22/1 失守29500利淡

2021/01/22 20:44:03 網誌分類: 經濟
22 Jan

港股回調整固, 消化沽壓, 儲力向上

22/1 周五恒指收29447, 大跌480點, 連跌2天, 反彈在望

港股符合了過去兩日收市總結所說的回調指標, 隨即大幅回吐, 已成功紓緩了超買, 9RSI由90.6大幅回落至72.3較健康的水平, 釋放了沽壓反而有利再上攻, 恒指通常見短頂就會嘔600~800點, 然後重拾升軌, 見大頂就要嘔逾千點, 由高位30135跌至今日低位29413, 累計回吐722點, 已到達健康調整目標範圍,

今個月港股由好友主導, 為了避免跌穿10天線(目前正急速上移至29100附近), 下周一好友必定會反擊, 今日貼價牛熊都湧入, 29900樓上有熊仔, 向上每百點都有熊,  阻力30200, 以月波幅計不應上破30500~30700阻力區

由去年11月起恒指通常跌2~3天就會急彈, 如今已跌了兩天, 市強不應出現三連跌, 下周四期指結算, 好友要部署結算位, 向下會力守29300及29100(上升裂口在28864~29100), 向上會再殺上29800及30000關鍵位, 挑戰前頂30135, 恒指國指雖然大跌, 但有北水大媽撐腰的科指非常硬凈, 收市僅跌44點, 納指仍強勢, 增強港股科企的吸引力, 一回就見資金追入, QQ尾市壓低收窄升幅係好事, 擴大了下周一的上升空間, 有助推番港股上山

好友及大媽重倉港股, 都想搵靚位食胡或轉倉, 以往港股創新高不會一頂就玩完, 會在高位反覆以及再挑戰前頂, 或者做圓頂派發, 派完貨就深潛, 以時間上來看, 升浪未完, 仍會反覆尋頂, 所以頭一浸回吐也不會深, 急跌就會急彈, 試完底就會再沖頂, 沖頂打回頭就要再探底, 以周及月波幅計, 重上30000不難, 500點一級, 下一站30500, 要看大鱷大媽想今個月抑或下個月才殺上去

今日港股雖然下挫, 但全周恒指仍累計上升874點,連升四周, 走勢仍強, 北水至愛的股王騰訊, 逆市創收市新高$691, 新冠疫情惡化, 舊經濟油股、金融股、地產股、濠賭股齊齊下挫, 係跌市元兇, 強者愈強, 股民跟紅頂白, 睇今日港股表現, 資金由舊經濟股換馬新經濟股, 所以科企跌唔落, 反映科企買盤強勁

