木水火
木水火
木水火

疫苗氣泡逼打針 禪語解惑平機會

2021/04/17 12:30:01 網誌分類: 時事
17 Apr

有團體批評政府無良,為難僱主及員工成為「層壓式」谷針犧牲品,將放寬食肆經營條件與疫苗掛鈎,等同用飯碗要挾員工。依家打工仔無奈求平機會「調停」給個說法,誰知平機會一面廢話連篇一面傾斜向政府,打工仔都算「遇人不淑」矣! {#iconb_254}

疫苗氣泡逼打針 禪語解惑平機會

政府無能,靠害市民;庸官無良,懲罰基層。新冠肺炎疫苗接種計劃推行至今已逾5O日,因面癱、中風及針後死亡等嚴重異常個案嚇怕唔少市民,為咗催谷接種率,港府奇招迭出,日前推出「疫苗氣泡」,利用放寬食肆限聚措施作為「誘因」,冀吸引市民笑着捋高衣袖啪兩針,又話唔注射會「有後果」。打?唔打?令市民陷入兩難糾結,更考驗食店老闆招呼客人嘅智慧! {#icono_12}

嗱!全港大約有24萬飲食從業人員,不問可知必定有「三高人士」或其他原因並不適宜打疫苗,而政府卻以接種疫苗為籌碼,指食肆員工接種疫苗便可放寬每枱人數上限與堂食時間;而員工唔接種卻分分鐘被迫停工冇得撈。依家已有連鎖飲食集團要求員工必須接種疫苗,否則會面臨停工。阿哥,咁嘅安排算唔算「工作歧視」?打工仔為保飯碗,硬着頭皮去打針,而無論打邊種都有風險存在,出咗事,專家通常都話「與疫苗接種無直接因果關係」,咁即係出事無人負責,打工仔嘅心理壓力可想而知幾咁大! {#icono_51}

呢嗱,平機會主席朱敏健尋日喺電台節目表示,若有員工因拒絕接種疫苗而被解僱,有機會觸犯《殘疾歧視條例》嘅「間接歧視」;佢認為員工接種疫苗後可以獲得更好待遇,但不接種疫苗卻不應有較差待遇。佢又建議政府應提供誘因鼓勵接種疫苗,例如提供出行等便利,而唔係「打疫苗就上天堂,唔打疫苗就落地獄」喎! {#icono_40}

喂!依家係問你員工若因為保工作而被迫打疫苗,究竟是否涉及歧視,你就廢噏當秘笈,模棱兩可,好似禪師咁款:心若計較,處處都是怨言;心若放寬,時時都是春天。天堂與地獄,並非一針可以決定!佢仲承認,若政府建議嘅「疫苗氣泡」造成嘅差別待遇是合理及有需要,可豁免受歧視條例監管喎,咁即係點呀?有團體批評政府無良,為難僱主及員工成為「層壓式」谷針犧牲品,將放寬食肆經營條件與疫苗掛鈎,等同用飯碗要挾員工。依家打工仔無奈求平機會「調停」給個說法,誰知平機會一面廢話連篇一面傾斜向政府,打工仔都算「遇人不淑」矣!

其實,大家如果不是善忘,都知平機會連政治花瓶都不如,過往表現劣迹斑斑,尤其食衞局前局長周一嶽被翻閹打骰平機會短短時日,都搞到醜聞百出,無事生非,添煩添亂,正經事如處理「族內歧視」等條例,連進行諮詢都搞到一鑊泡,平機會被指係唯恐天下不亂嘅大花筒,不如摺鬼咗佢免得眼冤!依家嗰位主席又係廢到無倫,答非所問,聲大大冇貨賣!嗱,有咗平機會唔會上天堂,冇咗又唔會落地獄!之但係,唔見咗平機會,功夫茶則肯定耳根清淨,一天霞光,慳番公帑! {#iconb_233}

功夫茶

https://orientaldaily.on.cc/cnt/news/20210417/00190_001.html