28~30/12 好友反擊+部署高位結算

2020/12/28 23:59:03 網誌分類: 經濟
28 Dec

12月第五周只得3日半市, 31/12(大除夕)半日市, 冇夜期

恒指已連跌4周, 今年恒指連跌3~4周例彈, 未試過連跌5周, 即係31/12要收26386之上才符合慣性走勢, 同時月線亦收升, 恒指連升3個月

===================================

期指轉倉活躍, 力守26300, 底頂上移部署結算位, 反彈在望

28/12 周一恒指收26314, 跌72點, 結束兩連升

假期前後例牌大龍鳳, 周一例跌, 慣性走勢全中, 過去四周的星期一都係收跌大約110~550點, 今日只係跌72點, 連科指出現小股災都無法推恒指落26000, 強得不尋常, 看來結算周好友正部署大反擊, 上周曾說港股估值不貴, 舊經濟股平靚正, 不過新經濟科技股就太貴, 唔敢再炒, 話口未完新經濟股就連插兩天, 股價當堂變得吸引, 而今日就係靠舊經濟股支撐大市

科指連續兩日股災式大插, 港股理應插幾百, 但卻依舊跌唔落, 僅跌72點, 恒指仍企26300關鍵大位附近, 操控港股的大鱷真係神級, 撐市誠意十足, 推高內銀內險等舊經濟股來抵消科企的跌幅, 亦有可能係舊經濟股跌到殘, 基金粉飾櫥窗, 上周收26386, 如果按照今年恒指連跌3~4周例彈的慣性走勢, 未來幾日就要反彈, 夜期收高水亦符合元帥的預測,  今日收26314, 周四只要收26386/26422之上, 今個月就收陽收升, 明日推升既可部署後日周三結算位, 亦可部署周四(31/12)畫周月年三條線

科企連日暴跌產生骨牌效應, 斬倉盤令沽壓進一步加劇, 大成交急挫, 港股全日成交高達$1907億, 當中科企佔$930億, 洗倉式急瀉, 科企小股災, 點升上來就點落番去, 大鱷係唔會俾股民賺錢落袋, 今鋪股民嘔突盈利, 不過科指連跌兩天, 按照慣性走勢, 通常跌2~3天就會反彈, 點跌落黎, 就點上番去

今年首季爆發新冠疫情後, 美國宣布歷史上最大放水規模, 自此全球股市就觸底反彈, 展開大升浪, 低息環境下水浸市場, 熱錢氾濫, 所以港股往往係急跌急彈死唔去, 呢幾個月有一班港股大鱷玩超短炒波幅, 係高沽低吸快閃食胡, 同一方向1~2日就轉向, 呢班熱錢大鱷特別喜歡炒新經濟股及IPO和半新股, 抽升殺跌, 毫無徵兆下會突然變盤, 代表呢兩日科技股大插, 跌勢過急, 超賣跌過龍, 會有淡友回補空倉及技術性反彈, 有時股份暴跌係大鱷為了殺好倉, 當好友陣亡就會反彈, 好淡通殺

美元受制於91掉頭回落, 在90邊游走, 資金流仍利好股市, 早前已警告說市場熱炒的新經濟股升過龍, 夾硬炒高來納入指數, 市盈率已升至不合理水平, 由於波幅大, 吸引股民炒作, 隨時接火棒, 呢兩日科指就大瀉, 烏鴉口

