17~21/12 溫水煮蛙下試26000

港股連升兩天沽壓大增, 26500穿梭殺牛熊，熊死牛命危

17/12 周四恒指收26678, 升218點 

明日關鍵位26505/10452, 如失就係連跌3周, 利淡

大鱷又玩黑箱作業殺淡友, 今日港股三大指數於收市U盤踢上去全日最高位收, 可能係預留回調水位, 因為明日立立亂, 有周末沽壓效應, 周五大鱷要畫周線, 內地股指期貨結算, 富時指數調動, 美股四巫結算, 高處不勝寒，無論港股抑或科指都未見過連升3天, 小心明日升勢斷纜, 沖頂打回頭再尋底, 向26127進發

QQ連續兩日急升, 累積升幅大, 今日以全日最高位收未必係好事, 按照慣性走勢翌日會走相反, 明日獲利沽壓會殺到, 如QQ回吐亦會拖低港股, 年尾手緊, 大媽繼續沽貨套現, 滬深大媽齊齊沽出QQ.美團.中芯, 如明日沽壓持續則利淡港股

科指急升推動港股創本周新高26678/10545, 但近來科指升兩日就回吐, 預示明日港股沽壓會增加, 港股急升, 係虛火上升，本地地產股逆市下跌, 唔少股份都呆下呆下, 內銀弱勢持續, 沽壓沉重陰陰跌, 明顯跑輸大市, 明日上証能否站穩3400, 以及內銀內險A升跌, 對港股表現舉足輕重, 如內銀內險A走弱, 就會拖低港股

呢兩日中港股市急升可能係受富時羅素全球股票指數系列成分股調整 23隻AH股等獲納入所推動, 係技術性買盤, 所以突破阻力位, 未必係有資金想一路買上去, 可能係假突破, 要於高位企3天才能確認大市回穩, 否則12月下旬仍有破底插穿26127的可能, 殺牛及擴大月波幅, 因為波幅仍未達標, 金價止跌回升，可能資金流有變，下周一(21/12)土木星相會，天象有異動, 好友小心了

~~~~~~~~~~~~~~~~~~~~~~~~~~~~~~~~~~~~~~~~~

溫水煮蛙式派貨

根據我的觀察, 呢幾個月有一班港股大鱷玩超短炒波幅, 係高沽低吸快閃黨, 導致港股升跌都陰陽怪氣，同一方向1~2日就轉向, 難以預測, 呢班熱錢大鱷特別喜歡炒新經濟股及IPO和半新股, 抽升殺跌, 毫無徵兆下會突然變盤, 好淡通殺, 就好似港股周初明明跌到走樣, 理應下試26000, 但卻在26127突然拗腰急彈551點, 隨時係上山殺完淡友又再落山殺好友, 溫水煮蛙式派貨, 不斷上攻下殺來蠶食股民的血汗錢,

市場憧憬今晚美國紓困措施有望落實, 今日港股急升可能係炒呢個消息, 資金博美股再創新高, 今日港股升市成交卻縮減至$1290億(當中有新股$21億), 並不配合升勢, 主力靠新經濟股急彈來推動, 升勢並不全面, 臨危托沽格

周五美國市場四重結算日, 下周一土木星相會, 港股風高浪急, 少做少錯, 博反彈有得執就要快閃, 否則貪字變個貧，哈))) 港股時日無多, 大難臨頭，受平安夜及大除夕半日市影響，未來兩星期每周只得3日半市，小心獲利避險沽壓會加劇，總係覺得美國經濟差，純粹靠資金推高股市, 市場對疫苗過份憧憬, 美股升勢令人不安, 只係俾無形之手一直托住大市, 但天象有變, 唔撐得幾耐

18/12 周五港股沽壓大增, 結束兩連升, 恒指收26498, 跌179點, 部署下殺屠牛

由於近來恒指每逢周一例跌, 所以打算趁高沽, 結果今日受富時指數調動影響, 提早出現跌市, 亦唔排除係淡友趁富時執位, 隊港股落去, 不過港股通常跌1~2天就彈, 如連跌3天, 代表淡友已奪得主導權, 26000就危, 今日高見26668, 未能突破昨日高位26678, 沖頂打回頭就要再尋底, 向前底26127進發, 25800~25950上升裂口未回補是後患, 恒指周線連跌3周, 惟本周跌幅不大, 國指.科指本周收升

過去一周港股急跌急彈, 收市往往死唔去, 12月玩左3個星期, 好淡大鱷勝負仍未分, 情況極為罕見, 恒指高低位26127~26870, 月波幅只得743點(月波幅通常超過1700點), 罕有地窄幅, 周線連跌3周亦只係累計下跌397點, 到今日為止全月計仍錄得157點升幅, 大鱷大媽托住大市派貨, 大行亦有誘因為了新股ipo及配股托市, 但月波幅未達標, 通常於20號之後就會爆邊, 向下爆機會大, 該處有肥牛

每當股份急跌大戶乘機將沽空平倉, 怪不得平保下試$92水平後曾彈番上$95, 並非看好後市的買盤, 港股炒窄幅, 好友淡友都做快閃黨, 高低位都係一瞬即逝, 近來恒指表面上收市水平往往拋離26500不遠, 指數仍能高企不下, 但其實唔少股份卻跌到走樣, 有濃濃的托沽味, 連大媽都走貨套現, 散戶輸多贏少, 成手蟹貨, 年尾收爐, 入市意慾下降

今日收市U盤富時執位恒指急彈83點, 收窄了恒指的跌幅, 內地股市亦受富時調動拖累而反艇, 預示下周一早市中港股市都會作出修正, 開市初段會大幅波動, 上証昨日重上3400有可能係受富時被動性買盤所推動, 可惜今日失守3400大關, 收3395, 跌10點, 不過上証近來係日升日跌, 今日跌, 下周一理應反彈

內銀內險A股全面下跌, 拖低相關H股, 本港疫情進一步惡化, 連地產股都反艇, 侵侵進一步打壓中企, 增加近80間入黑名單, 股民持貨隨時中伏

尋底市每周都會創新低(過去幾周低位26127.26256.26375), 今個月低位陰陰跌逐步下移, 本周低見26127, 會否下試26000，以及何時插落去繼續回補25800~25950上升裂口就要看中美股市表現以及貼價牛熊分布，大鱷通常係追住貼價牛熊來殺, 目前係牛多熊少利下殺

