2/2 重上29000

2021/02/02 23:58:42 網誌分類: 經濟
02 Feb

熱錢極速變臉, 好淡通殺, 港股急跌急彈是常態

2/2 周二恒指收29248, 升355點, 連升兩天

港股今日沖高回落, 高見29511後收窄升幅, 剛好去到29500關鍵阻力位, 如果係試水溫, 3日內就應破頂, 如本周未能上破29511就有可能係因為本周初兩日已做夠周波幅, 大鱷留力下周, 因為尋頂市每周都會有新高, 趁反彈走貨炒波幅, 博大市沖高回落執平貨,2月下旬大媽假期後回歸港股水頭充足, 有得炒恒指季檢誰是新貴, 炒MSCI新貴, 炒3月兩會, 炒月尾高位結算

造好買上博破頂挑戰29800~30000, 短線造淡可博落去回補今日的上升裂口28982-29198, 因為突破29000不會一去冇回頭, 2月的升浪係震住上, 點升上來就點落番去, 不要忘記30/1~20/2水星逆行, 10/2六星連珠, 霉運的庚子病鼠年最後幾天的殺傷力, 預言家早已預告20/12/2020~31/3/2021會有災, 以及農曆年前幾個星期(25/1起)係大媽沽貨撤退收爐期, 係淡友偷襲良機, 去年美股就係2月中見頂回落

本周由好友主導, 目前港股正在跟住中美股市尋頂, 收升周多數在周三四五創該周高位, 不過以往亦曾見過周初造頂, 因為周初升得太多, 一步到位, 周波幅已達標, 唔破頂都得, 可以留番下星期才創新高, 今個月一定要升穿29511來擴大月波幅

一如日前所說, 上周港股跌得太多, 4跌1升, 本周可能係翻轉版, 要補漲, 升市日數會增加, 可能係4升1跌, 好友繼續反擊, 港股已收復20天線, 亦收28800樓上3天, 代表好友已奪回主導權, 不過目前本周已升了2天, 代表未來幾日會有1~2日收跌

~~~~~~~~~~~~~~~~~~~~~~~~~~~~~~~~

中港美三地股市同步尋頂

中港美三地股市係同步尋底頂, 當中美股市觸底反彈, 港股亦會跟隨尋頂, 當中美股市見頂, 港股就要跟住落山, 港股雖然連續兩日急升, 但以一般見雙頂(30135/30191)回落的大型調整浪來看, 閒閒地都要消化沽壓, 整固三四個星期才完成調整, 今次只係跌了一個星期就回升, 回吐時間未達標, 從時間上來看, 可能要2月下旬才挑戰雙頂

上周美股反艇係受遊戲驛站掀起的拆倉潮所拖累, 但拆倉潮已暫告一段落, 美股止跌回升, 資金炒業績, 去年2月初道指係反覆向上, 月中創月內高位, 然後再碌落山, 如果今年照跟, 月初好友會先推高大市尋頂, 然後月中就落山, 不過港股亦會受上証影響, 今次升浪內銀內險未能受惠, 大幅跑輸大市, 可能係受海航破產以及預期平保業績欠佳所拖累, 港股主力靠科企領軍, 當科企轉弱就要小心

大媽仍然繼續掃貨, 不過北水今日縮減, 北水由下周二(9/2)起暫停5天,要慎防大媽於未來幾日出貨或縮減湧港資金, 就會拖低港股

1月尾港股連跌4天, 當時老外大舉沽出A股, 拖低中港股市, 不過於1月尾最後一天(29/1)當上証插穿3450創1月新低時, 老外就開始趁低吸納, 跟住就日日掃入A股, 亦係港股踏入2月就日日升的主因, 換句話說, 當老外走貨, 就代表中港股市要回吐

~~~~~~~~~~~~~~~~~~~~~~~~~~~~~~~~

29000穿梭.好淡通殺

上周四(28/1)的下跌裂口29191~29194今日已全數回補, 20天線在29300附近, 阻力非輕, 今日亦得而復失, 29500係整數關口阻力位, 要中美股市都造好, 才能帶動港股突破阻力位, 否則夾硬沖上去亦站不穩

中港股市都係升市成交縮, 乾升, 全靠北水推高QQ及美團來挾淡, 2月係飛天遁地波動月, 1月尾嘔了二千點, 最少都要反彈跌幅的一半, 即係短線反彈目標係上去回補28/1的下跌裂口29191~29194, 今日亦已達標, 關鍵在回補裂口後的走勢

1月衝上30000係天時地利人和配合, 31/12收報28283收得低+1月開年基金掃貨+北水湧港大成交, 如今呢三個利好因素已消失, 所以未來幾日不應再上30000水平, 2月下旬能否再爆上去挑戰雙頂就要看北水

1月尾港股大幅調整, 基金經理普遍認為只係大牛市的回調浪, 只要北水流入勢頭不變, 今年恒指仍有望突破前頂30191, QQ亦會升穿前頂$767.5, 不過有基金經理表示早前爆上30000時走貨, 因為多隻科企已升抵目標價, 甚至係升過龍

港股風高浪急, 過夜就變天, 上周五陰霾滿佈, 今日卻是天朗氣清, 明日都唔知會開邊瓣, 每日恒指即市波幅閒閒地300~700點, 一棍抽升殺跌可以好得人驚, 轉勢係好容易, 好友淡友都要屎, 上周港股暴跌淡友冇止賺就屎得, 上周殺完好友, 本周就殺淡友, 牛熊不宜太貼價, 小心大鱷好淡通殺

最新回應

c6
c6 2021/04/20

今日究竟

升定係跌

大🐊🐊無益人

QQ都呆呆呆咗

c6
c6 2021/04/20

大元帥我❤️你

soho* 2021/04/20 12:51:25 回覆

雞煲, 睇韓劇學韓語, 我想知韓語 [柯篤茄] 係乜野意思, 你知唔知?

c6
c6 2021/04/20

大元帥日日夜夜

愛煲劇但都睇住大🐊🐊

遇到大元帥大🐊🐊無運行

c6
c6 2021/04/20
@soho*...

大元帥好

小門大師唔見咗

佢近日炒📈定📉

點都要見見人呀😊