今日港股雖然反艇, 但亦無需悲觀, 北水仍持續流入港股, 只係縮減, 如對比上個月, 流入的北水仍屬高水平, 不過今日流入的資金係今個月最少, 當今日大媽托市力度收細, 港股就反艇

~~~~~~~~~~~~~~~~~~~~~~~~~~~~~~~~

淡友逃命

為了輸少一蚊得一蚊, 淡友不會坐以待斃, 今日淡友就借A權重股急挫, 以及港府將於本周末封鎖油麻地佐敦來推低港股, 下周期指結算, 下周初係美資沽出制裁股的死線, 淡友或會乘機再出手, 今日大插, 有淡友逃命, 由於累積空倉大, 下周淡友或會再伺機而動

昨晚美股收得差, 三大指數都沖高回落, 道指標普500都收陰燭, 加上內地股市反艇, 港股就瀉, 早前網誌一直提醒大家今日係3家券商要沽清受制裁股份的最後死線, 今日港股沽壓大是在預期之內, 但估唔到大媽縮手唔托, 不過以往當內地股市反艇, 大媽顧住A股, 就會任由港股回吐, 當內地股市回穩, 大媽就會再專心炒高港股

過去兩日全城分析師都叫短炒食胡, 這麼多獲利盤, 港股今日大跌不足為奇, 大牛市氣氛佳, 全城炒家本周獲利甚豐, 仍磨拳擦掌部署再炒第二轉, 會加強低位的承接力, 重上30000不難, 不過想企穩殊不容易, 早市老外沽A股獲利, 內銀內險A股大幅下挫, 拖低港股, 幸好尾市老外再掃入A股, 上証收窄跌幅, 已是連續兩日收3600熔斷水平之上,

因應美國制裁, 標普道瓊指數將在指數中剔除中海油ADR和 H 股, 1/2起或者之前生效, 而MSCI明晟將中海油從 MSCI 剔出, 下周二(26/1)收市後生效, 富時將會在27/1(周三)剔除中海油, 周三聯儲局議息, 今日沽空隨即由過去兩日的15~16%, 大幅回落至12.39%, 為本周最細沽空比率,

其實今個月美資一直狂沽受制裁股份, 只不過大媽食晒沽盤, 港股才能連日爆升, 今日滬深大媽仍積極掃入QQ及美團, 今日流入港股的北水縮減, 可能係公募基金入夠貨, 亦有可能想等回吐才入貨, 因為AH股差價已收窄, 削弱H股的吸引力, 不過今日大插, 下周北水可能會再度湧入, 因內地股民仍積極開戶口及加倉入市炒港股

大時代仍有淡友死忠與大媽對著幹, 真係要買定官才, 資金持續流入QQ認沽證, 輪場資金以做淡QQ較積極, 為近日最多資金流入的相關資產之一, 有挾淡誘因, 港股通資金流反映北水大媽傾向掃入QQ, 截至20/1, 1月以來累計流入金額超過500億元, 淡友與北水大媽對著幹冇好下場, 大媽掃貨係唔理市盈率, 唔理負面消息, 唔理技術指標, 合埋眼不問價掃貨

尋頂市每周都會有新高, 預示下周會升穿本周高位30135, 基金經理仍看好後市, 普遍認為今次回吐只係因為過去幾周升勢過急, 超買, 要作出調整, 牛市未完, 震完會再上

以北水掃貨的兇狠, 當內地發行新公募基金, 又會大手掃港股, 今日上証跌14點, 收3606, 已是連續兩天收3600之上, 中港股市通常係同步尋底頂, 當上証完成調整或創新高, 港股就會跟住爆上

港股大方向要逐一挑戰前頂, 專門搞事打壓中港的侵侵下台, 陰霾散去, 市場憧憬中美關係會改善, 熱錢流入中港股市, 

2020年頂 29175
2019年頂 30280
2018年頂 33484
2017年頂 30199


========================


3間美資金融機構摩根大通、摩根士丹利及高盛因應美國禁止當地投資者投資與中國軍方有關的企業, 提早終止共484隻衍生產品買賣, 最後交易日期是1月22日, 1月25日起暫停買賣, 此舉或會導致券商需沽出用以對沖的正股, 會引發市場波動

MSCI明晟將中海油從 MSCI 全球指數及 MSCI 中國全股票指數剔除, 於星期二(26/1)收市後生效, MSCI 表示亦會將中海油剔出相關非市值加權指數、相關定制化指數

富時羅素將會在27/1(周三)從富時羅素全球指數系列、富時中國50指數剔除中海油

2021年1月12日 08:28 貝萊德據報因應特朗普禁令 已開始沽3中資電訊股

<匯港通訊> 外電報道,全球最大基金公司貝萊德(BlackRock)開始沽售3間中資電訊商股份,以遵守美國政府禁止買賣相關股份的命令。報道引述消息人士稱,貝萊德過去數周已陸續出售中國移動、中國聯通與中國電信股份,並且會沽售餘下持股。

最新回應

投資高手
投資高手 2021/10/23
@soho*...

不過,貼價熊證甘多,雖然昨天減少了,但仍不少,是否顯示也有很多散戶看淡?甘大户會不會繼續炒上一邊殺熊證一邊派貨給散戶呢,即係短期仍不會下跌?

史哥
史哥 2021/10/23
@試下學下...

其實你股感咁好,信自己啦。

推弱王記得單聲~跟你揾食。

{#iconb_64}

soho*
soho* 2021/10/23

c6, 地產板塊昨日成交高達$49億, 為今個月最大成交, 這麼多資金突然湧入, 必有所圖, 結果今日再爆升, 連日急升, 夠水位食胡了

soho*
soho* 2021/10/23

投資高手, 通常每星期升/跌2~3天, 但本周只係跌了1天, 跌市日數未達標, 按照升跌日數的慣性走勢, 下周跌市日數會增加

月中曾寫了一個劇本, 就係預測本周恒指會收升, 連升四周, 市場氣氛升溫, 人人向上望 , 好友及後知後覺的散戶進場接火棒, 等埋貼價BB牛出世, 月尾淡反擊,