3月尾步入業績期高危周

恒指連跌3天, 大舉屠牛, 繼續尋底之旅

23/3 周二恒指收28497, 大跌388點

昨日港股成交突然急降, 今日果然上演大龍鳳, 淡友已奪得主導權, 港股破位而下, 但好友竟然逆勢操作, 蜂湧入局, 牛熊分佈82% : 18%, 28400向下級級都有肥牛, 股匯商品市場立立亂, 美期下跌, 美元上企92, 人民幣連跌3天, 港匯進一步轉弱, 真係冇眼睇, 好友要買定官才, 周三四五係創周高低位的時間窗口, 預示今日低位28376危危乎, 如插穿28326及28259, 就會引發骨牌效應, 斬倉盤會令大市沽壓加劇, 跌勢轉急

老外沽A股, 上証碌落山, 大媽沽港股班資回祖國救亡, 拖低港股, 後日(周四)QQ公布業績, 要QQ大插, 空軍回補空倉, 才能穩住大局, 按照慣性走勢, 收跌月會在20號之後創該月新低, 即係會插穿月初低位28326, QQ弱, 港股不會好, 今日期指未平倉合約大減, 可能係好友撤退, 睇下千呼萬喚始出來的百度今日上市卻乏人問津, 表現差劣, 就知港股正處下行趨勢

上月曾經講過, 過去幾個月港股大升, 好友賺到笑, 大鱷必定會逼好友嘔突盈利, 所以過去一個月一直托住港股扮跌唔落, 引好友入局, 溫水煮蛙式派貨, 其實港股於2月中已轉勢向下, 跌下彈下目的係維持市場氣氛,

~~~~~~~~~~~~~~~~~~~~~~~~~~~~~

28500~29500困局向下爆邊利淡

上周向上爆邊高見29596就係靠上証急彈上3478所推動

今次向下爆邊低見28376就係因為上証插水.大媽沽貨走鬼.油價下挫.中美交惡.新興市場貨幣危機.變種病毒蔓延.聯儲局上周五宣佈不延長將於3月底到期, 因疫情向銀行業提供的補充槓桿率(SLR)豁免措施

目前淡友佔上風, 多數會乘勝追擊, 港股生死繫於QQ業績及上証表現, 阿爺弱, 港股不會好

過去幾個星期擺明個局就係29000上下500點穿梭, 溫水煮蛙式派貨, 28500~29500每次爆邊, 收市都會縮番入波動區間內, 假如當天收於其外, 翌日都會縮番入去, 磨了這麼長時間, 28500樓下牛牛愈養愈肥, 當時辰一到, 大鱷就會落去食肥牛大餐,

今日恒指收28497, 如果跟慣性走勢, 明日就要縮番入波動區間內, 即係要收28500之上, 如果明日收跌, 就係連續兩日收波動區間外, 打破了今個月的慣性走勢, 代表淡友已奪得主導權, 28326/28259/28000就危, 肥牛一路排到落27800, 由於今日才是23/3, 仍有時間跌, 不會這麼快見底, 要插穿28326來擴大周及月波幅

中港股市成交萎縮, 股市有水才生, 水退則死, 中港股市通常係同步見底頂, 上証於上周高見3478就反艇, 當天港股高見29596/11577, 代表中港股市同步見頂回落, 中美巨頭阿拉斯會談不歡而散, 出現罵戰, 有火藥味, 亦利淡市場氣氛, 如果賤美老羞成怒, 加強力度打壓中國, 中港股市就死得

~~~~~~~~~~~~~~~~~~~~~~~~~~

衝頂打回頭再試底

港股慣性走勢係試完底(28612)再衝頂(29596), 衝頂打回頭再試底(28612/28326/28259), 如插穿, 大市就會急挫

以往港股都試過, 一直在一二千點內窄幅上落, 當人人都以為大牛市跌唔落, 繼續買上, 就會失驚無神大插插, 股民走避不及, 全艇, 大市再插, 斬倉, 股民的血汗錢就不斷被蠶食

牛熊分布嚴重失衡, 牛多熊少, 下殺危機未除, 本周係業績高峰期, 快手.吉利.恒地.閱文.藥明生物.眾安在線.QQ.中移.安踏.美圖.美團業績對港股升跌舉足輕重, 近來業績股都係見光死, 要有兩手準備