~~~~~~~~~~~~~~~~~~~~~~~~~~~~~~~~

暗湧處處

要留意指標股QQ能否守住$580, 如失守不妙, 因為QQ見頂, 港股見頂, 本周高低位26127~26678, 底頂下移的話, 下周(21~24/12)就會插穿26127, 要小心下周，因為20號之後通常係爆邊的時間窗囗，港股破底危機未除, 美元跌穿90大關後反彈, 利淡人民幣, 不利港股

港股在26500穿梭太窄幅, 炒指數冇肉食, 炒股不炒市, 資金愛炒新股及半新股, 以及消息股, 舊經濟股受冷待, 侵侵踢走中概股, 博回流香港上市, 港交所受追捧, 藍燈籠中移急升撐市, 驚驚, VHSI恒指恐慌指數止跌回升

未來兩周都是超短周, 或會打破每周升跌日數及周波幅等慣性走勢, 証券行表示近來散戶入市意慾低, 亦有基金經理收爐放聖誕及新年假期, 港股成交縮, 大鱷就更容易舞高弄低, 牛熊分布嚴重失衡, 牛多熊少, 牛牛上移至26300附近, 向下每百點都有牛牛, 周一(21/12)轉節氣冬至, 市況不會平靜, 會有大龍鳳,

周一(21/12)土木星相會, 好友要小心了, 早已有預言家說12月中新冠病毒會變種, 中中中, 作惡多端的英國今次折墮了, 英國衛生大臣形容變種病毒株已經失去控制, 傳染力增強七成, 英國確診人數爆升, 多國禁英航班降落, 全球疫情惡化, 利淡市場氣氛

由10月起，科指每升兩周就會跌一周, 不過本周是超短周, 未知會否影響慣性走勢

升升跌 升升跌 升升跌 升升(本周跌?)

京東健康本月22日(周二)起獲納入MSCI標準指數及大盤股指數, 自上市後一路急升, 相信係受納入指數的被動買盤所推動, 入指數後這些買盤就會消失, 到時只係靠大媽條水喉推升, 小心情況同Tesla一樣, 升過龍入指數後會反艇

臨危托沽, 底頂下移, 部署下殺屠牛

21/12 周一港股連跌兩天, 恒指收26306, 跌192點,

今日既是冬至轉節氣, 亦係土木星相會的日子, 亦係周一例跌日, 港股果然反艇, 低見26274(前底26127), 26300附近貼價牛陣亡, 牛熊分布嚴重失衡, 牛多熊少利下殺, 牛熊都非常貼價, 肥牛在26250附近, 向下每百點都有牛牛, 上升裂口在25800~25950有待回補, 小熊在26500樓上

內銀內險A股弱勢持續, 不過比亞迪A股升一成帶動相關H股爆升破頂上企$200之上, 上証反彈重上3400, 大鱷借勢守住26200, 港股雖然未破底, 但唔撐得幾耐, 似係托住指數來洗倉, 唔少指標股已跌穿月內低位, 代表有大手走鬼沽盤, 疫情惡化, 港股收緊限聚令, 地產股洗倉式下跌, 不過大鱷操控大市手法非常高明, 港交所.京東健康.比亞迪飛天, 扮跌唔落, 營造港股仍熱炒的氣氛, 吸引好友入局, 令股民難捨難離, 繼續沉淪股海

