15~17/3 28600~29600困局待變

困局待變~29000上下500點穿梭, 好淡通殺

上周二(9/3)低見28326, 本周一(15/3)低見28612, 守得住前底28326冇創新低, 兩腳站穩, 就能加強投資者入市信心, 後市有望升穿本周高位29550來擴大周波幅, 到打回頭再尋底, 做第三隻腳

上証於9/3創低位3328, 當天港股低見28326/10861, 只要上証不破底, 港股就不應深潛, 道指強勢日日飛天, 會削弱港股下跌動力, 因為道指及恒指有特定差距, 道指不斷上升, 恒指就不會破底, 當道指見頂回落, 港股就危

回顧1月中北水大舉湧港掃貨, 就係由28800水平一大棍抽高千點上29800, 所以大鱷大媽亦有誘因咬住29000來派貨, 今個月好友一直守住28400~28600, 往往係一插即彈,溫水煮蛙式派貨

由18/2見頂回落起, 閒閒地都要調整一個月來消化沽壓, 17/3剛好一個月, 回吐時間已足夠, 當出現利好消息就會爆上, 如果跟早前所寫的3月劇本, 震埋呢幾日就要拗腰殺上去, 熊熊不斷下移, 亦有誘因上攻, 不過當上証.QQ及科企反彈見頂回落, 港股就要再落山

自從18/2港股見頂回落以來, 一頂低於一頂, 要本周守得住28326不破, 才能打破每周底部下移的利淡形態, 好友防線在28400~28600

過去幾周恒指高低位(底頂下移):

2月中: 30099~31183
2月尾: 28980~31071
3月第一周: 28513~29912
3月第二周: 28326~29550

3月第三周: 困局待變, 只要守得住上周低位就有望突破29550

~~~~~~~~~~~~~~~~~~~~~~~~~~~~~~~~~~~~

03/3高見29912掉頭回落, 09/3低見28326, 累計下跌1586點

09/3低見28326掉頭向上, 12/3高見29550, 累計反彈1224點

12/3高見29550掉頭回落, 15/3低見28612, 累計下跌938點

15/3低見28612掉頭向上, 18/3高見29XXX, 如跟上述幅度, 反彈1000~1200點可見29600~29800, 3月上旬高位在29912

15/3 周二恆指 28833, 升94點

成也QQ.敗也QQ

港股衝高見29179回落低見28612, 大鱷打穿28700吃了一口牛牛, 今日熊熊出世, 大幅下移至29200水平(躲在29200~29400阻力區), 牛牛上移至28600水平, 上落都有得開餐

假如跟劇本今個星期係轉角市, 做多隻腳就會再上, 要看能否守住28400~28600, 最好升穿今日高位29179, 向29550進發, 上証低開低收, 一跌到尾, 走勢差劣, 收3419, 大跌33點, 仍受制於3450水平, 要上証守住3400, 才能穩住港股, 如插穿, 就會推港股落山

美國十年期債息回落, 利好科企, 今日QQ收$628, 為100天線所在, 要QQ重上$630, 守住今日低位$621, 才能穩住大局, 如QQ破底, 港股就危, 要QQ及上証止跌回升, 好友才有藉口反擊, 近來見資金流入內銀內房股, 有舊經濟股撐市, 所以港股跌唔落

新舊經濟股接力撐市, 大鱷大媽玩托沽, 好友守住28400~28600, 往往係一插即彈, 今日低見28612就急彈重上28800, 加上收市U盤踢高, 代表明日會再上29000, 試完底就會再沖頂, 大鱷推港股落山吃了一口牛牛, 如果落山是為了做第二隻腳, 好友健在的話, 大鱷食1~2口牛就要再沖頂, 即係會挑戰29179/29550

今日道指和恒指相差3945點了, 兩者不應相差超過4000點, 恒指係跌過龍, 會有反彈

16/3 周二恒指收29027, 升194點, 連升2天

今日港股成交及波幅急降, 乾升, 係大龍鳳先兆, 恒指連升2天, 近來最長係三連升, 代表明日沽壓會加劇, QQ仍處下行階段, 底頂下移, 要等QQ出院, 港股才有力再上, 國指走勢較佳, 可能係因為上証反彈, 美債息高企不下, 科企雖然已見底, 但仍見壓力, 今日多隻舊經濟股都逆市下跌, 可能係市場預期今晚美股會回吐, 道指七連升, 累計升約2000點, 超買, 獲利沽壓大增, 醒目資金偷步沽出舊經濟股

上周初上証急挫, 大媽密密沽貨走佬, 班資返祖國救亡, 不過由11/3(上周四)起上証反彈, 大媽就開始密密掃港股, 不過流入金額縮水, 似係推高派貨, 全靠大媽幫手, 港股技術指標略為改善

今個星期港股要落山做第二隻腳, 如果周一低位28612係第二隻腳, 就要上破周一高位29179, 不進則退, 本周高低位28612~29179, 好友大鱷想守住28612的話, 就要殺上去來擴大周波幅

VHSI恒指恐慌指數連跌兩天, 符合本周震多一棍就掉頭向上的劇本, 如果昨日低位28612係第二隻腳, 港股走勢會好轉, 沽壓會減輕, 今日科企似乎有淡友補空倉盤, 下午港股震多一震, 恒指低見28886, 好友成功守得住早市低位28872

熊熊大幅下移至屠殺範圍, 29100附近的貼價熊已陸續出世, 以大鱷的習性, 當全城看淡造淡, 就會失驚無神抽升挾淡, 扭轉劣勢來逼死淡友

要突破下列阻力位並站穩3天, 大市才回穩

