六星連珠 ==> 六升連誅熊？

2021/02/08 22:35:28 網誌分類: 經濟

08 Feb

恒指由5/2起日日升, 已連升5天, 升埋下周二(初五)就係六星連珠 ==> 六升連誅熊

${#icono0_51}$ ${#icono0_51}$ ${#icono0_51}$ ${#icono0_51}$ ${#icono0_51}$ ${#icono0_51}$ ${#icono0_51}$ ${#icono0_51}$ ${#icono0_51}$ ${#icono0_51}$ ${#icono0_51}$ ${#icono0_51}$ ${#icono0_51}$ ${#icono0_51}$ ${#icono0_51}$ ${#icono0_51}$ ${#icono0_51}$ ${#icono0_51}$

soho* 2021/02/14 20:49:51

大牛市

我已多次說大牛市不宜造淡, 亦說如果想避險, 買阿爺最穩陣, 阿爺好, 港股好, 亦說道指及恒指差距效應下, 道指會扯住港股上山, 但原來你地一個二個走去造淡, 就算擔心天象問題, 又或者擔心大市受制於前頂(2019年頂 30280/2017年頂 30199), 亦只能有戒心, 而不是逆勢造淡, 趁回吐買上好過造淡

我亦一直提醒大家重溫元帥看好的理據, 亦曾說大牛市淡友只能贏一兩鋪, 不過要輸七八鋪, 未有見頂訊號前淡友風險大過好友

殺淡連升消耗上升日數燒煙花的說法冇錯, 但中港美三地股市都未有見頂跡象, 正在尋頂階段就不應急不及待去逆勢造淡, 對於大鱷來說, 升五百一千係易如反掌, 大鱷壓住升勢來引淡友入局

二月初港股上升氣勢不及一月, 這方面我都睇到, 但過去幾日已起了變化, 多隻科企觸底回升, 而唔少地產及內銀內險等舊經濟股亦已成功築底, 正在穩步上揚, 有助推動港股挑戰31000/12000水平

大鱷以橫行代替深度調整, 震走了蟹貨, 加上挾淡的威力能逼淡友回補空倉, 一掃貨就會增強上升氣勢, 散戶見大市跌唔落或破位而上, 就會入市追貨,

牛熊比例已經失衡, 牛多熊少係大牛市的正常現象,

本來市場只係憧憬中美關係好轉, 但拜登打電話俾習大大拜早年, 令市場更加覺得應炒上

soho* 2021/02/14 14:44:57

周波幅+月波幅+時間窗口

我計算港股的方法十分簡單, 恒指周波幅+月波幅+時間窗口, 以閒閒地千點周波幅計, 只要後市守住29800/29500的話, 30500必破, 如果周初已上到30500, 以頂部上移的慣性走勢來看, 周三四五就會再創新高, 跟住2月尾推高結算, 一路推算下去, 以波幅計, 4月前就會突破31000

美股: 歷史統計未有納入新的利好因素, 例如去年美國推出歷史上最巨量的救市措施, 又例如踢走賤侵, 換入拜登, 民主黨獨攬大權有助施政, 新人士新氣象, 提振了全球投資氣氛, 又例如拜登派錢, 經濟不景下, 鬼佬拎住粒糖走去炒股, 美股大牛市散戶賺到笑, 3月再會有糖落到股民手上, 股市有水則生, 大鱷總有方法引股民入市接火棒

港股方面, 歷史統計的科技股沒有如今那麼熱鬧, 阿里巴巴.快手.美團.農夫山泉.京東.明源雲.網易.醫渡等一眾爆炒股份亦比以前火熱, 加上北水大媽過去一年大手增持港股, 目的係爭取港股的話語權, 而內地股民開戶口炒港股的熱潮亦比以往熱烈, 阿爺批准養老金入市消息係火上加油, 如果用歷史數據來推算現今港股的走勢, 會有誤差,

內地股市亦爆炒, 上証重上3600水平, 表叔大媽不能去外國旅遊, 就益左內地消費行業, 消費ETF不足兩個星期就上升了17%

兩個月前我曾問大家美國是否容許企業回購股份, 當時冇人回應, 反映大家(淡友)忽略了這個利好因素, 美企公布業績前係股東禁止買賣期, 當公布業績後, 企業回購股份, 不問價掃貨, 就係火上加油, 亦係美股今個月愈升愈有的其中一個原因

