焗炒未必贏 老實必定輸
2021/02/08 04:14:41 網誌分類: 經濟
美國刺激經濟方案取得進展，加上總統拜登表明願意與中國合作，令地緣政治風險減少，美股上周最後一個交易日向好，標普500指數和納斯達克指數連續兩日創紀錄新高，納指收報13856點，升78點；標指收報3886點，升15點；杜指收報31148點，升92點。
春節前炒濠賭股記得落車
春節臨近，加上最近收穫不錯，投資者部份已準備過節，周末氣氛比較熱鬧的股份都同過年有關。過去濠賭股會炒聖誕同農曆年黃金檔，今年聖誕檔炒味有限，今個大節就借住首批疫苗運抵澳門，濠賭股全線抽升。澳博（880）急揚8%，收報9.32元；銀娛（027）炒高6%，收報66.7元，為表現最佳藍籌股；永利（1128）及金沙（1928）齊升4%。
濠賭股現價不算特別平，而且中央不想民間資金過份流入博彩業意向日益明顯，有澳門朋友說，中央現在除了限制攜帶現金到澳門外，差不多明言不想博彩公司再投資在其他地方另起爐灶。在中央政策下，濠賭股估值未必能去番以前水平，所以炒完一輪後，最緊要記得落車。
另一個同過節有關的當炒股係手遊，由於估計放假大家會打機，手遊股表現標青，雲遊上周五（484）單日爆升22%；火岩（1909）收飆19%；心動（2400）破頂，收飆11%；大股網易（9999）收升2.3%。
不過如果講到熱點，始終離不開內地短片平台快手（1024），公司上周五在主板掛牌前，聽聞個別暗盤市場做了50億元交投，可見搶貨熱潮幾犀利，正式掛牌股價收報300元，較上市價115元，上升185元或160.9%，高低位曾見345元及300元，成交1.19億股，涉資375.47億元。以收市價計，一手100股帳面賺18500元。中環茶友不少係疊水之人，好多人用實資認購都中了一手，有人即日食胡收割，有人大把銀彈，決定睇多一陣。
茶友用實資抽股，旨在喺紅簿仔接近無息下搵番點使用，風險相對借孖展低好多。有茶友話，如果係借孖展，最失策係半桶水，因為借得不多有可能一股都無，咁就蝕手續費兼利益，借得多利息雖然要畀多啲，但扣除成本仍然穩賺。
散戶抽新股當派福利
經過快手一役，加上前後兩隻掛牌新股都有錢賺，估計未來不少散戶以至普羅市民，都會繼續抽新股的遊戲，周一又有隻生殖輔助公司蘇州貝康醫療（2170）掛牌，公司公佈H股招股結果，以上限定價27.36元，招股價範圍介乎26.36至27.36元，淨籌17億元，只係隻細股，超額認購402倍。由發售股份不多，一手中籤比率只有10%，申請200手才穩獲1手，回撥後變成散戶遊戲，所以有胡最好先食。
繼貝康醫療後，另一隻內地癌症早期篩查產品製造商諾輝健康（6606）亦正在招股，而且採用全電子化申請程序，發行7659.8萬股，招股價22.7至26.66元，集資17.39至20.42億元，每手500股入場費13464.33元，聽聞第一日孖展已經熱爆。茶友話，自從港交所放寬未賺錢藥業股上市後，這類公司排住隊上市，未來供應好多，對行外人來說，根本好難分好壞，總之大家見到爆額就入票，實行當派福利，直至有日遊戲玩完為止。
明知有泡沫央行不敢戳破
對於這種入票方式，茶友作為定位知識型投資者不太受落，因為擔心一次估計錯誤，以為好爆點知估錯，抽到成手都係就可能一鋪嘔突。不過他覺得散戶這個玩法無可厚非，正如最近點解會出現散戶夾爆沽空大戶的遊戲驛站事件呢？皆因八個字，生意淡薄，不如賭博。實體經濟差，央行瘋狂放水，平價資金四處炒作之餘，安份守己放錢銀行或買債券的小市民，根本無法保值，所以只能焗炒，最後形成資產泡沫，最好笑係資產泡沫形成，一旦爆破又會引來大衰退以至蕭條後果，屆時又逼央行出來放水撐住。央行明知有泡沫不敢戳破下，投機炒作或抽新股搏福利的人結果可能贏、可能輸，但老老實實不炒作的人，就注定成為輸家。
于品海李小加論壇公開過招
近年投身搞網的南海控股（680）主席于品海，上星期出席講座兼做主持講座，同場仲有港交所（388）前行政總裁李小加。于品海未知是甚少做主持，抑或係有心考考李小加，期間竟然話李小加做了多年港交所高層都不懂說廣東話，表現是不合格，又提起收購倫交所的「失敗」，但後來他又「補飛」話，肯嘗試都是一件好事。
面對于品海率直的主持作風，李小加仍然沉住氣發表高論，直至去到最尾時主持問金融業搞得興旺，但都係解決不到香港社會矛盾，李小加就反應好強烈咁話香港地方細，港人要有出息，一是自己出去闖，一是把生意請入來，搞金融是谷經濟，但不能解決全部的社會問題，實行大腳省番轉頭。
于品海久未在港露面，露面後就接連有消息見報，除了做主持外，旗下網媒隨即宣佈裁減40人，同時表明未來會集中做財經相關內容。
陸羽仁
回應 (0)
我要發表