阿里由 $230 大位向下有大量 ELN I kill you later 等衍生工具, 所以到價要接貨的股民貨到手即刻走鬼止蝕, 而發行商因應衍生工具陣亡亦沽出用來對沖的正股(早前股份急升時因發行衍生工具, 所以發行商要追入正股來對沖), 所以今日科企暴跌部份係技術因素, 並非全是看淡後市的沽盤, 阿里宣布增加股份回購計劃總額至100億美元, 有意穩住市場信心

~~~~~~~~~~~~~~~~~~~~~~~~~~~~~

成也科企.敗也科企

今日科指雖然反艇, 但恒指已扭轉過去幾周底頂下移的弱勢, 變為底頂上移尋頂格, 高見26514, 已升穿上周高位26498, 係好友反擊訊號, 後市只要收26500之上, 又或者升穿月中高位26678, 就代表好友已奪回主導權, 恒指已連續6日競價低開, 只要明日高開, 代表好友出手, 貼價熊肥牛瘦, 26500樓上每百點都有熊掌, 有上攻誘因, 前頂在26870.27040

侵侵簽署舒困法案, 英國與歐盟貿協亦已簽定, 歐美期指造好, 但大鱷刻意留力, 港股唔跟升, 可能係好友想拖到明日結算前夕才反擊, 大鱷要部署後日(周三)結算位, 以及周四畫月線及年線

今個月國指8升11跌, 以升跌日數來推斷, 今個月國指月線有可能收跌, 但恒指明顯比國指強, 本月收升仍未絕望, 只要科企淡友回補空倉, 大市就會急彈, QQ於$500~$520構成支持區, 大媽見QQ暴跌趁低大手吸納, 係利好訊號, 但大媽見建行急升就沽貨

今個月主要以26300~26500為中軸穿梭, 升穿跌破26500都拋離不遠, 反映好淡雙方仍爭持不下, 阿爺的反壟斷[九不得]政策繼續拖累相關股份, 但上証力守3350, 不斷上攻3400, 撐起港股, 好友正在等待利好消息做藉口反擊

近來一直擔心港股沽壓會加劇, 其中一個原因係侵侵上月簽署行政命令, 制裁35間中國企業, 指這些企業受中國軍方擁有或控制, 明年1月11日起(最遲11月完成)將禁止美國的投資公司、社會保障基金及其他公司, 買賣黑名單上中企股份

{#icono0_51}{#icono0_51}{#icono0_51}{#icono0_51}{#icono0_51}{#icono0_51}{#icono0_51}{#icono0_51}{#icono0_51}{#icono0_51}{#icono0_51}{#icono0_51}{#icono0_51}{#icono0_51}{#icono0_51}{#icono0_51}{#icono0_51}{#icono0_51}

結算前夕期指轉倉活躍, 底頂上移繼續尋頂, 部署高位結算, 熊熊命危

29/12 周二恒指收26568, 升253點, 收復10及20天線

上周插穿26000時睇盤路似轉勢向上, 但科企出現小股災擾亂視線, 過去兩日科企急瀉跌過龍, 似係大鱷刻意玩大插插來殺好倉及逼股民/基金斬倉止蝕, 低位再收貨, 真係陰毒, 科企插兩大棍吸引淡友大舉入市, 熊熊大幅下移, 中伏了, 今日恒指即市波幅突然縮窄至186點, 係大龍鳳先兆

睇下期指表現就知結算周好友正部署大反擊, 上周期指多數都係收低水或小幅高水, 但踏入本周一, 期指就連續兩日收大高水, 預示好友會繼續殺上去, 部署高位結算, 而大鱷就要屠熊追數

QQ見底, 港股亦同步見底, 齊齊止跌回升, 恒指連續兩日底頂上移, 周波幅未達標, 仲有得上, 唔少股份都表現亮麗, 有粉飾窗櫥味道, 亦有可能是為了推高結算, vhsi恒指恐慌指數下跌, 唔驚! 預示明日會升穿今日高位26618繼續殺上去26800.26870.27000..., 至於上月高位27040今個月或下個月點都要上破來擴大月波幅

阿里回購消息觸發一眾科企大幅反彈, 阿里重上$220水平, 大媽連日大手掃QQ撐市, 大插後的科企估值亦變得吸引, 短炒買盤及淡友回補空倉, 科企連跌兩日超賣借勢急彈, 近來科指例牌連升, 明日升勢有望延續, 按照慣性走勢, 科指跌兩周後例彈, 今日收7997, 即係未來兩天會踢上去8143樓上收,

推動恒指上企26500大位, 恒指連續兩日底頂上移呈尋頂格, 高見26618, 繼昨日突破上周高位26498後, 今日進一步挑戰月中高位26678, 結算周好友出手, 已奪回主導權, 今日亦打破了恒指連續6日競價低開的弱勢, 今日高開高收呈陽燭, 收復10及20天線, 靚仔, 只要明日繼續高開, 代表好友想破頂而上

~~~~~~~~~~~~~~~~~~~~~~~~~~~~~

肥熊命危

科企過去兩日出現小股災, 全城看淡造淡, 今日就急升挾淡, 大鱷超奸險, 引淡友入局, 好友縮手, 貼價26000~26300只得百多隻小牛, 欠缺吸引力, 所以今日大鱷伸一腳上去26500大位之上, 吃了一口熊掌做前菜, 26600樓上每百點都有肥熊, 一路排到上27600, 肥到不得了, 明日期指結算亦有上攻誘因, 26800係關鍵阻力大位, 前頂在26870, 如能突破就能擴大月波幅

到今日為止恒指高低位25998~26870, 月波幅只得872點仍未達標, 後市仍有爆邊的可能, 試完底再沖頂, 22/12創月內新低25998後掉頭向上, 今日港股來勢洶洶, 作勢殺上26870, 明年1月開新局基金經理回歸部署新倉位繼續燒煙花迎新歲

睇今日港股表現, 恒指今個星期周線會跟隨慣性走勢收升, 結束四周跌勢, 上月恒指收26341, 今日收26568, 本月收升已無懸念, 磨左成個月, 以窄幅橫行來消化沽壓, 來代替深度調整, 好友得米, 恒指終於連升3個月,

截至周一(28/12), 今個月國指8升11跌, 通常跌市日數多, 該月多數收跌, 但今日國指急起直追玩補漲, 升跌日數已變成9升11跌, 只要明日續升, 就可增加本月收升的勝算, 國指上月收10546, 今日收10449, 未來兩天只要收升98點, 國指周線月線都能收升

上証連日受制於3400, 今日收跌18點報3379, 仍力守3350, 近來上証多數係跌一天即彈, 即係明日會彈高, 只要上証突破3400, 港股上升動力就會增強, 美元弱勢持續, 失守90整數大位, 利好人仔, 熱錢由9月起逐步流入新興市場, 市場風險胃納上升, 資金由債市轉投股市, 炒明年經濟復蘇

