15/1 北水湧入力抗美資沽盤

港股低開高收呈陽燭, 續創新高, 大舉屠熊, 向29500.30000進發

15/1周五恒指收28573, 升77點, 連升兩天

大鱷借侵侵放生QQ及阿里消息連續兩日抽高, 恒指今日底頂上移, 但科指卻是底頂下移, 收跌119點, 皆因昨日科指大升225點, 升勢過急要回氣, 不過近來科指跌一日例彈, 國指雖然創新高, 不過卻跌穿昨日低位, 皆因上証本周收跌, 3600(2016年1月熔斷水平)沽壓加劇, 大鱷要等內地股市完成調整才有藉口殺上去28800,

下周一美股假期休市, 港股自由行, 由於沽空增加, 牛熊都非常貼價, 已進入屠殺範圍, 預示後市一係殺上28800挾淡屠熊, 一係略插穿28300秒殺小牛即彈, 今個月北水瘋狂掃貨, 推動港股級級上

一月上旬恒指試過5次競價低開, 都係低開高收呈陽燭, 買盤強勁, 一插即彈, 中港股市牛氣沖天, 交投暢旺, 今日港股成交高達$2540億, 為今個月第三高成交, 下周一內地公布GDP等多項經濟數據, 對中港股市升跌起關鍵作用, 市場普遍預期數據佳, 中國是全球經濟復蘇動力最亮麗的國家, 亦係資金流入中港股市的主因

去年(20/1/2020)恒指見頂29175後轉勢向下, 當時連插兩棍, 21/1/2020有下跌裂口在28492~28795, 今日高見28667, 正逐步回補這大型下跌裂口, 陳年蟹貨出龍, 短炒獲利盤湧現, 導致大市沖高回落, 收窄升幅, 近來多咗散戶輸錢, 代表港股升勢並不全面，要炒大媽愛股或消息才能獲利, 近日指數續創新高並收升, 但唔少股份卻反艇，因為大鱷大媽主力炒權重股及消息股, 輪流接力來推高大市, 其他股份冇水到

~~~~~~~~~~~~~~~~~~~~~~~~~~~~

牛熊分布利上攻

今日閃上去屠熊, 高見28667, 已進入去年21/1裂口阻力區, 28800亦係關鍵位, 由於港股嚴重超買, 下周或會有震盪, 不過大牛市好友當道, 淡友節節敗退, 大行托市安排配股, 大媽有國家任務要掃入制裁股護盤, 港股易升難跌, 北水對港股升跌舉足輕重, 北水流入頻頻創互聯互通以來新高, 所以過去幾周港股往往係即市調整, 一插即彈, 反映好友部署殺上28800~29000之心未變, 去年高位在29175, 以月波幅計早晚會上破, 只要站穩29000, 500點一級就要上29500.30000...

整體牛熊分布係牛多熊少, 牛市多數係呢種佈局, 貼價就牛瘦熊肥，熊熊較吸引, 肥熊在28700-28800, 以及29000, 小牛上移至28280附近，本周港股急升，北水大舉湧入, 目前港股由好友主導，過去幾日底部不斷上移，低位: 28294/28280/28136/27781/27794，不容有失，如果守得住, 就會挑戰28800, 如跌穿就係淡友反擊訊號, 今日大鱷冇殺上28800, 係要預留上升空間俾下周, 因為尋頂市每周都會有新高, 預示下周會升穿本周高位28667來擴大周及月波幅

過去幾個月好消息浪接浪, 多國宣布於去年12月開始為國民接種新冠疫苗, 去年11月中旬中國與東盟及日韓澳紐等國簽署《區域全面經濟伙伴關係協定》（RCEP）, 歷時7年的《中歐全面投資協定》談判於去年12月尾落實簽署, 一眾利好消息推恒指上28000, 近日登登公布上任後會推出1.9萬億美元紓困措施, 加強熱錢及基金經理掃入中港股市的信心, 恒指進一步上企28500, 

恒指愈升愈有, 已突破去年二月頂部28055, 級級向上挑戰28500.28800.29000.29500...唔計特大月波幅, 去年大波幅曾做2800~2900點, 如果照跟, 今個月就會挑戰29800~30000水平, 不過要有肥熊以及上証配合才能成事

2020年頂 29175
2019年頂 30280
2018年頂 33484
2017年頂 30199

~~~~~~~~~~~~~~~~~~~~~~~~~~~~

北水流入創新高力抗美資洗倉盤

恒指已經連續三周都係每星期只跌一天, 下周跌市日數或會增加, 不會跌1天這麼少, 因為去年恒指表現最好的一個月都跌了6天, 過去一年收升月每月跌6~11天, 而到目前為止一月份只跌了兩天, 跌市日數未達標, 不過如果大媽大行力撐, 一月效應仍然跌唔落, 就要小心二月份要補跌

可能有好友於11300附近食胡, 國期未平倉合約周一(11/1)有91794張, 其後國指一路升, 國期未平倉合約就日日都減少, 周五(15/1)只餘下83492張, 但恒指未平倉合約變化不大, 唔少好友仍博上30000大關, 去年各國央行推出歷來最大規模的紓困措施, 水浸市場, 亦係股市跌唔落的主因

亞太區股市下跌, 今日港股雖然收升, 但測市指標卻出現多個利淡訊號, RSI目前在75附近, 嚴重超買, 以往都企唔穩碌落去, 港股回調壓力愈來愈大, 美元於8/1重上90後反覆上升, 目前已殺到去90.8附近, 美元止跌回升, 近日比特幣.金銀油等商品走勢轉差, 港股收升但整體下跌股份竟然遠遠多過升股, 沽空增加至12.68%, 為5/1以來最高, 收市U盤恒指走低, 升幅收窄, 抹去47點升幅, 反映收市U盤好友走貨, 亦有可能係大鱷壓低收市位預留下周上升空間, 部署下周收升

