19~22/3 結束連升.展開尋底之旅

2021/03/19 21:29:12 網誌分類: 經濟
19 Mar

恒指結束四連升, 失守多條主要平均線, 連升斷纜利淡

19/3 周五恒指收28990, 大跌414點, 結束四連升

本周恒指連升4日未跌過, 按照慣性走勢今日應收跌, 果然要嘔, 不過低見28737秒殺肥牛529張即彈, 回顧過去幾日四度插穿28800都反彈, 扮跌唔落才能溫水煮蛙式派貨, 以及引好友入局, 牛牛愈養愈肥, 極具吸引力, 靜極思動, 拖到月尾, 好淡大鱷點都要分勝負, 過去兩個月都係月尾例瀉

以往港股都試過, 一直在一二千點內窄幅上落, 當人人都以為大牛市跌唔落, 繼續買上, 就會失驚無神大插插, 股民走避不及, 全艇, 大市再插, 斬倉, 股民的血汗錢就不斷被蠶食

牛熊分布係牛多熊少, 下殺危機未除, 下周係業績高峰期, 快手.吉利.恒地.閱文.藥明生物.眾安在線.QQ.中移.安踏.美圖.美團業績對港股升跌舉足輕重, 小心見光死, 要有兩手準備

根據過去20年的記錄顯示3月的升跌比例係7升13跌, 3月恒指收跌機會率有65%, 年初1~2月造好, 3月獲利沽壓大, 收跌係正路, 就算收升亦不會大漲, 我一直唔信3月會收升, 因為港股冇左大媽及基金掃貨條大水喉, 彈散容易彈高難, 一直扮跌唔落係臨危托沽

今日港股插水, 走勢差劣, 恒指失守10.20及50天線, 而國指則失守20及60天線, 周線方面, 今日收28739/11173之上, 恒指及國指扭轉上周跌勢, 本周轉收升, 而科指亦結束三周跌勢, 作出反彈, 托沽味甚濃, 上証連跌四周, 今日阿爺入左急症室, 上証急挫58點收3404, 除了因為老外大舉沽貨走鬼外, 可能係因為今日股指期貨結算,

今次上証連跌四周, 是10個月以來首度出現這麼長的跌浪, 上証怎麼可能像去年新冠疫情大爆發時那麼差! 真奇怪! 中國經濟明顯勝外國咖! 原來係因為阿爺收水, 銀行 call loan, 基金贖回潮, 導致中港股市出現拋售潮, 大媽沽貨撤退

~~~~~~~~~~~~~~~~~~~~~~~~~~~~~~~

衝頂打回頭再試底

近來恒指在29000穿梭, 跌下彈下, 周線係梅花間竹, 一周升一周跌, 港股本周收升, 下周就輪到收跌, 如果跟1及2月尾的走勢, 月尾就會插水, 梁燈神大聲唱好, 表示港股易升難跌, 代表港股死期將至

本周港股升穿上周高位, 冇跌穿上周低位, 即係上周見短底, 本周拗腰上, 全周計收升, 真係跟劇本走, 如果跟足全個月的劇本, 就係下周再上攻, 不過會打回頭, 然後就會潛行凶間, 因為月尾例插

上周五港股收28739/11173, 午後插水低見28737/11171, 跌突左2點, 好友即刻踢番大市上去, 科指力守8400水平(低見8387, 收8551), 但本周科指未能突破上周高位, 仍處弱勢, 會拉住港股落山, 28800及28500都係成交密集區, 所以每次插到呢個水平即彈, 如再次失守, 蟹民就會愈來愈多, 削弱後市反彈動力

以恒指閒閒地千點周波幅來看, 下周會再挑戰29200~29500阻力區, 如打回頭就要插穿28612來擴大周波幅, 如失守就代表淡友已奪回主導權

港股慣性走勢係試完底(28612)再衝頂(29596), 衝頂打回頭再試底(28612), 今日低見28737,

牽一髮.動全身.骨牌效應

老外沽A股==>上証碌落山==>大媽沽港股班資回祖國救亡==>港股反艇

老外買A股==>上証彈高高==>大媽掃港股推高大市來派貨==>港股反彈

原來滬深大媽齊齊走中海油, 怪不得大插, 早前油股升到彭彭聲, 隨著大媽沽中海油, 一眾油股亦轉勢向下,

上証與港股的關連性

上証於3/3創月內高位3577, 當天恒指同步見頂29912

上証於18/3創3月下旬高位見3478, 當天恒指同步高見29596

無論用哪一種估市公式推算到的高位, 都要先問過上証, 由於兩地股市係同步見頂, 上証唔破頂, 恒指都冇得破頂, 齊齊尋底