根據過去20年的記錄顯示3月的升跌比例係7升13跌, 3月恒指收跌機會率有65%, 年初1~2月造好, 3月獲利沽壓大, 收跌係正路, 我一直唔信3月會收升, 因為港股冇左大媽及基金掃貨條大水喉, 彈散容易彈高難, 一直扮跌唔落係臨危托沽

~~~~~~~~~~~~~~~~~~~~~~~~~~

基金經理轉保守策略.利淡

回顧1月中北水大舉湧港掃貨, 就係由28800水平一大棍抽高千點上29800, 所以大鱷大媽於過去一個月咬住29000來派貨, 指數高企不下只係假象, 其實唔少股份已等同跌至27000~28000的水平, 已嘔晒今年的升幅, 上証於9/3創今年新低3328, 但港股仍守住28326, 就係想托住高位來派貨, 上証已死, 港股早晚會破底

港股失守所有短期平均線, 皆因上証連跌四周, 創10個月以來最長的跌浪, 阿爺收水, 內銀 call loan, 基金贖回潮, 導致中港股市出現拋售潮, 大媽沽貨撤退, 阿爺入左急症室, 港股冇運行, 近來恒指在29000穿梭, 跌下彈下, 周線係梅花間竹, 一周升一周跌, 港股上周收升, 本周就輪到收跌, 如果跟1及2月尾的走勢, 月尾就會潛行凶間

今個月港股頻頻沖高回落, 皆因3月基金季結要鎖定利潤，2月已有(中港)基金經理說盈利大縮水，甚至有說已蝕入肉出現虧蝕, 一二月基金都係大好友, 多數重倉科企新經濟股以及全面買上係死因, 所以對於中港股市過去一個月的跌浪係走避不及, 近來港股每次彈上去就見沽壓, 可能係基金經理走貨止賺/止蝕及減倉避險, 普遍基金經理都認為中港美股市大方向調整未完, 債息仍處上升趨勢, 早晚會殺上2%, 不利股市, 所以應市策略已由2月的全力買上看好變成保守看淡, 失去了基金經理及大媽條大水喉, 港股易跌難大升

美元強勢咬住92唔放, 高企不下, 資金流不利中港股市, 新興市場股匯都不妙, 土耳奇巴西俄羅斯陸續加息來抗衡美元升勢, 利淡股市

港股破位而下, 繼續尋底屠牛之旅

24/3 周三恒指收27918, 大跌579點, 連跌4天

成也QQ.敗也QQ

今日低見27827, 插穿超級大位28259, 洗倉斬倉走鬼盤湧現, 令港股跌勢加劇, 依家才是24號, 時間尚早, 以周及月波幅計, 後市仍會有新低, 就算有死貓彈, 彈完都會繼續尋底, 因為資金流走, 牛肥熊瘦, 美股納指失守關鍵位, 內地股市破位而下, 西方國家不斷出現變種病毒, 都不利市場氣氛, 買盤卻步, 令港股易跌難升, 恒指及國指未平倉合約都增加, 亦有可能係淡友見港股插穿大位加倉追沽

今年恒指最長係連跌4天, 加上剛跌至100天線大位, 正路插穿應有反彈, 如果明日都彈唔起, 就要寄望周五, 因為恒指好少全周日日跌, 以時間及波幅來看, 港股未插夠, 應該未見底, 失守27800就要下試27500, 大方向要見27000~27200不過技術上或會有後抽, 希望大鱷仍想托沽, 推番大市上去打開逃生門, 要跌下彈下才能吸引買盤進場, 直落地獄就會嚇到冇人敢入市接火棒

希望QQ生生性性, 拖慢港股下跌步伐, 如果QQ業績大行唔收貨, 插穿1月中以來低位$613, 就會推港股落地獄, QQ尾市見買盤, 可能係淡友回補空倉, 希望淡友食胡推番大市上去, 要看周五能否收28259之上, 就知好友死左未,

股市冇水就死得, 美債息雖然回落, 但美元強勢站上92.5水平, 向93進發, 拖累新興市場貨幣, 港匯進一步轉弱, 人民幣連跌4天, 中港股市插水, 好少見大媽由開市沽到收市走鬼, 怪不得港股跌到阿媽都唔認得, 奇怪的是老外大手掃入A股, 但內地股市仍大瀉

如果港股跟過去兩個月的月尾走勢, 本周理應會伸一腳上山才插水, 但上周末中美會談反檯, 令本來憧憬拜登上場, 中美關係會改善的夢碎了, 加上今個月尾係業績高峰期, 兩個新的利淡因素就令本周大市一開就瀉, 呢幾日業績股紛紛見光死, 令港股沽壓加劇, 跌幅全面, 下跌股份比例非常高, 低位毫無承接力, 真係災災地, 希望大家仍記得二月網誌曾提醒大家預言家說星體有異動, 全球災難起媽要去到3月尾, 要到11月災難才真正結束