一直說去年2月美股於月中創高位後回落, 但當時係被突發的新冠疫情拖累, 今年唔跟去年落山都得, 又或者一插即彈, 因為水浸市場, 低位承接力強

淡友想港股插就要等美股見頂或出現強烈利淡因素, 因為道指和恒指有特定差距

soho* 2021/02/15 09:17:42

試兄用去年二三四季恒指波幅來推算亦有道理, 但為何忽視第一季的波幅呢? 首季度係業績期, 亦係基金重組倉位的時期, 極具參考價值

10~12月: 23674-27340=3666

7~9月: 23124-26782=3658

4~6月: 22519-25303=2784

1~3月: 29174-21139=8035

//係都要跟元帥唱反調, 一季度通常最多玩4000點//

==> 如果睇埋去年第一季恒指波幅, 就係另一回事,

~~~~~~~~~~~~~~~~~~~~~~~~~~~~

再睇埋油價, 去年4月油價大幅波動, 跌到阿媽都唔認得, 當時主要在20美元穿梭, 亦曾於20/1收負37.63美元, 其後反覆上升卻不斷受制於45美元, 到12月出現大突破, 上企45美元反覆向上, 近日已經殺到去60美元大關

油價與美股(油企股價大升)及經濟息息相關, 如今油價高企, 升到去60美元關口, 美股亦屢創歷史新高, 所以如果用今年恒指與去年恒指作出比較大有問題

金價低迷, 恐慌指數走低, 油價及比特幣高企, 股市大漲小回, 在在反映市場風險胃納上升, 受水浸市場推動, 炒風熾熱,

~~~~~~~~~~~~~~~~~~~~~~~~~~~~

睇完去年就轉台, 睇下今年恒指周線:

今年玩左6個星期, 請留意每周的升幅

08/1 升647點

15/1 升696點

22/1 升874點

29/1 跌1164點

05/2 升1005點(抵消了上周的跌幅)

11/2 升885點

睇完上述統計數據, 不難發現, 除了29/1及5/2兩周外, 其餘幾個星期恒指每周平均升近800點, 可用來推算恒指後市

究竟係先挑戰31000, 抑或先插穿29800 震(殺)好友牛牛後再上呢? 2月由好友主導大市, 斷估先殺上去機會較大, 不過牛熊分布失衡情況實在太嚴重 (10096張牛vs 2588張熊), 唔知大鱷點搞

當2月下旬創高位殺淡後，有可能掉頭殺好友，以及回補上升裂口，但要有黑天鵝做催化劑才能成事

其中一個下跌誘因或會是中美股市見短頂回落，又或者係美國債息急升(影響資金流)，當10年期債息升至1.5％就要提高警覺，目前已經升到去1.2％關口，過去一個月主要在1％浮沉

美股於高位一直有回吐壓力，但好友當道，往往係即市完成調整，尾市踢高收，可能係因為19/2美期結算

soho* 2021/02/14 18:22:14

美國特斯拉Tesla/比特幣

日前美國電動車大廠特斯拉Tesla表示已買入價值15億美元虛擬貨幣比特幣(Bitcoin), 並打算接受以比特幣作為買車付款, 先不說特斯拉的投資策略, 但特斯拉掃入比特幣就令市場認為特斯拉不想持有大量美元現金, 美企想降低倚賴美元的風險, 特斯拉接受用比特幣來支付, 大大提升了比特幣的地位, 亦有助其他企業採用比特幣

比特幣周五剛升至紀錄新高的4.8925萬美元, 加拿大基金公司 Purpose已獲批准推出比特幣場內交易基金(ETF), 成為全球首隻比特幣ETF, 令散戶也可參與比特幣炒作熱潮

愈來愈多投資者開始相信比特幣是貨真價實的資產, 現時美國約有三千萬人持有比特幣, 愈來愈火熱, 係比特幣屢創新高的原因之一

明眼人都知道美元的世界貨幣地位正在被動搖, 中國經濟表現亮麗, 人民幣抬頭, 美國債務纏身, 經濟復蘇緩慢, 街上十室九空, 百業蕭條, 美國人撕裂情況嚴重, 侵侵下台後繼續搞分裂, 歐美面和心不和, 除了五眼聯盟, 各國都不恥美元霸權, 因而預先作出避險, 買入美元以外的資產, 吸納比特幣, 掃入A股及新興市場股票,

美元弱, 每次反彈都走不遠, 弱美元造就了強人民幣, 過去一周人仔就創出了32個月新高, 亦係中港股市走高的主因

soho* 2021/02/15 09:47:45

新冠疫苗:

歐美政客打壓(抗拒)中國及俄羅斯疫苗, 但英美疫苗又唔爭氣, 不但死亡率高及副作用大, 而且疫苗生產進度緩慢, 供不應求, 市場亦質疑英美疫苗的效用, 南非已停止接種阿斯利康牛津疫苗, 唔怕貨比貨, 最怕唔識貨, 愈來愈多國家訂購中國及俄羅斯疫苗, 此舉有助降低疫情擴散, 經濟復蘇靠英美就死得, 梗係要中國幫手

元帥老早已說英美疫苗係博大霧緊急推出, 目的係搶佔疫苗的市場佔有率, 亦係為了面子, 明明係中國及俄羅斯疫苗首先研發成功, 但美國不肯批出認證, 夾硬緊急批出輝瑞等多家由英美研發的疫苗, 其實測試不夠全面, 疫苗亦出現很多問題, 但我估英美政客認為就算二百萬人接種, 當中有一萬人出事都應推出, 誓要打尖扒頭, 英美疫苗一定要快過中國及俄羅斯疫苗飲頭啖湯, 最吊詭的是, 輝瑞宣布疫苗當天, 趁股價爆升創52周高位, 其首席執行官拿拿臨沽售62%持股, 自己亦唔接種輝瑞疫苗, 此舉係唔係好得人驚呢?