~~~~~~~~~~~~~~~~~~~~~~~~~~

不進則退等爆邊

現時大鱷有兩種嘴臉, 即市亦可好淡通殺, 除了要留意美期及上証表現外, 亦要監察港股二時後歐洲股市及美債息的變化, 會影響港股尾市表現

美元走強在92穿梭, 不利新興市場貨幣及股市, 港股成也QQ, 敗也QQ, 今日QQ低見$624, 關鍵位在$621, 守得住真係一額汗, 收 $628, 近日在$640穿梭, 要看能否重上$630, 100天線($631.8), 向上阻力10天線($642.75), 整數阻力大位$650, 下周三QQ公布業績前要看淡友會否回補空倉

3月份首三周恒指走勢, 好淡角力, 每個星期都係一半好, 一半差, 代表好淡大鱷勝負未分, 不過下周就要爆邊, 睇住上証就知港股方向

3月第一周恒指: 周初反覆急升, 周四五大插插

3月第二周恒指: 周一插水, 周二三四急升, 周五大插插

3月第三周恒指: 周一二三四連升, 周五大插插

本周高低位28612~29596, 向上29800~30000攔路虎, 向下支持28400~28600, 如失守, 28326就危

過去幾周恒指高低位:

2月中: 30099~31183
2月尾: 28980~31071
3月第一周: 28513~29912
3月第二周: 28326~29550
3月第三周: 28612~29596 (打破底頂下移的趨勢)

3月第四周: 28612~29596 (不進則退等爆邊, 唔破頂就要破底)

港股今日雖然收跌, 但過去一周恒指不但冇創新低, 仲打破了頂部下移的劣勢, 周線收陽收升, 符合早前預測18/2見頂, 閒閒地都要調整一個月來消化沽壓, 17/3剛好一個月, 20/3(周六)春分後就要變盤, 不進則退, 如上攻失敗而回, 就會深潛, 下試今個月低位28326, 如插穿28259, 就確認今次港股並非一般回吐一個月的正常調整, 而係轉勢向下, 會向27000進發

~~~~~~~~~~~~~~~~~~~~~~~~~~

基金經理轉保守策略.利淡

回顧1月中北水大舉湧港掃貨, 就係由28800水平一大棍抽高千點上29800, 所以大鱷大媽於過去一個月咬住29000來派貨, 指數高企不下只係假象, 其實唔少股份已等同跌至27000~28000的水平, 已嘔晒今年的升幅, 上証於9/3創今年新低3328, 但港股仍守住28326, 就係想托住高位來派貨, 上証已死, 港股早晚會破底

昨晚美國十年期債息急升, 升穿1.75%, 科企理應反艇, 但今日跌幅卻不大, 可能預示昨晚納指暴跌409點(-3.02%)後今晚會反彈, 所以科企一插即彈, 力守8400水平, 可能係空軍回補空倉, 亦有可能係美國十年期美債升勢過急, 周線極度超買, 過份拋售美債, 債息有可能衝高回落, 所以大鱷偷步部署, 反映債市恐慌指數的MOVE近日未有大幅攀升, 冇再突破26/2高位75.66, 在在反映債息升勢將會回順

今個月港股頻頻沖高回落, 皆因3月基金季結要鎖定利潤,2月已有(中港)基金經理說盈利大縮水,甚至有說已蝕入肉出現虧蝕, 一二月基金都係大好友, 多數重倉科企新經濟股以及全面買上係死因, 所以對於中港股市過去一個月的跌浪係走避不及, 近來港股每次彈上去就見沽壓, 可能係基金經理走貨止賺/止蝕及減倉避險, 市傳內地基金出現贖回潮, 阿爺收水利淡股市, 普遍基金經理都認為中港美股市大方向調整未完, 不過由於美債息衝高回落, 短線或會有反彈, 由於債息仍處上升趨勢, 早晚會殺上2%, 不利股市, 所以應市策略已由2月的全力買上看好變成保守看淡, 失去了基金經理及大媽條大水喉, 港股易跌難大升

{#icono_71}{#icono_71}{#icono_71}{#icono_71}{#icono_71}{#icono_71}{#icono_71}{#icono_71}{#icono_71}{#icono_71}{#icono_71}{#icono_71}{#icono_71}{#icono_71}{#icono_71}

港股成交急降, 大龍鳳先兆, 不進則退牛命危

22/3 周一恒指收28885, 跌105點, 連跌兩天

如果跟過去兩個月恒指走勢, 月尾會有一次急彈, 然後才落地獄, 但今日卻彈散直落, 形勢不妙, 代表沽壓沉重, 今日高見29139, 周波幅只得338點, 以閒閒地千點周波幅來看, 如仍受制於29200~29500, 就要插穿今日低位28801來擴大周波幅, 下試28400~28600水平, 如收於其下不妙

上周恒指連升4天本來走勢已略為改善, 但連插兩天已失守多條短線平均線, 走勢再度轉差, 近來恒指在29000穿梭, 跌下彈下, 周線係梅花間竹, 一周升一周跌, 港股上周收升, 就要小心本周輪到收跌, 即係周五會收28990之下

亞洲時段美元上企92, 大鱷明知今早沽壓大, 唔敢高開, 擔心沽番落黎收陰燭, 所以由得大市大幅低開189點, 就可降低日線及周線畫陽燭的難度, 結果恒指收跌105點, 成功收陽, 引左唔少好友入局, 牛肥熊瘦, 股民博反彈就要買定官才,

今日上証升+納期大升利好, 但科指卻跌(可能係擔心科企業績), 拖低恒指, 應升不升需防跌, 科指及恒指果然收跌, 國指收升22點, 皆因大鱷十分蠱惑, 上周五內銀大插插, 今日彈高高, 其實內銀只係收復上周五的失地, 並非強勢, 上証大幅反彈38點報3443, 低見3404, 險守3400水平, 如失守不妙

美市時段美元碌落山, 收91.8, 美債息升勢回順, 但仍在高位反覆, 受美國匯債高企拖累, QQ等熱炒股的莊家已撤退, 如失守28800, 就要向28612.28326.28259進發, 只要破位, 就會掀起斬倉潮, 令大市急瀉

