好的消息係升過龍，大鱷借勢挾淡 趙完鬆，上周五已說大媽出緊貨，呢幾日都係繼續走貨，今日連老外都沽A股，所以中港股市衝高回落， 但大鱷玩換碼，掃入 落後的舊經濟股來避險及托市, 恒指仍能大幅收升, 大市被科技股拖累, 一度低見2603041, 不過被舊經濟股急升推番上26301收, 有溫水煮蛙味

~~~~~~~~~~~~~~~~~~~~~~~~~~~~~~~~

大成交冲頂冇好下場

上週末說本週國指沽壓會加劇，下跌日數會增加, 因為上週國指日日升，所以本週壓力會大增，今日亦係國指率先倒跌，符合預期, 今日恒指創新高26474, 但國指高見10705(昨日高位10707), 不但冇創新高, 更倒跌收場, 係利淡訊號

今日美期反艇，反映美股亦已見頂， 與港股同步, 大成交冲頂冇好下場，今日成交高達$2338億元，恒指大升, 但整體下跌股份比例亦高, 托沽味濃, 由於後知後覺的散戶近日才追入科技股，今日全部坐艇心碎，令追貨買盤減少，導致科技板塊一跌到尾

今日科技板塊反艇，皆因阿爺今早發佈防平台經濟壟斷指南諮詢文件， 所以阿里QQ美團京東急瀉，怪不得過去幾日呢幾隻股份 高位沽壓沉重，似係派緊貨，原來大鱷大媽收到風阿爺想加強監管, 加上納指下挫, 令港版科技股沽壓加劇

睇番今年試過多次連環裂口一支箭爆上，最終都係要嘔，有時係磨幾日聚頂才插，有時係見頂就直插, 淡友正在等利淡催化劑推大市落去回補25800~25950的上升裂口, 不過今日好友力守26000, 可能係等貼價牛入局才插, 如收跌超過200點或連日大跌就係見頂訊號, 如好友未放手, 只會小幅下跌或即市調整

今日舊經濟股表現亮麗，買盤積極，係升市功臣，似係看好疫苗有助經濟復甦，所以大手掃貨，未必係短炒買盤, 可能係睇中長線, 新冠疫情期間，宅經濟股飛咗出外太空，升過龍 ，舊經濟股慘遭離棄，如今風水輪流轉，資金沽出高PE的新經濟股，換馬落後的舊經濟股，港股又變天了

要港股跌必需要權重A股跌，推低H股，港股才會有下行壓力，但今日內銀內險石化雙雄股全面上升，所以港股跌唔落, 只係回吐部份升幅, 金融地產等舊經濟股買盤强勁，大鱷用來抵消科技股的跌幅

新經濟股急挫，大鱷想借勢逼好友斬倉及止蝕，令股價跌勢加劇，發行商亦因應股價下挫沽出對沖的正股， 令沽壓進一步增加, 打落水狗昨日應順勢做淡科技股博今日插多一棍, 過去兩個月金油股匯債大幅波動，相信唔少散戶及大鱷都損手爛腳

11/11 周三恒指收26227, 跌74點, 結束四連升

連升斷纜利淡, 不進則退

內銀內險地產等舊經濟股連日發威支撐大市, 不過今次反彈累積龐大升幅，已升抵阻力區, 獲利沽壓會湧現，千年蟹貨亦會出籠沽貨, 估計當舊經濟股追落後完成，即係升到去7月初水平，買盤縮手，港股向上動力就會轉弱，到時就要睇已轉弱的科技股會否復活撐市，如果到時科技股仍然唔生性，港股就會插穿26000,

以周波幅來看, 後市仍有可能落去回補25800~25950的上升裂口, 港股處於超買區, 要擴大周波幅, 後市不可能一直守得住26000/10500, 過去10個月當中有7個月國指有約600~850點月波幅, 目前已做了887點, 亦已達標, 國指今日已全數回補9/11的上升裂口10514~10597, 預示恒指亦會回補當天的裂口25800~25950

QQ由高位累計回吐逾80元, 低見$551, 於高位已減磅的大媽趁低大手吸納, 可能係炒業績, 市場看好QQ業績, 今日科技股暴跌同我市前預測一樣，大鱷逼QQ好友斬倉, 令股價急挫, 當好友死得七七八八就會反彈, 殺完好友殺淡友, 今日QQ落到去$550邊的大位, 要看明日會否作出超賣反彈, 因為QQ明日公布業績, 加上已累積龐大跌幅, 淡友或會回補空倉, 趁低吸納買盤亦會進場, 畢竟科技指數跌勢過急, 如反彈有助穩住大市

港股見頂回落, 連跌兩天, 舊經濟股高位沽壓加劇, 拖低大市

12/11 周四恆指收26169, 跌57點, 不進則退, 部署下殺屠牛

10/11恒指見頂26474後連跌兩天, 聚頂味愈來愈濃, 由於本周由好友主導大市, 如本周恆指收陽收升，周五就要收26157/25713之上, 國指亦要收10498之上, 明日係畫圖日，加上QQ業績，明日港股禍福難料, 美元反彈，重上93，人民幣連跌三天, 港匯走弱, 美國十年期債息見頂回落, 匯債利淡, 不利明日市況

港股月波幅已達標, 加上中美股市見頂, 港股上升動力隨即轉弱, 按照港股慣性走勢, 聚頂幾日震熊引牛後就會大插, 收升周多數會在星期三四五創該周高位，如無法創新高，就代表周初高位已見短頂, 按照慣性走勢, 要試完底, 11月下旬才會再沖頂, 尋頂市通常每周都會有新高, 其實好友大鱷亦不急於推上26800, 因為本周已創新高26474, 攤開來推升, 留待11月下旬逐步向上推進, 好過月初見大頂惹來沽壓一路碌落山

市前估計今早大鱷推上26500食肥熊後掉頭向下，但結果未能破頂，因為9/11美股見頂, 10/11上証見頂3387, 恒指亦同步見頂26474, 中港美三地股市同步見底頂, 所以港股亦無法創新高, 盈富基金罕有地登上沽空榜首, 預示港股將會作出調整

一如昨日預測, 當舊經濟股升抵7月初的水平就會乏力再上, 結果今日舊經濟股見頂急瀉, 沽壓沉重, 所以QQ急升亦無法推高大市, 我懷疑舊經濟股急挫係市場擔心侵侵翻盤, 疫苗亦難以於短期內全民接種, 香港出現第四波疫情, 所以資金又換馬, 沽出舊經濟股止賺, 換入已完成調整的宅經濟科技股, 港股再度變天, 本周大鱷不斷換馬, 走勢難以捉摸, 好友淡友都要死

今日權重A股表現差劣，內銀內險油企A股全面下跌，拖低相關H股，上證連跌3日，不過通常跌3~4日就反彈, 今日港股死唔去皆因周初暴跌的新經濟股復活, 完成調整後重拾升軌, 抵消過去幾日急升的舊經濟股的跌幅, 大鱷繼續臨危托沽, 溫水煮蛙式派貨, 老外通常掃入A股後, 好快就會沽貨獲利, 所以權重A股急升後, 隨後都會反艇, 月初老外大手買入A股, 本周就食胡鬆人, 所以上周中港股市走強, 本周就反覆走低