經過兩個多月接種疫苗, 現形了, 英美 vs 中國及俄羅斯疫苗高下立見, 當日後有數百萬人接種了中國及俄羅斯疫苗, 孰優孰劣就會得到進一步確認

雖然英美疫苗有不足之處, 但從去年8/12以來全英國已有逾1300萬人接種了第一劑疫苗, 廣泛接種後的確紓緩了歐美疫情, 英美新增確診比上周下降, 美國失業率已由去年疫情高點14.8%回落至6.3%, 市場愈來愈相信最壞情況已過去,

英美政客草菅人命, 近50萬美國人歸西, 美國有2800萬人確診, 民選總統啊! 蠢到選件謀殺犯出來, 如果係侵粉, 染病枉死不要埋怨, 就問下自己是否盲了, 亂投票

soho* 2021/02/14 22:28:49

股民的心態:

就以QQ為例, 早前QQ在$650附近, 就有分析說#700 QQ會見 $700, 當時人人都覺得有趣, 亦以$700為目標價, 其後升到去$700關口有唔少人止賺獲利, 跟住呢? 呢班人眼光光睇住QQ升穿$700後一支箭飆上$750, 跟住繼續反覆上升, 大行拿拿臨上調目標價到$850樓上, 股民呢? 只好在$750樓上追貨, 淡友回補空倉, 進一步推高股價,

曾聽分析師說QQ投資層面非常廣泛, 平均每日都有收購活動, 基金經理全面看好QQ業務前景, 亦係QQ股價往往一跌即彈, 愈升愈有的原因之一, 看淡港股就要先分析QQ的走勢, QQ未見頂, 港股亦未見頂, 就算QQ腳軟, 其他成份股亦會接力推升

早前中港美三地股市交投雖然縮減, 但只要大鱷大媽繼續推升, 就會有股民跟風追入, 加上逼淡友回補空倉, 到時成交就會增加

=============================

soho* 2021/02/12 22:09:05

大家不妨搵幾隻舊經濟股, 睇下佢地既走勢, 已成功築底, 穩步上揚, 看來大鱷已經係低位收夠貨, 準備推升

我曾經講過, 大牛市造淡十鋪只得一兩鋪勝出, 但卻有七八鋪輸到嘔, 既然贏面低, 不如順勢做好友

soho* 2021/02/12 20:28:47

如果2月似1月的走勢，就會係先扯到盡殺淡友(升市日數過多)，當淡友熊熊屎得七七八八，月尾大鱷就變臉殺好友(補回下跌日數) ，如果轉勢向下，由高位嘔千點都唔奇, 不過水浸市場, 落去清場殺好友牛牛又會再升過, 大牛市不會這麼快就玩完, 無論點震, 都係要向上走

soho* 2021/02/12 21:03:37

去年恆指一般月波幅有1700~2900點,

估計2月頂部會在:

28382(1/2低位)+1700~2900月波幅=30000~31300

11/2高見30184, 開始步入達標範圍，以大鱷的一貫風格，今次升浪會係趕盡殺絕，所以想造淡或減倉的話，可等上到目標上方就出手, 不過只能做超短炒, 當2月見短頂後作出調整, 造淡有得食就要快閃, 因為水浸市場, 落去殺完好友牛牛就會重拾升軌, 大牛市基金界普遍看好後市, 會趁低吸納, 所以無論點震, 之後都會反覆向上

港股技術指標向好, 加上大媽癲咖! 中美股市牛氣沖天, 我寧願趁回吐買上, 都唔想做淡友, 當我看淡就沽貨游水博低位補回

點解元帥時常提及基金經理的看法? 因為佢地資金雄厚, 負責操盤, 佢地看好看淡就係股市的風向標, 散戶跟住基金經理來操作就可以了

soho* 2021/02/12 20:42:18

科技股

其實利淡股市的理據當然有，所以我都執倉，持貨傾向買阿爺，穩陣減低風險，亦可保增長

我仍然覺得科技股已升至不合理水平，只係水浸市場才能推到上天價，泡沫早晚會爆破，不過時辰未到，因為B站、百度陸續來港第二上市，熱潮仍在，所以大市一回就見買盤掃貨, 登登及耶媽一上場就開大水喉, 係火上加油, 全球股市牛氣沖天

京東.快手.B站.百度陸續來港上市其中一個好處係新經濟股愈來愈多, 分攤拉勻了反而好過集中幾隻炒到出外太空