美股牛氣沖天, 港股既似資金市, 亦似牛市, 過去幾個月累積龐大升幅仍高企不下, 早前講過道指及恒指約有三千多點的差距, 港股大幅跑輸道指, 美股近來仍高企不下, 所以港股插穿26000/10300即彈, 保持不會多過四千點的差距, 以今日來說, 仍有高達約3800點差距, 有條件追落後至超過3000點, 韓股全年升約三成, 美股台股屢創歷史新高, 港股係大落後, 今日港股急彈收復平均線, 資金湧入可能係追落後, 因為一月市況通常係向好, 大行紛紛唱好上望目標29000樓上, 亦提振市場氣氛

{#icono0_60}{#icono0_60}{#icono0_60}{#icono0_60}{#icono0_60}{#icono0_60}{#icono0_60}{#icono0_60}{#icono0_60}{#icono0_60}{#icono0_60}{#icono0_60}{#icono0_60}{#icono0_60}{#icono0_60}{#icono0_60}{#icono0_60}{#icono0_60}

期指結算港股爆升創月內新高, 底頂上移繼續尋頂屠熊之旅

30/12 周三恒指收27147, 大升578點, 連升兩天

12月期指結算價26943
12月國指期貨結算價10609

昨日說肥熊由26600一路排到上27500, 今日大鱷就玩爆升近600點, 高見27159, 大舉屠熊約4000張, 今日繼續有大量熊熊飛撲入市, 唉! 冇眼睇, 今個月反彈目標27300, 按照慣性走勢明日會有新高, 27200~27500有肥熊, 不過通常爆升超過500點翌日再高開就會惹來獲利沽壓, 長假期前會有周末沽壓效應, 獲利盤會湧現, 大鱷或會借勢玩窒窒步升來養熊, 因為27500樓上只得小熊,

好友已奪回主導權, 加上有破位追貨盤, 有助港股殺上去27300屠熊, 今日恒指創月內新高27159, 但國指落後, 仍未突破前頂10705, 預示國指明日會創新高, 扯埋恒指上山, 希望明日不要收得太高, 否則會增加下個月收升的難度, 明日大除夕半日市, 要繼續粉飾櫥窗, 畫周月年線, 黑期結算

美股三大指數齊創新高, 上証急升35點重上3400, 以全日最高位3414收, 靚仔, 推動港股破頂而上, 上証及港股今個月埋單同步收升, 阿爺好.港股好,, 只要上証站穩3400續升, 港股仲有得上, 港股已收復所有平均線, 但唔少股份仍處於多條平均線之下, 有條件追落後, 帶動港股更上一層樓,

慣性走勢全中, 科企日線兩連跌例彈, 收升月港股多數會在月尾創即月新高, QQ向上阻力$565, 如能突破, 利好

阿里及美團理應是受反壟斷政策影響最大的企業, 但今日卻爆升, 大媽掃美團及QQ, 係升市的推手, 月尾大鱷亦要屠熊追數, 順道擴大恒指月波幅, 大媽竟然掃入將於明年1月被國際指數剔除的中芯, 港股成也大媽, 敗也大媽

恒指收市升578點, 當中ATM三股合共貢獻恒指270點, 今日港股收升是正路, 但升幅這麼大, 毫不留力就有點奇怪, 我以為會26900附近磨埋今日, 明日才殺上去, 本來預期明年開局爆上27000, 但今日已提早出現, 26600樓上超過7000隻肥熊引誘大鱷, 梗係忍唔住啦! 繼早前中國簽署RCEP後, 中國與歐盟結束歷時近7年的中歐投資協定談判, 一槌定音, 亦利好市場氣氛, 老外大手掃A股, 怪不得上証突破3400大位高收

最新回應

美味雞煲
美味雞煲 2021/01/28
@soho*...

元帥,一開市好彩 5 大貪高位食糊,恆指好快急彈400點跌幅收窄,剛好係29,100點左右,見補番個上升裂口,梗係入場炒多轉啦定左止蝕位就唔怕。結算日開波跌咁多,下晝都冇眼睇,等下晝食糊,報仇成功之前輸咗1000點今日搞掂 🤩😅

門徒
門徒 2021/01/28

元帥如這只是A浪開始未來還有個C浪可到240,小門不建議太早持倉

soho*
soho* 2021/01/28

我係網誌寫擔心乜乜物物, 多數都會發生, 例如小心聯儲局議息會引發匯市波動, 小心阿爺出手為股市降溫, 小心基金贖回, 小心大媽提早收爐....

soho*
soho* 2021/01/28

水滴兄, 你真係好犀利, 竟然搵得到, 謝謝!

就係星期五(22/1)公布呢個監管措施, 令內地股市於星期一(25/1)大成交沖高見頂回落, 跟住星期二三四滬深股市成交急降, 阿爺嚇到內地基金走鬼散水, 怪不得恒指星期一與上証同步見頂回落, 係好友夾硬踢上去食胡鬆人

今日北水流入港股係本周最少, 係連鎖反應

炒股真係好難, 太多資訊, 好難兼顧