~~~~~~~~~~~~~~~~~~~~~~~~~~~~~~~

港股今日仍在29000穿梭養牛熊, 靜極思動, 成交突然急降, 預示明日港股會有大龍鳳, 因為恒指已連跌2天, 近來恒指通常3日就轉向, 如果震埋明天(半日或一日), 就要拗腰上, 如打破慣性走勢連續四日收29000之下就唔對路, 代表好友已撤退, 淡友已奪回主導權, 上周低位28612及月初低位28326就危

今個月恒指收29000之下的日數:

8.9.10/3 三天後彈上29000收

12.15/3 兩天後彈上29000收

19.22/3 暫時兩天

恒指高見29139, 於29200阻力位打回頭, 牛肥熊瘦拉住港股後腿, 明日百度上市, 後日QQ公布業績, QQ仍受制於10天線約$643水平, 如失守$630不妙, 當插穿$621就會拉住港股落山

上周港股反覆向上, 周線收升, 恒指連續5天收市U盤都係踢高, 但今日收市U盤卻走低, 預示明日港股不妙, 本周有可能係收跌

美元在92穿梭, 高企不下, 資金流不利中港股市, 新興市場股匯都不妙, 土耳奇巴西俄羅斯陸續加息, 利淡股市

最新回應

soho*
soho* 2021/04/21

雞煲, 好友周一冇食胡, 今次真係 [柯篤茄] "點算好"

C6, 唔好博反彈呀! 未見頂前要做好友, 見頂後就要做淡友,

A股唔撐得幾耐, 因為過去幾日A股大升係靠老外掃貨, 如今老外走貨, A股就危危乎

soho*
soho* 2021/04/21

黑天鵝

我擔心周一(19/4)高位29319已見頂, 月尾會破底來擴大月波幅,

周一殺上29319我已經覺得好奇怪, 點解19/4咁早就破頂升到這麼高, 因為好難撐到月尾, 如今看來係好友推上去食胡

周一爆上29319時已說買跌空間大過買上, 亦已預告恒指通常升2~3天就轉向, 加上昨日是穀雨變盤日, 昨日國指已率先收跌, 恒指就梗係要跟

今日恒指三連升斷纜, 跟足慣性走勢

28000~28500有肥牛近二千張, 具吸引力

過去三個月每逢月尾例插

今日裂口大插, 遺留下跌裂口28778~28885有待回補

過去20年4月份恒指有85%機會收升, 15%機會收跌, 我擔心係15%中, 因為有好多黑天鵝, 所以4月就算係收升, 幅度也不會多, 上月收28378

黑天鵝事件網誌已詳述

試下學下
試下學下 2021/04/21

門大師放我一馬好吾好😭😭😭🙏🙏🙏

soho*
soho* 2021/04/21

我地搵門師兄出來幫手造淡, 港股下殺危機未除, 牛牛命危