2月尾港股飛天遁地

港股風高浪急, 好淡通殺, 底頂下移續尋底

24/2 周三恒指收29718, 暴跌914點, 失守10及20天線

南柯一夢~港股點升上來就點落番去

今日低見29532/11404後略為收窄跌幅收報29718及11509, 按照慣性走勢, 第一次下試整數關口29500/11500理應會有死貓彈, 由於明日期指結算, 好友點都要撐埋, 大鱷蓄意謀殺, 午後夾硬插多一棍瀉1100點低見29532才拗腰上, 無論指數抑或個股牛全面陣亡, 好友歸西明日就彈得, 等養肥牛牛再插過, 明日券商發行29600貼價BB牛

昨晚美股低開插水下試31150/13000/3800水平後拗腰走高收陽燭, 今日美期亦造好, 今晚美股彈高居多, 就算有加印花稅利淡消息, 港股亦不應一棍插1100點這麼多, 可能債息高企才是真正跌市原因, 加稅只係大鱷殺跌的藉口, 港股技術指標已明顯轉弱, 插千點, 成交創歷史新高, 超大成交暴跌走鬼, 連大媽都散水, 港股通(滬深)凈流出近二百億元, 看來明日結算反彈完就要繼續尋底, 港股風高浪急, 大鱷玩緊好淡通殺

一月份美國十年期債息處於1%附近的低水平, 全球股市熱炒, 全民皆股, 但如今債息已經去上到1.5%附近的一年高位, 美元插穿90水平後拗腰向上, 資金流有變, 全民皆艇, 北水一月份湧港已成歷史, 大媽變臉, 沽貨撤退, 連老外都沽A股散水, 淡友借勢作出大反擊,

~~~~~~~~~~~~~~~~~~~~~~~~~~~~~~~~~~~

QQ未見底.港股亦未見底

港股呈底頂下移尋底格, 反彈阻力在10天線30367, 估計周五會收30644之下, 本周收跌收陰, 29527~29532裂口未回補是後患, 見頂回落閒閒地插二千點, 大方向要下試29000水平, 恒指50天線有一股拉力扯緊恒指落山, 3月份會繼續尋底, 如有進一步利淡消息, 就會下試2月低位28382

QQ技術指標弱雞, QQ未見底, 港股亦未見底, 今日大媽狂沽港股, 最大鑊係走QQ, 如明日續沽, 就會拖低港股, 美國債息升勢持續, 10年期債息曾高見1.435%, 債息高企不利新經濟股, 如債息續升, 股市就會反艇, 過去幾日新經濟科企暴跌, 已令市場對高市盈率的科企有戒心, 港股生態已改變, 早前威威的新經濟股風光不再, 輪到舊經濟股抬頭, 資金泊入避險

今日港股暴跌, 通常插穿大位都會彈上去吻別大位, 不會一去冇回頭, 2月高低位在28382~31183, 恒指周波幅及月波幅已超標, 今個月冇必要插穿今個月低位28382落地獄, 彈番上去既可吸引買盤進場, 亦可引牛牛入局, 不過明日彈完就要小心後日(周五)會有大龍鳳, 由於3月份有多隻成份股除息, 明日結算後期指就會呈低水

以往恒指即市波幅通常係三五百點, 但農曆年假期後恒指即市波幅竟然高達610~820點, 大撼大, 今日更高達1260點波幅, 炒貼價好倉淡倉好易俾大鱷玩死, 大鱷操控大市如入無人之境, 急升急跌是常態, 近來港股日升日跌, 溫水煮蛙式派貨, 大跌小彈, 今日收跌, 明日輪到升, 有基金經理持倉已將今年盈利全數蒸發, 皆因重倉新經濟股跌幅特別大, 走避不及, 如有反彈, 估計都會乘機走貨

~~~~~~~~~~~~~~~~~~~~~~~~~~~~~~~~~~~

美債息急升利淡股市

今日港股大插係淡友借加稅消息隊到破位, 觸發斬倉止蝕盤, 令跌勢加劇, 其實跌市主因係債息升, 加三成印花稅對大鱷大戶來說根本唔係大問題, 小散戶影響亦不大, 不過對高頻智能交易就會有負面影響, 利淡港交所, 大行調低港交所目標價

道指與恒指差距由昨日的889點擴大至今日(周三)1819點, 連上証都連跌3天, 有望作出反彈, 科指連跌5天, 超賣, 亦係時候彈高, 今日舊經濟股跌幅唔算大, 跑贏大市, 可能有資金泊入落後股及高息股,

上周曾說炒復蘇概念舊經濟股見資金流入, 升得好實凈, 今日跌幅不大足以証實元帥的看法, 皆因債息高企, 加上科企市盈率過高, 所以基金經理上周重組倉位, 減持新經濟股, 增持舊經濟股, 這就可解釋為何科指連跌5天, 其實連美股都出現同一現象, 道指屢創新高, 但納指卻反艇, 不過呢種情況難以持久, 當撤資潮湧現, 連舊經濟股都不能倖免

