打針，無藉口
2021/05/28 04:13:32
網誌分類:
生活
一位年輕導演回應：「乜你唔驚！」
「打支針，有乜咁驚！」我話：「萬一樓上樓下，有人感染，全幢大廈住客隔離，強迫入竹篙灣十四日，那就唔慌唔驚。」
「點解你唔打？」我問。
他說：「因為我有三高，不敢打針。」
朋友圈，有三分二未去打針。
藉口一，年紀大，內地都不鼓勵年過六十歲的人去打。
忽然之間，又咁支持內地政策。
藉口二，我驚有隱疾，唔怕一萬，最怕萬一。
平時大魚大肉，暴飲暴食，又唔驚出事。
藉口三，我等埋個驗身報告就去打針。
不過去驗身之前，先去買保險，唔知有無得claim。
藉口四，我自細都好驚打針。
係咯，即係自細都有打，打完就唔驚啦。
藉口五，我上網book啦，點知爆滿。
為何不去私家醫生打啦，不用排隊。
朋友恍然大悟，才知道，去私家醫生處打針，不用畀錢。他成日搵着數，竟然走寶。立刻預約去打針，仲叫埋菲傭一齊去。
我打了針之後，感覺做個良好市民，再加上，安心出行，一家五口行出街，有如一個五行八卦陣，百毒不侵，病毒彈開。
各地政府都鼓勵民眾打針，有派錢，有放假，又送飛機票！好像呵小朋友打針似的。不打針，病怎會好，小朋友都明白的道理，成年人竟不知道。
全世界疫情隨時反彈，疫苗短缺，蘇州過後無艇搭，到時後悔莫及……
林超榮
回應
(0)
我要發表