港股大鱷大媽一直托沽, 玩跌下彈下, 恒指已連跌2天, 通常連跌2~3天後就會彈, 今年最長亦只係連跌4天, 港股有大媽睇場托沽, 26300係關鍵大位, 今日低見26274即彈上26306收, 要收於26300樓下3天或者插穿26000才能確認淡友已奪得主導權, 否則爆邊後仍會返回26000~26600繼續磨, 玩多幾日收爐

~~~~~~~~~~~~~~~~~~~~~~~~~~~~~~~

洗倉走鬼

科指連跌兩天, 打破了過去兩周跌1日例彈的慣性走勢, 代表走勢轉弱, 不過過去三個月科指通常跌2~3天就會反彈, 京東健康.明源雲等新貴加入科指或會令科指走勢更難測, 京東健康納入多個指數, 而納入港股通就有大媽條水喉撐, 不過納入指數的被動性買盤消失, 疫情嚴峻, 納指愈升愈有, 所以港股宅經濟科技股亦見資金追捧, 亦係舊經濟股大跌但港股仍跌唔落的主因, 一雞死一雞鳴, 但內銀內險A股沽壓大得不尋常, 洗倉中, 後市不妙

風水輪流轉, 英國終於感受到被孤立圍堵的滋味, 報應, 英國衛生大臣形容國內的變種病毒株已經失去控制, 傳染力增強七成, 英國確診人數單日爆升至近36000宗, 上星期美國每隔33秒就有一人死於新型冠狀病毒, 本港及多國禁英航班降落, 全球疫情惡化, 避險情緒升溫, 匯市大幅波動, 股市沽壓加劇,

美國兩黨終於就9000億美元的新刺激協議達成一致, 民主黨希望在拜登上任後推動更多的救助措施, 意味著財政政策會延續寬鬆, 美國繼續放水抵消了英國拖累全球疫情惡化的利淡消息, 美股高企不下, 但港股收爐味濃, 沽壓沉重, 往往一彈就散, 底頂下移尋底格, 扮跌唔落引牛入局, 夜期已率先跌穿26000, 代表淡友正在採取主動進攻, 如本周收跌, 未來幾日就要向下擴大周波幅, 亦可順道擴大月波幅及屠牛

周五(4/12) 恒指季檢調動, 7/12美團正式染藍

周四(10/12)歐央行決議金融機構可否派息

2020庚子病鼠年12月14日將會出現日全食, 小心政經會有震盪

12月13~14日將會出現雙子星座流星雨

14/12美國總統大選~選舉人團投票日, 6/1/2021要等待美國 國會承認大選結果, 所以12月股市避險沽壓會特別大

子年子月: 7/12/2020~4/1/2021

周四(17/12)聯儲局議息, 美元失守90大關

周五(18/12)美國市場四重結算日, 內地股指期貨結算

周一(21/12)轉節氣冬至, 市況不會平靜, 港股周一例跌

周一(21/12)美國國會開始休假, 美國國會兩黨據報就9000億美元的新冠援助達成共識,預料周日(20/12)表決

中芯國際(00981)、中交建(01800)、中鐵建(01186)和中國中車(01766)四間中國企業將從納斯達克指數成份股組合內剔除，以遵從美國政府限制中國企業股票交易的指令, 剔除於12月21日起生效。富時指數調動, 有被美國制裁股份會被剔出, 沽壓會增加,

21/12開始土木星相會，隨後幾個月內會有災？？？

升過龍的美國電動車製造商Tesla將於12月21日納入指數, 被動買盤不斷推高股價, Toyota進軍電動車市場, 強大競爭對手出現, 或會對Tesla構成威脅, 要留意加入標普後Tesla會否變盤碌落山

12月基金年結

美國德國英國等歐美國家最快12月展開新冠疫苗接種

4/1/2021 MSCI調動, 有多隻中資股遭剔除

油組及其盟友將聯合技術委員會和部長級監督委員會會議, 推遲至明年1月3~4日

拜登或會於明年20/1/2021入主白宮

《互聯網保險業務監管辦法》明年2月1日起生效

反壟斷法

============================

11月份恒指周波幅(連升4周):

第一周 1567點

第二周 565點

第三周 426點

第四周 671點

12月份恒指周波幅(連跌3周):

第一周 585點

第二周 614點

第三周 551點

第四周 ??點    全周只得3日半市, 24/12(平安夜)半日市, 冇夜期

第五周 ??點    全周只得3日半市, 31/12(大除夕)半日市, 冇夜期

============================

免責聲明

本網站所載的資料並不構成投資的意見或建議。在作出任何投資決策前，您應考慮自己的財務狀況、投資目標及經驗、風險承受能力。

本網站所載的資料不構成任何投資產品之要約、要約招攬或建議。本資料只作為一般參考用途；並未就所載資料的完整性、準確性及時間性作出任何保證, 它並沒有考慮您的個人需要、投資目標及特定財政狀況。