~~~~~~~~~~~~~~~~~~~~~~~~~~~~~~~~~

新經濟股觸底反彈

儘管新經濟股周二三暴跌，但由於本周係由好友主導大市, 冷待利淡消息, 本周大鱷仍力守26000，跌唔落一係唔想放生26500熊，一係等貼價牛上移，亦有可能係等利淡催化劑才落山, 由於本周恒指高低位25950~26474, 周波幅未達標, 不進則退, 未能破頂就要破底, 明日有周末沽壓效應, 隊穿25950機會大增, 順道回補25800~25950的上升裂口, 如市強低位會一瞬即逝, 不會在低位徘徊, 近來大鱷多數玩即市調整, 尾市及收市U盤踢高收, 反映好友仍在

今日QQ美團等新經濟股大幅反彈, 周二三新經濟股急瀉，是否為了殺好友/逼人止蝕斬倉而刻意插深d呢? 係蓄意謀殺大震倉, 插完就急彈, 好淡通殺, 昨日QQ以全日最低位$551收, 今早大裂口以$570開出, 沒有在昨日低位徘徊, 好明顯係為殺好倉而插, 所以低位一瞬即逝, 炒新經濟股的大户小戶散户好友皆重傷, 如已止蝕見反彈就痛心疾首, 多位基金經理認為新經濟股前景仍佳, 無需見暴跌就恐慌性拋售, 反而可趁低吸納

美國大算仍有變數, 侵侵表示下周會反擊，誓不認輸，14/12選舉人投票給總統候選人，才能落實誰當選，加上部份州份重點選票， 如果愈演愈烈或會影響金融市場, 因為金融市場一面倒當拜登勝，大鱷倉位買拜登股，如果有跡象顯示侵侵可能會翻盤，股票市場就會有震盪, 丹麥養貂場出現變種新冠病毒傳人，未知疫苗是否有效, 歐美日韓新冠疫情惡化, 連香港疫情亦惡化, 炒疫苗及拜登效應消退, 美國兩黨紓困措施談判未能達成共識, 大市爆升後就要回歸現實, 升過龍就要嘔

假如我係侵侵，就會叫美股救火隊收工，因為拜登可能勝出，侵侵冇必要為他人作嫁衣裳，推高股市, 而侵侵亦有可能在餘下任期加強對付中國的手段

公布業績:

周三(11/11) 港交所
周四(12/11) 騰訊
周五(13/11) 京東
周五(13/11) 恒指季度檢討(市傳美團大熱入恒指)

因頭條網登入時常出問題，所以另設後備留言區

SOHO網友備用落腳點~留言

https://sohofriends.blogspot.com/2020/11/

https://sohofriends.blogspot.com/2020/10/blog-post.html#more