近來車股沽壓沉重，市傳比亞迪正安排配股，滬深大媽繼續走車股獲利, 不過就不斷大手掃入QQ以及被美國制裁的股份, 力抗美資的洗倉盤，大鱷沽貨愈沽愈升, 北水流入創新高, 短短兩周凈流入高達$1300億元, 阿爺護盤誠意十足, 恒指全周升696點, 大好友本地基金經理覺得港股雖然未見頂, 但升勢過急, 因而沽出升過龍技術指標轉弱的股份止賺及換馬

~~~~~~~~~~~~~~~~~~~~~~~~~~~~

中美股市

早前講過道指及恒指約有三千多點的差距, 氣氛好時就會係跑輸約二千點甚至更少, 美股爆上31000, 目前兩者差距已收窄至2400點, 拜登表示上任後會大開水喉, 亦利好市場氣氛, 港股繼續追落後

上証於周三(13/1）高見3622後反艇，其後連日底頂下移，內需消費股散水, 不過權重內銀內險買盤強勁, 全面急升, 上証急跌低見3533後急彈, 收復失地平收報3566, 力守3550水平, 結束兩日跌勢, 如上証見底, 利好下周, 因為過去兩個月上証未試過連跌兩周, 如上証觸底回升, 有助推高港股

老外今日掃A股金額明顯比昨日少, 是周二以來凈流入A股最少的一天, 可能因為美元反彈, 利淡人民幣，目前資金流仍利好中港股市, 不過要特別留意美債息，當息囗再上揚，債滙有變，就會拖低股市, 只要人仔保持強勢, 則利好中港股市

昨晚美股三大指數高開低收, 單日轉向呈陰燭, 道指及納指創新高後倒跌收場, 走勢差劣, 道指周三四連跌兩天, 為一個月以來首度出現連跌, 反映6/1美國國會暴動後令市場擔心20/1拜登上任或會出亂子, 加上下周一(18/1)美股假期休市, 投資者先行沽貨獲利

~ 14/12美國總統大選~選舉人團投票確認登登當選, 由這一周開始, 道指.納指.上証就連升四周, 牛氣沖天, 不過升勢卻在本周(15/1)斷纜, 而港股亦已連升三周, 未來一周會否跟美股及上証升勢斷纜呢? 抑或撐到月尾結算後才斷纜呢?

港股係慢十拍, 道指.納指.上証早於18/12的一周就展開升浪, 急升了一個月才回氣, 可能係本港基金經理放聖誕假期, 港股升浪係由31/12/2020的一周才開始, 所以港股升勢斷纜理應遲過道指.納指.上証, 如果同樣係急升一個月(四周)的話, 港股就要在1月尾才見頂回落, 如今恒指連升3周, 即係下周有望收升, 收28573之上, 牛市逢跌買上策略不變

~ 反映經濟的波羅的海乾散貨指數BDI於1100附近由9/12止跌回升, 展開大升浪, 升幅驚人, 不過日前企唔穩1800大關, 於14/1失守1800, 連跌兩天

BDI由9/12止跌回升, 展開大升浪, 而港股就慢十拍, 由29/12才展開升浪, 但方向大致相同, BDl見頂回落具啟示作用

~ 登登表示上任第一天(20/1)就會公布取消多項具爭議性的侵侵政策, 全球股市會有何反應呢? 例如重新加入巴黎氣候協定.更改移民政策.強制戴口罩......市場擔心登登採取更嚴厲防疫措施, 例如封城, 所以日前美股創新高後倒跌收場, 連日下跌, 周線四連升後收跌

民主選舉政府的弊處係一換領導人, 政策就可180度轉變, 朝令夕的不利國家發展, 中國的制度反而有優勢, 十年廿年計劃, 有利國家長遠經濟發展

~~~~~~~~~~~~~~~~~~~~~~~~~~~~

另類測市指標

回顧去年港股是在20/1/2020(年廿六)見頂29175/11502回落, 幾日後, 25/1/2020係大年初一, 而今年的大年初一是在12/2, 天象亦有異動, 2021年的2月10日這一天會出現六星連珠，太陽、月亮、水星、木星、金星、土星將連成一條直線

如果歷史重演, 今年2月初港股就會見頂回落, 如果1月升勢過急, 提早於1月尾見頂都得, 今年第1次水星逆行是在1月30日至2月20日, 六星連珠是在2月10日, 剛好在其中, 嘩))) 唔講得笑

中國人最重視立春新年, 去年農曆新年前中港股市升勢逆轉, 可能同北水散戶/大媽/內地基金/機構投資者/提早收爐, 沽貨套現放年假有關, 當時淡友趁真空期偷襲，現時只有不足一個月就係大年初一(12/2), 已進入倒數階段, 今年會不會歷史重演呢？

21/12/2020開始土木星相會, 占星學上顯示會有災難，今次兩粒星是近400年以來最接近的一次，這麼近可能對地球磁場有影響, 預示人類情緒.政經界或會有異動, 結果侵侵下台, 美國民主選舉制度近乎崩潰, 國會發生暴動, 華盛頓仿如空城, 街上軍人警察多過平民, 好準呀!

=========================

MSCI 明晟8/1將三大中資電信股在港掛牌股份剔出指數

富時羅素指周一(11/1)從全球指數中剔除3間中資電信股

18/1(周一〉美國假期，金融市埸休市