~~~~~~~~~~~~~~~~~~~~~~~~~~~~~

上証今日高見3448, 未上破昨日高位3457

阻力 3450.3457

~~~~~~~~~~~~~~~~~~~~~~~~~~~~~

恒指今日高見29118, 未上破昨日高位29179(上周高位29550)

阻力29200~29550(20.30.50天線)

~~~~~~~~~~~~~~~~~~~~~~~~~~~~~

國指今日高見11386, 已上破昨日高位11344(上周高位11475)

阻力11450~11550(20.30.50天線)

17/3 周三恒指收29034, 升6點, 連升3天, 部署屠熊

今日恒指波幅及成交超細, 預示明天會有大龍鳳, 當全城看淡造淡, 大鱷就會失驚無神抽升挾淡, 逼淡友回補空倉來推高大市

恒指上企29000已有兩天, 已收復10天線, 昨日冇開餐, 今日上攻只係殺了幾張熊仔, 落去就殺了幾十張牛牛, 大鱷好淡通殺, 貼價牛陣亡, 貼價有熊熊, 上証守得住3400, 不斷挑戰3450, 國指走強, 有誘因借勢踢上去殺淡友熊熊,

大鱷大媽仍然想咬住29000來派貨, 國指力守11200, 走勢勝恒指, 國指強, 港股好, 國指技術指標好轉, 3月上旬國指跌市日數太多, 所以3月下旬國指補漲

周三四五係創周高低位的時間窗口, 今早港股創本周高位見29180(周一高位29179), 符合昨日所說港股技術指標改善的看法, 好友力撐大市, 淡友想殺跌就要等突發負面消息, 目前牌面利好友, 未來兩日要上破29180來擴大周波幅, 只要殺上去做夠波幅就唔使破底, 不進則退, 如受阻而回, 就要再試底28612

大媽掃入港股, 但老外大舉沽出A股, 內銀內險油企A股全面反艇, 但上証跌幅不大, 未知是否因為本周五內地股市期結

今日QQ低見$622(過去兩日低位$625及$621), QQ似在築底, 如失敗就會拖低港股, 如能築底成功, 掉頭向上, 突破近日阻力位$630及$640, 港股就有運行, QQ入左急症室, 但港股仍能上企10天線, 大鱷就係想QQ好友死心, 淡友入局, 當QQ出院, 港股會點走呢? 早前大媽大舉沽出QQ, 但近日開始細細注買QQ, 係好現象,

1月北水湧港時狂掃QQ, 但時移世易, 北水密密沽貨套現, 炒QQ的莊家已撤退, 蟹貨愈來愈多, 會削弱反彈動力, QQ問題在大媽推高出貨, 所以往往彈上去高位都企唔穩

今日港股近平收, 股民普遍看淡, 但其實唔少股份表現都唔錯, 整體上升股份多過下跌股, 只係QQ及內險壓住大市, 本周恒指日日都插穿29000, 但VHSI恒指恐慌指數卻連跌3天, 累計下跌約11%, 港股日日地震都唔驚即係本周由好倉主導大市

~~~~~~~~~~~~~~~~~~~~~~~~~~~~~~

美國債息陰霾利淡股市

美國債息在1.6%穿梭, 高企不下, 每當債息急升, 股市就反艇, 港股好友能否推番大市上29500除了要看上証表現之外, 亦要睇債息, 人民幣及港匯走弱, 熱錢正在流走, 加上IPO亦抽走市場資金, 導致港股乾升

3月未開局已經預測會係好淡通殺, 風高浪急, 全民皆艇, 因為3月交易日數太多，大鱷唔想炒單邊，太易估方向的話，大鱷炒上就會輸畀好友，炒落就會輸畀淡友, 所以玩跌下彈下, 近來都係2~3日貨仔就轉向, 好淡通殺,

根據過去20年的記錄顯示, 3月恒指收跌機會率有65%, 年初造好, 3月獲利沽壓大, 收跌係正路, 就算收升亦不會大漲, 不過有期權分析師指出3月好倉佔78%, 看來好友淡友勝負仍未分,

美股雖然屢創新高, 但卻是乾升，技術指標開始跟唔上，本周美股四權結算，美股好友大勝, 淡友或會反擊，所以港股都會立立亂, 牛熊分佈仍然係牛多熊少, 牛熊愈來愈貼價, 後市可能會係上攻下殺

恒指已連升5個月，累積龐大升幅, 3月獲利沽壓大增, 再彈上去就會惹來更大沽壓, 1月北水湧港推高大市皆因有公募基金入市, 但風光不再, 2~3月要獲利撤退, 聽聞內地公募基金出現贖回潮, 怪不得港股往往彈散

3月基金季結要鎖定利潤，上月已有基金經理說盈利大縮水，甚至有說已入肉，一二月基金多數重倉科企新經濟股係死因, 所以近來港股一彈上去就見沽壓, 可能係基金經理走貨止賺/止蝕及減倉避險, 換入估值吸引及炒復蘇的舊經濟股, 普遍基金經理都認為中港美股市調整未完

近來港股即市波幅收窄, 亦有可能係因為最大浸的科企洗倉潮已暫緩, 正因如此, 港股成交縮減, 大鱷操控大市比月初更容易, 對於大鱷來說, 抽升殺跌幾百點係易如反掌, 未郁手係因為大鱷要畫圖, 每日每周高低位都要跟劇本