聯儲局主席周二(23/2)將會出席參議院銀行委員會的聽證會, 周三(24/2)出席眾議院金融服務委員會的聽證會, 其言論或會影響匯債表現, 從而令股市大幅波動

只要今晚聯儲局撐市, 美股上升, 有利港股借勢作出反彈, 因為如果再插就會令道指與恒指差距進一步擴大, 如果跟慣性走勢, 明日不應插水, 今日港股急瀉主因係大媽走鬼, 只要大媽唔沽或者沽少左, 就可穩住港股, 明日期指結算, 好友亦會出手推高結算價, 畢竟今個月都係由好友主導大市, 只要逼到淡友回補空倉, 港股就可作出反彈, 不過結算後就要小心, 日升日跌模式, 如明日升, 周五就輪到跌, 周五是黑期結算/基金月結/MSCI調動

近日恒指高開就低收, 但明日期結, 未必跟高開後倒跌的慣性走勢, 不過好友未必會撐足全日, 尾市結算價塵埃落定, 或會有異動

1月份港股爆升主因係2021開年基金入貨重組倉位, 內地公募基金掃港股, 當時港股在27231/10738的筍價水平, 如今這些利好因素已消失, 呢一浸升浪已結束, 2月恒指月波幅已達標, 睇盤路大鱷大媽正在臨危托沽

吻別大位, 死貓彈完再尋底

25/2 周四恒指收30074, 升356點, 收復20天線

今日彈上去結算及吻別大位任務已完成, 好友逃生門已關上, 美債息急升, 小心明日股市插水, 近日恒指即市波幅高達600~1300點, 29500附近有裂口未回補是後患, 近來恒指波幅極大, 飛天遁地, 按照慣性走勢, 今日大升, 明日大跌, 點升上來就點落番去, 好友撐埋結算, 尾市已縮手, 連大媽都沽貨撤退, 明日冇人撐港股, 死得,

昨晚美股一如所料大反彈, 但美國科企卻逆市下跌, 代表科企未見底, 道指高見32009, 收31961, 大升424點, 受制於32000整數大位, 測市指標出現利淡訊號, 港股衝高回落收陰燭, 走勢差劣, 技術指標利淡, 科企弱勢持續, 會拖低港股, 3月除息股亦會拖低期指, 拉住港股落山, 30000水平危危乎, 本來預測3月會變天, 看來等唔切, 昨日淡友大鱷已出手,

牛熊分布係牛多熊少利下殺, 大鱷終於撐到貼價BB牛今日出世, 29600水平向下每百點都有傻牛, 29000~29650有肥牛1994張待屠, 28500~29000有1839張, 大鱷玩跌下彈下引好友入局, 近日新經濟股牛傷亡慘重,

目前水平處於上周五收市位30644之下, 睇盤路本周恒指收跌機會極大, 如跟1月尾收跌的幅度, 周五收市位就會大幅收低過30644, 周線不會跌少少, 會深潛, 如淡友大反擊推低結算價, 結算前好難守得住30000, 快手農夫山泉等多隻股份將會於納入MSCI, 其他權重股要減比重讓路, 會構成沽壓, 拖低大市,

近日港股日升日跌扮跌唔落, 表面上係好淡爭持, 但其實係升幅細.跌幅大, 淡友已奪回主導權, 只係好友夾硬撐埋結算, 星期三四五係創周低位的時間窗口, 明日會有大龍鳳, 按照慣性走勢, 尋頂期間每次回吐都會守得住支持位, 但當大市確認見頂, 就會插穿支持位, 斬倉止蝕盤會令大市破位而下, 近日唔少熱炒股的莊家正在撤退, 後市不妙

~~~~~~~~~~~~~~~~~~~~~~~~~~~~~~~~~~~

底頂下移續尋底

上周已指出中港股市已於18/2見頂, 美股亦在聚頂, 納指及標普已同步於16/2見頂, 只係道指力撐, 拖到昨晚創新高見32009才掉頭, 其實去年港股都係第一季見頂回落, 昨日低見29532/11404不會是大底, 因為見頂回落不會跌一個星期這麼快就收工,

股份表現具啟示作用, 上周已說市場一直熱炒的車股已轉勢向下, 基金重倉的美車股德師奶於800美元樓上撐左10日終於失守, 於農曆年假期後德師奶泡沫爆破, 一路碌落山, 代表股市資金流已變味, 大鱷正在沽貨撤退, 當時納指及標普同步連升斷纜已露端倪

1月以來的升浪遺留太多上升裂口是後患，今個月已出現3個上升裂口, 最近的裂口在30184~30497(已回補), 再落就係29527~29732(正在回補), 28982~29198, 早晚要回補, 回顧1月份港股首三周飛天, 但淡友最後都成功反擊, 月尾隊港股落山, 令港股1月份收窄升幅, 今個月正在歷史重演, 月尾大插插, 近日急跌急彈係引好友入局及派貨